2 Rëyes 6:1-33
6 Juk kutim Diospa willakoqninkunaqa*+ Eliseuta kënö niyarqan: “Kë wayiqa manam llapantsikpaq tinkunnatsu tsëmi kichkina këkantsik.
2 Ëwariyäshaq Jordan mayu* kuchunta, tsëchö qerukunawan wayita rurarir täkuyänäpaq”.* Tsënam Eliseuqa, “ëwariyë ari” nirqan.
3 Y juk kaqnam, “qamwampis ëwashun teytë” nirqan. Eliseunam, “ëwashun ari” nirqan.
4 Tsëmi pëkunaqa Eliseuwan Jordan mayu* kuchunta ëwar wayipaq qeruta walluyarqan.
5 Peru Diospa juk willakoqnin qeruta walluykaptinmi hächanqa chakimpita jipikärir yakuman jeqakurkurqan. Tsënam mantsakarnin Eliseuta nirqan: “Teytallë, ¡tsë hächataqa mañakamurqällam, kananqa imanöraq kashaq!”.
6 Tsënö niptinmi Eliseuqa,* “¿mëmantaq jeqashqa?” nirqan. Rikäratsiptinnam Eliseuqa juk taksha qeruta wallurir jitarkurqan, tsëmi hächaqa kaskäramurqan o aynarkamurqan.*
7 Tsëmi Eliseuqa, “jinan höra jipimuy” nirqan. Tsënam makinwan jipiramurqan.
8 Siria nacionpa gobernantinmi israelïtakunawan pelyayänampaq ëwarqan.+ Y soldädunkunata tapurirmi, “tsë sitiuchömi campamentuta rurashun” nirqan.
9 Tsënam Eliseuqa+ juk willakoqta mandarqan Israelpa gobernantinta kënö ninampaq: “Siriu soldädukunam tsë sitiupa shamuykäyan. Ama tsëpaqa pasayëtsu”.
10 Tsëmi Israelpa gobernantinqa, Eliseu ninqan sitiuchö këkaq nunakunaman willakatsirqan. Eliseu imëpis willatsiptinmi Israelpa gobernantinqa tsë sitiukunapa pasaqtsu.+
11 Tsënam Siria nacionpa gobernantinqa cölerarnin soldädunkunata qayëkur nirqan: “¿Mëqëkitaq Israelpa gobernantinta llapan parlanqantsikta willëkäyanki? ¡Niyämë!”.
12 Tsënam juk soldädu kënö nirqan: “Teytë, manam noqakunatsu, Israel nacionchö Diospa willakoqnin Eliseum willakun. Pëmi pununqëki cuartuchö parlanqëkita Israelpa gobernantinta willan”.+
13 Tsënam Siria nacionpa gobernantinqa, “prësutsinäpaq musyapakayämuy, mä mëchöshi këkan” nirqan. Tsëpitanam, Dotan markachö këkanqanta willayarqan.+
14 Tsëmi gobernantiqa soldädukunata jinan höra mandarqan cawallunkunawan y guërrapaq carrëtankunawan ëwarnin prësuyämunampaq. Y pëkunaqa paqaspa chëkurmi markapa entëru lädunman churanakuyarqan.
15 Eliseupa sirweqninnam tempränulla shärikuskir rikärirqan, cawallunkunawan y guërrapaq carrëtankunawan mëtsika soldädukuna markapa entërumpa këkäyanqanta. Tsëmi mantsakarnin Eliseuta nirqan: “Teytë, ¡kananqa imataraq rurashun!”.
16 Eliseunam nirqan: “¡Ama mantsakëtsu!+ Pëkunaqa wallkaqllam kayan. Noqantsikwan këkaqkunam mas atskaqqa kayan”.+
17 Tsëpitanam Eliseu+ kënö nir Teyta Diosman mañakurqan: “Teyta Jehovä, sirwimaqnïta yanapëkullë llapanta rikëkunampaq”.+ Tsë höra Jehovä yanapaptinmi sirweqninqa rikärirqan, nina cawallunkunawan y nina carrëtankunawan+ mëtsika soldädukuna entëru jirkakunapa y lädunkunapa këkäyanqanta.
18 Siriu soldädukuna prësuyänampaq Eliseuman ëwayaptinnam, pëqa Jehovä Diosman, “kë soldädukunata wiskuyäratsi” nir mañakurqan.+ Tsëmi Teyta Diosqa soldädukunata wiskuyäratsirqan.
