2 Rëyes 2:1-25
2 Elïasta+ Jehovä Dios pukutëkuna kaqpa vientuwan+ apanampaqna këkaptinmi, Elïasqa Eliseuwan+ Guilgal+ markapita yarquyarqan.
2 Yarqurirnam Elïasqa Eliseuta kënö nirqan: “Betel markata ëwanäpaqmi Jehovä Dios nimashqa, qamqa këllachöna quedakuy”. Tsënam Eliseuqa nirqan: “Mëpa ëwaptikipis manam dejashqëkitsu. Këtaqa Jehoväpa y qampa jutikichömi nikaq”. Tsëmi Betel markata+ ishkan ëwayarqan.
3 Chäriyaptinnam Diospa willakoqninkunaqa* Eliseuta kënö niyarqan: “¿Musyankiku kanan junaq Elïasta Jehovä Dios apakunampaq kaqta? Mananam yachatsishunkinatsu”.+ Tsënam Eliseuqa, “awmi musyämi. Ama tsëpaqqa parlayënatsu” nirqan.
4 Tsëpitanam Elïasqa Eliseuta kënö nirqan: “Jericö markata+ ëwanäpaqmi Jehovä Dios nimashqa, qamqa këllachö quedakuy”. Eliseunam nirqan: “Mëpa ëwaptikipis manam dejashqëkitsu. Këtaqa Jehoväpa y qampa jutikichömi nikaq”. Tsëmi Jericö markata ishkan ëwayarqan.
5 Chäriyaptinnam Diospa willakoqninkunaqa* Eliseuta kënö niyarqan: “¿Musyankiku kanan junaq Elïasta Jehovä Dios apakunampaq kaqta? Mananam yachatsishunkinatsu”. Tsënam Eliseuqa, “awmi musyämi. Ama tsëpaqqa parlayënatsu” nirqan.
6 Tsëpitanam Elïasqa Eliseuta yapë nirqan: “Jordan mayuta* ëwanäpaqmi Jehovä Dios nimashqa, qamqa këllachö quedakuy”. Eliseunam nirqan: “Mëpa ëwaptikipis manam dejashqëkitsu. Këtaqa Jehoväpa y qampa jutikichömi nikaq”. Tsëmi ishkan ëwayarqan.
7 Y Jordan mayupa* kuchunchömi shäkuriyarqan.* Peru qepankunata ëwaq Diospa cincuenta willakoqninkunaqa karullapitam rikarëkäyarqan.
8 Tsënam Elïasqa janan kaq röpanta+ shumaq doblarkur yakuta sheqïkurqan o tsapirkurqan.* Tsënam yaku ishkëman rakikäriptin tsaki patsapana ishkan pasayarqan.+
9 Mayuta* tsimparirnam Elïasqa Eliseuta kënö nirqan: “Manaraq ëwakuptï ima munanqëkitapis kanan höra nimë”. Tsënam Eliseuqa nirqan: “Qam poderyoq kanqëkipitapis+ mas poderyoq*+ këtam munä”.
10 Tsënö niptinmi Elïasqa nirqan: “Tsëtaqa manachi rurëta puëdishaqtsu. Peru ëwakunqäta rikämarqa chaskinkim, peru mana rikämarqa manam”.
11 Tsënö parlar ëwëkäyaptinmi, nina cawallukunayoq nina carrëta+ yurirkur ishkanta rakiskirqan, y Elïasmi tsë carrëtawan pukutëkuna kaqpa vientuchö ëwakurqan.+
12 Tsëta rikëkurnam Eliseuqa fuertipa, “¡teytallë teyta! ¡Israelpa carrëtanta y soldäduyoq cawallunkunatam rikëkä!”+ nirqan. Elïasta manana rikarninmi röpanta ishkëman rachirirqan.+
