2 Rëyes 24:1-20
24 Judä nacionchö Jehoiaquim gobernëkaptinmi, Babiloniapa gobernantin Nabucodonosor+ atacaq ëwarqan. Tsëmi Jehoiaquimqa kima watapa sirweqnin tikrarqan, peru tsëpitaqa contranmi churakarqan.
2 Tsënam Jehovä Diosqa, Judä nacionta ushakätsiyänampaq asaltantikunata mandarqan. Tsë asaltantikunaqa caldeu nunakuna,+ siriu nunakuna, moabïta nunakuna y ammonïta nunakunam kayarqan. Tsënömi cumplikarqan Jehovä Diospa willakoqninkuna willakuyanqan.+
3 Manases jutsata* ruranqampitam+ Jehovä Diosqa Judä nunakunata rikëtapis munarqannatsu,+ tsëmi asaltantikunata mandarqan.
4 Jutsannaq* nunakunata Manases wanutsinqampita+ y Jerusalen markachö yawarta jichanqampitam, Jehovä Diosqa Judä nunakunata perdonarqantsu.+
5 Gobernanti Jehoiaquim ruranqankunapitaqa Judächö gobernaqkunapaq willakoq librum masllata willakun.+
6 Jehoiaquim wanuriptinnam,+ tsurin Joaquin gobernar qallëkurqan.
7 Babiloniapa gobernantinmi, Egiptu pampapita+ Eufratis mayuyaq+ markakunata poderninchö katsirqan.+ Tsëmi Egiptu nacionpa gobernantinqa markakunata atacanampaq yarqurqannatsu.
8 Joaquinqa+ dieciöchu watayoq këkarmi gobernar qallarqan. Jerusalen markachömi kima killapa gobernarqan.+ Mamäninqa Jerusalen markapita Elnatanpa tsurin Nehustä jutiyoq warmim karqan.
9 Joaquinqa papäninnöllam Jehovä Diosta mana cäsukur mana allikunata rurarqan.
10 Tsë witsanmi Babilonia gobernantipa soldädunkuna Jerusalen markaman ëwar atacayänampaq entëru lädumpa churanakuyarqan.+
11 Tsënö këkäyaptinmi Nabucodonosorpis charqan.
12 Tsënam gobernanti Joaquinqa mamanwan, sirweqninkunawan, dirigentikunawan y cortichö trabajaqkunawan+ yarqurir Babilonia gobernantipa+ poderninman churakäyarqan. Tsëmi pëqa Babiloniaman prësu apakurqan. Tsëqa karqan Nabucodonosor puwaq watapana gobernëkaptinmi.+
13 Nabucodonosorqa Jehoväpa templumpita y palaciu wayipitam+ llapan väleq cösaskunata apakurqan. Teyta Jehoväpa templunchö örupita cösaskunatapis ushakätsirqanmi, tsëkunataqa Israelpa unë gobernantin Salomonmi ruratsishqa karqan. Kë llapan pasakunampaq kaqtaqa, Jehovä Dios willakushqanam karqan.
14 Jerusalen markaman yëkurirmi diez mil nunakunata prësu apakurqan. Dirigentikunata,+ mas valienti kaq soldädukunata, imëkata rurëta yachaq nunakunata y herrërukunatapis aparqanmi.+ Y mas waktsa kaq nunakunallatam dejarqan.+
15 Gobernanti Joaquinta,+ mamanta, warminta, cortichö trabajaqkunata y entëru nacionchö respetashqa nunakunatam Babiloniaman prësu apakurqan.+
16 Y siëti mil soldädukunatam prësu aparqan, tsënöllam imëka rurëta yachaqkunata y herrërukunatapis milta aparqan. Tsë llapankunaqa guërrachö alli pelyëta yachaqkunam kayarqan.
17 Babiloniapa gobernantinqa Joaquinpa+ tiyun Matanïastam gobernanti churarqan, y Sedequïas nirmi jutinta cambiatsipurqan.+
18 Sedequïasqa veintiun watayoq këkarmi gobernar qallarqan. Jerusalen markachömi onci watapa gobernarqan. Mamäninqa Libnä markapita Jeremïaspa tsurin Hamutal+ jutiyoq warmim karqan.
19 Sedequïasqa, Jehoiaquim+ ruranqannömi Jehovä Diosta mana cäsukur imëka mana allikunata rurarqan.
20 Jerusalenpita y Judäpita nunakunawan alläpa cölerarmi, Teyta Jehoväqa imëka mana allikunata pasayänanta permitir rikënimpita qarqurqan.+ Sedequïasqa, Babiloniachö gobernaqpa contranmi churakarqan.+
