2 Rëyes 20:1-21
20 Tsë witsankunam Ezequïasqa alläpa qeshyar wanunampaqna këkarqan.+ Tsëmi Amozpa tsurin Isaïasqa watukaq ëwar kënö nirqan: “Teyta Jehovämi këta nin: ‘Manam alliyankinatsu, y ichikllachönam wanukunki. Tsëmi imata rurayänampaq kaqta familiëkikunata nï’”.+
2 Tsëta wiyarnam Ezequïasqa perqaman tumëkur Jehovä Diosman kënö mañakurqan:
3 “Teytallä Jehovä, mandakunqëkikunata llapan shonqüwan cäsukunqäta, y qampa rikënikipaq alli kaqta ruranqäta ama imëpis qonqëkullëtsu”.+ Tsënö nirmi Ezequïasqa llakipëpaq* alläpa waqarqan.
4 Tsëmi Jehovä Diosqa palaciu patiuta manaraq pasaptin Isaïasta kënö nirqan:+
5 “Kutirnin sirwimaqnïkunapa gobernantin Ezequïasta nï: ‘Unë kastëki Davidpa Diosnin Jehovämi kënö nishunki: “Mañakamunqëkita y waqanqëkitam wiyarqö.+ Tsëmi qeshyanqëkipita alliyätsishqëki,+ y kanampita kima junaqtaqa noqa Jehoväpa templümannam ëwanki.+
6 Y quinci wata masraqmi kawatsishqëki, kë markata y qamtapis Asiria+ nacionpa gobernantimpitam salvashqëki. Tsëtaqa rurashaq pï kanqäta nunakuna musyayänampaq y Davidwan parlanqäta cumplirmi”’”.+
7 Tsëpitanam Isaïasqa nirqan: “Tsaki hïguswan rurashqa masata apayämuy”. Chäratsiyaptinnam Ezequïaspa herïdanman laqëkatsirqan. Tsëwanmi alliyärirqan.+
8 Manaraq alliyarmi Ezequïasqa Isaïasta tapurqan: “¿Imanötan musyashaq+ Teyta Jehovä alliyatsimänampaq kaqta y kanampita kima junaqta Jehoväpa wayinman ëwanäpaq kaqta?”
9 Isaïasnam nirqan: “Jehovä cumplinqanta musyanëkipaqqa, kikin Teyta Jehovämi juk señalta rikätsishunki. ¿Kë escalonchö* rikakoq wäni o llantuy chunka grädata puntaman ëwanantaku o qepaman ëwanantaku munanki?”.+
10 Ezequïasnam nirqan: “Puntamanqa fäcilchi chunka grädata ëwanqa, peru manachi chunka grädata qepamanqa kutinqatsu”.
11 Tsëmi Isaïas Jehovä Diosman mañakuriptin wäniqa o llantuyqa, Acazpa escalëranta pasashqana këkarpis chunka grädata qepaman kutirqan.+
12 Tsë witsanmi qeshyëkanqanta musyarir,+ Babiloniapa gobernantin y Baladanpa tsurin Berodac-Baladanqa qarëtawan cartakunata Ezequïaspaq apatsiyarqan.
13 Ezequïasqa tsë nunakunata kushishqa chaskirmi, väleq cösaskuna churaränan wayita rikätsirqan.+ Awmi, tsë wayiman churayanqan plätata, öruta, shumaq pukutaq o mushkoq aceitita, mas väleq aceitikunata, imëka armakunata y tsëchö llapan kaqkunatam rikätsirqan. Ezequïasqa kikimpa wayinchö* y gobernanqan nacionchö llapan kanqantam rikätsirqan.
14 Tsë llapan pasakunqanchönam Diospa willakoqnin Isaïasqa, Ezequïasman ëwar kënö tapurqan: “¿Tsë nunakunaqa mëpitataq shayämushqa? ¿Imatataq niyäshurqunki?”. Ezequïasnam, “pëkunaqa karuchö këkaq Babiloniapitam shayämushqa” nirqan.+
15 Tsënam Isaïasqa tapurqan: “¿Imakunatataq wayikichö rikäyashqa?”. Ezequïasnam, “wayïchö llapan väleq cösasnïkunatam rikätsirqö” nirqan.
16 Tsënam Isaïasqa Ezequïasta nirqan: “Teyta Jehovä ninqanta wiyë:+
17 ‘¡Rikë! Ichikllachönam wayikichö llapan kaqkunata, y unë kastëkikuna llapan juntayanqanta Babiloniaman apakuyanqa,+ y manam imapis quedanqatsu. Tsënö kanampaq kaqtam noqa Jehovä nï.
18 Tsënöllam wakin tsurikikunatapis apakuyanqa,+ y Babiloniachö gobernaqpa palaciunchömi carguyoq kayanqa’”.+
19 Isaïas tsënö niptinnam, Ezequïasqa kënö nirqan: “Llapan nimanqëkiqa Teyta Jehovä alli kaqta ruraq kanqantam rikätsikun”.+ Y kënöpis nirqanmi: “Tsëqa, wanunqäyaqqa yamë y alli segürum kawakuyäshaq”.+
20 Ezequïas ruranqankunapita, puëdeq kanqampita, pözuta ruranqampita+ y markaman yakuta chätsinampaq+ tünilta ruranqampitaqa Judächö gobernaqkunapaq willakoq librum masllata willakun.
21 Ezequïas wanuriptinnam+ tsurin Manases+ gobernar qallëkurqan.+
Nötakuna
^ Kënöpis niyanmi: ankupëpaq; kuyapëpaq.
^ Capazchi kë escalontaqa imë höra kanqanta musyayänampaq utilizäyaq.
^ O “palaciunchö”.
