2 Rëyes 21:1-26
21 Manasesqa+ döci watayoq këkarmi gobernar qallarqan. Jerusalen markachömi cincuenta y cincu watapa gobernarqan.+ Mamäninqa Hefzïba jutiyoq warmim karqan.
2 Manasesqa Jehovä Diosta mana cäsukurmi, Jehovä Dios qarqunqan+ unë nunakunanö imëka jutsata* rurarqan.+
3 Papänin Ezequïas ushakätsinqan sagrädu altu sitiukunatam altsarqan.+ Y Israelpa unë gobernantin Acabnömi+ Baal santupaq altarta ruratsirqan y Aserä santupa postinta* ruratsirqan.+ Intita o rupayta, killata y estrëllakunatapis adorarqanmi.+
4 Jehovä Diosmi nishqa karqan: “Jerusalen markam jutïpa reqishqa kanqa”.+ Teyta Jehovä tsënö nikaptinmi, Manasesqa santukunapaq altarkunata templunchö rurarqan.+
5 Jehoväpa templumpa ishkan patiunkunachömi+ intita o rupayta, killata y estrëllakunata adoranampaq altarkunata ruratsirqan.+
6 Wamranta altarchö ninawan rupatsirmi santukunata adorarqan. Tsënöllam suerti qateq+ y brüju karqan.+ Y nunakunatam churarqan wanushqakunata tapuyänampaq y suertita qatitsiyänampaq. Manasesqa Jehovä Diosta cöleratsirmi imëka mana allikunata rurarqan.
7 Ruratsinqan Aserä santupa postintam*+ Teyta Jehoväpa templunman churarqan. Tsë templupaqmi Davidtawan tsurin Salomonta Teyta Dios kënö nishqa karqan: “Israelchö këkaq llapan markakunapitam, kë templuta y Jerusalen markata akrarqö jutïpa imëyaqpis reqishqa kanampaq.+
8 Y sirwimaqnï Moisestawan qellqatsinqä Leyta cumpliyaptinqa,+ manam israelïtakunata qarqushaqtsu unë kastankunata+ entreganqä nacionpita”.
9 Tsënö nikaptimpis Judä nunakunaqa manam cäsukuyarqantsu. Pëkunaqa Manases ruranqanta qatirmi, Jehovä Dios ushakätsinqan unë nacion nunakunapitapis mas mana allikunata rurayarqan.+
10 Tsënö mana allikunata rurayaptinmi, Jehovä Diosqa willakoqninkunata mandarqan+ kënö niyänampaq:
11 “Judä nunakunapa gobernantin Manasesqa,+ unë amorreu nunakunapitapis mas jutsatam* rurëkan+ y melanëpaq santukunata adorarmi, Judä nunakunata jutsata rurëkätsin.
12 Tsëmi Israelpa Diosnin Jehovä kënö nishqa: ‘Judä nacionta y Jerusalen markatam tukuyläya desgraciawan castigashaq.+ Y tsëta musyarirmi nunakunaqa alläpa mantsakäyanqa.+
13 Samaria markata+ y Acabpa kastankunata+ castiganqänöllam,+ Jerusalen markatapis castigashaq. Plätuta awirir* kupsarkoqnömi,*+ Jerusalen markata castigashaq.*
14 Kawëkar quedaq nunakunatapis manam chikeqninkunapita defendishaqnatsu.+ Chikeqninkunaqa ëwëkurmi cösasninkunatawan prësu apakuyanqa.+
15 Tsënöqa rurashaq cöleratsimar rikënïchö mana allikunata rurayanqampitam. Pëkunaqa Egiptupita pushamunqä unë kastankunapita qallëkurmi kananyaq mana allikunata rurar cöleratsiyämashqa’”.+
16 Teyta Jehovä chikinqankunata rurarmi, Judä nunakunata mana allikunata ruratsirnin Manasesqa jutsata* rurarqan, y jutsannaq nunakunatam wanutsirqan. Tsënö rurarmi Jerusalenpa juknin kuchumpita juknin kuchunyaq yawarta jicharqan.+
17 Manases ruranqankunapita y imëka jutsata* ruranqampitaqa Judächö gobernaqkunapaq willakoq librum masllata willakun.
18 Manases wanuriptinqa wayin lädunchö këkaq Uzäpa huertanmanmi pampayarqan.+ Tsëpitanam Amon jutiyoq tsurin gobernar qallëkurqan.
19 Amonqa+ veintidos watayoq këkarmi gobernar qallarqan. Jerusalen markachömi ishkë watapa gobernarqan.+ Mamäninqa Jotbä markapita Haruzpa tsurin Mesulëmet jutiyoq warmim karqan.
20 Amonpis papänin Manasesnöllam Jehovä Diosta mana cäsukur mana allikunata rurarqan.+
21 Papänin adoranqan melanëpaq santukunatam adoraq.+
22 Unë kastankunapa Diosnin Jehovätam dejarirqan, y manam Jehovä munanqannötsu kawarqan.+
23 Tsëpitanam Amontaqa kikimpa sirweqninkunalla contran churakar palaciuchö wanuratsiyarqan o wañuratsiyarqan.
24 Peru tsë markapita nunakunaqa, Amonta wanutseqkunata wanuskatsirmi, tsurin Josïasta gobernanti churayarqan.+
25 Amon ruranqankunapitaqa Judächö gobernaqkunapaq willakoq librum masllata willakun.
26 Amon wanuriptinnam Uzäpa huertanman pampayarqan.+ Tsëpitanam tsurin Josïas+ gobernar qallëkurqan.
Nötakuna
^ Kënöpis niyanmi: pecäduta.
^ Rikäri “Bibliachö palabrakunata entiendinapaq” neqchö “sagrädu posti” neqta.
^ Rikäri “Bibliachö palabrakunata entiendinapaq” neqchö “sagrädu posti” neqta.
^ Kënöpis niyanmi: pecädutam.
^ Kënöpis niyanmi: paqarir; mayllarir.
^ Kënöpis niyanmi: puqtsarkoqnömi.
^ Hebreu idiömachöqa nikan, albañilkuna utilizäyanqan cordelwan y nivelwan midir midir sirweqninkunata Dios castiganqantam.
^ Kënöpis niyanmi: pecäduta.
^ Kënöpis niyanmi: pecäduta.