19 Tsënam Eliseuqa soldädukunata nirqan: “Llutan nänipam shayämurqunki, noqa pushayashqëki ashiyanqëki nunapa markanman”. Tsënö nirmi Samaria markaman pusharqan.+
20 Samariaman chäratsirmi Eliseuqa kënö mañakurqan: “Teyta Jehovä kananqa rikäyätsunna”. Nawinkunata Jehovä Dios kichariptinmi, soldädukunaqa cuentata qokuriyarqan Samaria markapa pläzanchöna këkäyanqanta.
21 Israelpa gobernantin rikëkurnam Eliseuta nirqan: “Teytë, ¡jinan höra wanuratsimushaq!”.
22 Eliseunam nirqan: “¿Guërrachö prësunqëki nunakunatatsuraq wanutsinki? Ama wanutsitsu. Tsëpa rantinqa gobernantinkunaman kutikuyänampaq yakun y mikuynin qarëkuy”.+
23 Tsënö niptinmi Israelpa gobernantinqa alli mikuyta cocinaratsir qararqan. Tsëmi pëkunaqa pacha junta mikurkur y alli upurkur markankunata kutikuyarqan. Tsëpita witsëpaqa, manam siriu soldädukuna+ israelïtakunapa markankunaman yëkuyarqannatsu imankunatapis apakuyänampaq.
24 Tsëpita watakuna pasariptinnam, Siria nacionpa gobernantin Ben-Hadadqa soldädunkunawan ëwarnin Samaria markapa entërunman churanakuyarqan.+
25 Tsëmi nunakunaqa Samaria markapita yarquyta mana puëdir alläpa mallaqäyarqan.+ Tsënö kaptinmi ashnupa peqanqa o umanqa+ ochenta pläta qellë cuestarqan, y palumapa ismanimpis ishkë aptëllam* pitsqa pläta qellë cuestarqan.
26 Juk junaqmi, perqa janampa Israelpa gobernantin ëwëkaptin, juk warmi rikëkur kënö nirqan: “Teytallë, ¡Teytallë yanapëkallämë!”.
27 Tsënam gobernantiqa nirqan: “¿Imanötaq noqaqa yanapashqëki Teyta Jehoväpis mana yanapëkäshuptikiqa? Ërachö, ni vïnu rurayänan pözuchöpis manam imapis kantsu, ni aceitipis kantsu”.
28 Tsëpitanam, “¿imatan pasashunki?” nir tapurqan. Warminam kënö nirqan: “Kë warmim nimarqan: ‘Kanan junaq wamrëkita mikushun y warënam noqapata mikushun’.+
29 Tsënö nimaptinmi wamrätaqa cocinarir mikuyarqä.+ Peru waräninqa, ‘qampa wamrëkitana mikushun’ niptïmi, wamranta pakakurkushqa”.
30 Warmi tsënö niptinmi gobernantiqa röpanta rachirirqan.+ Y perqa janampa ëwëkaptinmi nunakuna rikäyarqan rurin kaq röpanqa chukru tëla kanqanta.
31 Tsëpitanam gobernanti nirqan: “¡Safatpa+ tsurin Eliseuta kanan junaq mana wanutsiptïqa Teyta Dios castiguëkamätsun!”.
32 Tsënö nirmi gobernantiqa Eliseuman juk nunata mandarqan. Y qepantam kikimpis ëwarqan. Eliseuqa dirigeq nunakunawanmi wayinchö tëkäyarqan. Y nuna manaraq chaptinmi kënö nirqan: “Rikäyë, asesïnupa tsurinmi juk nunata mandekämun wanutsimänampaq.+ Alkäbulla këkäyanki, tsë nuna chämuptinqa punkuta wichqarkur yëkamunanta dejayankitsu. Tsë nunapa qepantam gobernantipis shamuykan”.
33 Tsënö parlëkaptinllaran wanutsinampaq ëwaq nuna charqan. Y kikin gobernantipis qepanta chärirmi kënö nirqan: “Kë desgraciamanqa Jehovä Diosmi churamarquntsik. Tsënö këkaptinqa, ¿imapaqnatan shuyaräshaq Jehovä Dios yanapamänanta?”.
Nötakuna
^ Hebreu idiömachöqa “Diospa willakoqninkunapa tsurin” ninmi.
^ Kënöpis niyanmi: riu.
^ Kënöpis niyanmi: täräyänäpaq; pärayänäpaq.
^ Kënöpis niyanmi: riu.
^ O “Diospa sirweqninqa”.
^ Kënöpis niyanmi: wampurkamurqan; flotarkamurqan.
^ Tsëqa karqan 1 cabta 4 rakiyanqanmi. 1 cabqa 1, 22 litrum karqan. Rikäri “Masllata musyanapaq” neqchö B14 kaqta.
