2 Rëyes 19:1-37
19 Tsëta wiyëkurmi gobernaq Ezequïasqa llakikur röpanta rachirqan, y jananman chukru tëlata churakurkurmi Teyta Jehoväpa wayinman yëkurqan.+
2 Tsëpitanam palaciu wayita rikaq Eliaquimta, secretariu Sebnäta y sacerdötikunapa dirigeqninkunata mandarqan chukru tëlakunata janankunaman churakurkur Diospa willakoqnin Isaïasman ëwayänampaq. Isaïasqa Amozpa tsurinmi karqan.+
3 Isaïas kaqman chëkurmi kënö niyarqan: “Ezequïasmi këta nin: ‘Kanan junaqqa insultamarnintsik y penqakatsimarnintsikmi alläpa llakitsimarquntsik. Tsëmi llullun yurinampaqna këkaptin warmi kallpannaq tikrareqnö këkantsik.+
4 Kawëkar quedaqkunata salvëkamänapaq Teyta Jehoväman mañakuykullë.+ Capaz Jehovä Diosqa, Asiriachö gobernaqpa sirweqnin rabsaquë llapan ninqanta cuentaman churëkur, kawëkaq Diospa+ contran parlanqampita castiganman’”.
5 Tsëpitanam Ezequïaspa sirweqninkunaqa Isaïas këkanqanman yëkuyarqan,+
6 y Isaïasnam kënö nirqan: “Ezequïasta këta niyë: ‘Teyta Jehovämi këta nin: “Asiriachö gobernaqpa sirweqninkuna noqapa conträ mana allikunata parlayanqanta wiyar+ ama mantsakëtsu.+
7 Pëtaqa rurëta mana pensanqantam ruratsishaq y juk noticiata wiyarmi nacionninman kutinqa y tsëchömi espädawan wanutsiyanqa o wañutsiyanqa”’”.+
8 Tsëpitanam rabsaquëqa, Asiriapa gobernaqnin Lakispita+ ëwakushqa kanqanta musyarir pëwan tinkunampaq ëwarqan y Libnäpita+ nunakunawan pelyëkaqtam tarirqan.
9 Tsënam Asiriachö gobernaqtaqa kënö nir willayarqan: “Etiopïachö gobernaq Tirhacämi qamwan pelyanampaq shamuykan”. Tsëta wiyëkurnam Asiriachö gobernaqqa, Ezequïasta kënö niyänampaq willakoqkunata+ yapë mandarqan:
10 “Judächö gobernaq Ezequïastam këta niyänëki: ‘Ama confiakunqëki Diosniki kënö nir engañashunëkita permititsu: “Asiriachö gobernaqqa manam Jerusalenta ushakätsinqatsu”.+
11 Qamqa wiyarqunkim Asiriachö gobernaq wakin nacionkunata imanö ushakätsinqanta.+ Tsënö këkaptinku, ¿qamqa salvakuyta pensanki?
12 ¿Unë kastäkuna ushakätsiyanqan nacionkunataqa santunkuna salvarqanku? ¿Mëchötaq këkäyan Gozanpita, Haranpita,+ Rëzefpita y Tel-Asarchö kawaq Edenpita nunakuna?
13 ¿Mëchötaq këkäyan Hamatchö gobernaq, Arpadchö gobernaq y Sefarvaim, Henä y Ivä markakunachö gobernaqkuna?’”.+
14 Willakoqkuna apayanqan cartakunata chaskiskirmi Ezequïasqa leyirqan. Tsëpitanam Teyta Jehoväpa wayinman ëwarqan, y Teyta Jehoväpa rikëninmanmi tsë cartakunata mashtarqan.+
15 Y Ezequïasqa kënö nirmi Teyta Jehoväman mañakurqan:+ “Querubin angelkunapa+ jananchö këkaq* Teyta Jehovä, qammi Israelpa Diosnin kanki y qammi patsata y ciëlutapis rurarqunki. Qamllam kë patsachö mëtsë nacionpita nunakunapa Dios Yayan kanki.+
16 ¡Teyta Jehovä, mañakunqäta wiyëkullë!+ ¡Teyta Jehovä, pasëkanqanta rikëkullë!+ Qam, kawëkaq Diospa contrëki Senaquerib ninqanta wiyëkullë.
17 Teyta Jehovä, rasunmi Asiriachö gobernaqqa mëtsë nacionkunata y markakunata ushakätsishqa.+
18 Y tsë ushakätsiyanqan markakunachö nunakuna adorayanqan santukunatam ninawan ushakätsiyashqa.+ Tsëtaqa rurayashqa, tsë santukunata nunakunalla rurashqa kayaptin+ y qerupita y rumipita rurashqalla kayaptinmi.
19 Kananqa Jehovä Dioslläkuna, Asiriachö gobernaqpa makimpita salvëkayämë. Tsënöpa Teyta Jehovä, entëru patsachö mëtsë nacionpita nunakuna, qamlla Teyta Dios kanqëkita musyayänampaq”.+
20 Amozpa tsurin Isaïasqa, Ezequïasta kënö niyänampaqmi mandakurqan: “Israelpa Diosnin Teyta Jehovämi këta nin: ‘Asiria nacionpa gobernantin Senaqueribpa+ makimpita salvanaqpaq mañakamunqëkitaqa wiyarqömi.+
21 Tsëmi tsë gobernantipaq noqa Jehovä këta nï:
“Sionpa warmi wamranmi despreciashurniki qampita asikun.