13 Tsëpitanam Elïaspa shikwanqan röpanta+ aparkur Jordan mayu* kuchunta kutirqan.
14 Tsëchönam Elïaspa röpanwan yakuta sheqïkurqan o tsapirkurqan* kënö nir: “¿Mëchötan këkan Elïaspa Diosnin Jehovä?”. Eliseu yakuta sheqïkuptinmi o tsapïkuptinmi yakuqa ishkëman rakikaskirqan, tsënam tsaki patsapana pasarqan.+
15 Tsënö ruranqantam Teyta Diospa willakoqninkuna karupita rikäyarqan, pëkunaqa Jericö markapitam kayarqan. Ruranqanta rikëkurmi kënö niyarqan: “Elïastanöllam kananqa Eliseutapis Teyta Dios poderninwan+ yanapëkan”. Tsëmi Eliseupa puntanman ëwar qonqurikuyarqan.
16 Tsëpitanam kënö niyarqan: “Këchömi këkäyan yanapayämaq cincuenta valienti nunakuna. Munaptikiqa Elïasta asheqnin ëwariyätsun. Capazchi Jehovä Diosqa poderninwan apar jirkakunaman o pampakunaman jitarishqa”.+ Eliseunam, “ama pitapis mandayëtsu” nirqan.
17 Peru mas exigiyaptinmi Eliseuqa, “tsëqa mandayëlla ari” nirqan. Tsëmi Diospa willakoqninkunaqa cincuenta nunakunata mandayarqan, y kima junaqpa ashirpis manam tariyarqantsu.
18 Mana tarir kutiriyaptinnam Eliseuqa, “ama nikaptïmi ëwayarqëki” nirqan. Eliseuqa Jericö markachömi quedakushqa karqan.+
19 Juk kutim nunakuna Eliseuta kënö niyarqan: “Teytë, rikanqëkinömi kë markaqa alli sitiuchö këkan,+ peru yakuqa manam allitatsu rurakun, y chakrapis manam wayuntsu”.*
20 Tsënö niyaptinmi Eliseuqa nirqan: “Mushoq taksha tazonwan kachita apayämuy”. Tsëmi apapuyarqan.
21 Tsënam Eliseuqa yaku yarqamoqman ëwëkur kachita winarqan.+ Tsëpitanam kënö nirqan: “Jehovä Diosmi kënö nin: ‘Kë yakutam alliyätsirqö. Mananam nunakunata wanutsinqanatsu, y warmikunapis kananqa qeshyaqnam tikrayanqa’”.*
22 Tsëmi kananqa Eliseu ninqannö yakuqa allina.
23 Tsëpitanam Betel markata ëwakurqan. Y nänipa witsarëkaptinmi wamrakunaqa markapita yarqurir, “¡witsämuy qala putu! ¡Witsämuy qala putu!” nir burlakuyarqan.+
24 Tsënam Eliseu tumëkur Jehovä Diospa jutinchö maldicïkuptin, ishkë china ösukuna+ montikunapita yarqaramur cuarenta y dos wamrakunata wanuratsirqan.+
25 Eliseuqa Carmëlu jirkatam+ ëwarqan, tsëpitanam Samaria markata kutimurqan.
Nötakuna
^ Hebreu idiömachöqa “Diospa willakoqninkunapa tsurin” ninmi.
^ Hebreu idiömachöqa “Diospa willakoqninkunapa tsurin” ninmi.
^ Kënöpis niyanmi: riuta.
^ Kënöpis niyanmi: riupa.
^ Kënöpis niyanmi: ichiskiyarqan.
^ Kënöpis niyanmi: maqëkurqan.
^ Hebreu idiömachöqa “qam chaskinqëki espïritutam ishkë kuti mas chaskita munä” ninmi.
^ Kënöpis niyanmi: Riuta.
^ Kënöpis niyanmi: riu.
^ Kënöpis niyanmi: maqëkurqan.
^ O capazchi “warmikunata shullutseq”.
^ O capazchi “manana shulluyanqanatsu”.