Y Jerusalenpa warmi wamranmi qamta rikäshurniki peqanta o umanta kuyutsin.
22 ¿Pitataq qallaparqunki,* y pipa contrantaq mana allita parlarqunki?+
¿Pipa contrantaq fuertipa parlarqunki,+ y pitataq allish tukur rikarqunki?
¡Tsë llapantaqa, Israelpa Limpiu Diosnimpa contranmi rurarqunki!+
23 Willakoqnikikunawanmi+ noqa Jehoväta kënö nir qallapämarqunki:+
‘Guërrapaq mëtsika carrëtäkunawanmimas altu kaq jirkakunayaq ëwashaq,y Lïbanuchö mas karu sitiukunayaqmi chäshaq.
Mas jatun kaq cedrukunatay mas alli kaq enebrukunatam mutushaq.
Mas karuchö qeshpir ëwakuyänëki sitiukunayaq y montikikuna rurinyaqmi yëkushaq.
24 Yakuta upunäpaqmi juk nacionchö pözukunata rurashaq,y jarurkuptïllam Egiptuchö mayukunapis* tsakiriyanqa’.
25 ¿Manaku wiyarqunki? Unëpitanam tsëkunata ruranäpaq decidirqö.+
Awmi, tsëkunata ruranäpaq patsätsinqäpitaqa atska junaqnam pasashqa.+
Y kananqa pensanqänömi rurashaq.+
Noqa permitiptïmi alli murallashqa markakunata rumillatana y tsunyaqta dejanki.+
26 Tsë markakunachö nunakunaqa manam defendikuyta puëdiyanqatsu,alläpam mantsakäyanqa y penqakatsishqam kayanqa.
Y inti o rupay yarqamunan lädupita shamoq vientum chakrachö plantatanö, verdi plantatanö,+y wayikuna jananchö këkaq plantakunatanö ushakätsinqa.
27 Noqaqa allim musyä imë jamakunqëkita,imë yarqunqëkita y imë kutimunqëkita,+y imë noqawan cölerashqa këkanqëkita.+
28 Cölerar conträ parlanqëkita+ y büllanqëkitam wiyarqö.+
Tsëmi senqëkiman ganchüta churarkur y shimikiman fiërruyoq bosalnïta churarkur+
shamunqëkipa kutitsishqëki”.+
29 Kë pasakunqanmi Ezequïas, qampaqqa juk señal kanqa: kë wata y shamoq watapis chakrakunachö kikinllapita jeqamunqantam* mikuyanki,+ y kima kaq watanam muruyanki y cosechayanki, y üvaskunata plantarmi wayunqanta mikuyanki.+
30 Judäpita kawëkar quedaq nunakunaqa,+ alli watsishqa o matsushqa* alli wayoq plantanömi kayanqa.
31 Jerusalenpitam wakin nunakunaqa kawëkar yarqayämunqa, awmi, Sion jirkapitam salvakushqa nunakuna yarqayämunqa. Angelkunata mandaq Teyta Jehovä munaptinmi tsënöqa kanqa.+
32 Tsëmi Teyta Jehoväqa Asiriachö gobernantipaq kënö nin:+
“Manam kë markaman yëkamunqatsu,+y manam juk flëchallatapis flëchanqatsu,manam escüdun aptashqa pelyanqatsuy manam kë markaman yëkamunampaq allpata montonanqatsu.+
33 Shamunqan nänipam kutinqa,y manam kë markaman yëkamunqatsu” ninmi Teyta Jehovä.
34 “Kikïrëkur y sirwimaqnï Davidman yarpëkurmi,+kë markataqa defendir+ salvashaq”’”.+
35 Tsë paqaslla Teyta Jehoväpa angelnin shamurmi, asiriukunapa campamentunchö cientu ochenta y cincu mil soldädukunata wanutsirqan.+ Y waränin tempränu sharkoq kaqkunaqa, ayakuna jitarëkaqllatanam rikäyarqan.+
36 Tsënam Asiriapa gobernaqnin Senaqueribqa, Nïniviman kutir+ tsëchö quedakurqan.+
37 Nisroc santumpa templunchö qonqurirëkaptinmi, tsurinkuna Adramëlec y Sarëzer espädawan wanutsiyarqan+ y tsëpitam Ararat kinrëpa+ qeshpir ëwakuyarqan. Y tsurin Esar-Hadonnam+ pëpa rantin gobernaq tikrarqan.
Nötakuna
^ O capazchi “chowpinchö o pullanchö”.
^ O “ashiparqunki”.
^ Kënöpis niyanmi: riukunapis.
^ O “shikwanqan gränukunapita jeqamunqantam”.
^ Kënöpis niyanmi: jawashqa; chapashqa; sipishqa.
