2 Rëyes 7:1-20
7 Tsënam Eliseuqa nirqan: “Teyta Jehovä ninqanta wiyayë. Jehovämi nishqa warë kë höranö Samaria markapa punkunchö, chusku kïlunö* alli aqashqa harina juk pläta* qellë cuestanampaq kaqta. Y puwaq kïlunö cebäda juk pläta* qellë cuestanampaq kaqta”.+
2 Tsënö niptinmi gobernantita yanapaq soldäduqa kënö nirqan: “Bendicimänapaq Jehovä Dios ciëlupa punkunta kichamuptimpis manachi tsënöqa kanmantsu”.+ Eliseunam, “awmi, tsënö kanqantam rikanki,+ peru manam mikunkitsu” nirqan.+
3 Samaria markapa punkunchömi+ lepra qeshyayoq chusku nunakuna pärayaq. Pëkunam kënö parlayarqan: “Wanunantsikpaqna kanqanta musyëkarqa imallatapis rurashun, ama këchö jamaräkushuntsu.
4 Samaria markaman yëkurpis mallaqëwanmi+ wanushun, y këchö quedakurpis wanushunllam. Tsënö këkaptinqa aku ëwashun siriu soldädukunapa campamentunman. Tsëchö wanutsimashqaqa wanushunchi, peru mana wanutsimashqaqa kawashunraqchi”.
5 Tsënö nirmi patsa ampir o tsakar* qallëkuptin siriu soldädukunapa campamentunman ëwayarqan. Peru chärirqa manam ni juk soldädullatapis tariyarqantsu.
6 Jehovä Dios permitiptinmi siriu soldädukunaqa wiyashqa kayarqan,+ cawallunkunawan y guërrapaq carrëtankunawan mëtsika soldädukuna pëkunata atacayänampaq ëwëkaqtanö. Tsëmi kënö niyarqan: “Israelpa gobernantinqa, hitïta gobernantikunata y egipciu gobernantikunatam qayatsimushqa atacamänapaq”.
7 Tsënö nirmi patsa ampinqan o tsakanqan* höra, cawallunkunata, ashnunkunata y imëkankunata campamentuchö dejaskir mantsakar ëwakuyarqan.
8 Lepra qeshyayoq nunakunaqa campamentuman chärirmi, juk carpaman* yëkur tariyanqankunata mikuyarqan y upuyarqan. Y pläta qellëta, öruta y röpakunatanam juk läduman apëkur pakäyarqan. Tsënöllam yapë juk carpaman yëkurir tsëchö tariyanqan cösaskunata juk läduman apëkur pakäyarqan.
9 Tsëpitanam yarpachakurir kënö ninakuyarqan: “Kikintsikllapaq aparqa mana allitam rurëkantsik. ¡Willakunantsikmi! Mana willakur patsa waranqanyaq quedakurqa castïgutam chaskishun. Jinan höra ëwashun gobernantita willanapaq”.
10 Tsëmi ëwarnin markapa punkunchö täpakoqkunata niyarqan: “Siriu soldädukunapa campamentunkunamanmi yëkuyarqö. Peru manam pitapis rikäyarqötsu. Cawallukunawan ashnukunallam watarëkäyan y carpankunapis* churayanqannöllam këkan”.
11 Tsënö willayaptinmi markapa punkunchö täpakoqkunaqa willakur musyatsikuyarqan, y gobernantipis musyarirqanmi.
12 Gobernantiqa paqas höra shärikurirmi yanapaqnin soldädukunata kënö nirqan: “Siriu soldädukunaqa musyayanmi mikunantsikpaq ni imapis mana kanqanta.+ Tsëmi campamentunkunaman ëwanantsikta pensar juk läduman churanakurir shuyëkämantsik. Ëwashqaqa llapantsikta prësuramarnintsikmi markantsikman yëkayämunqa”.+
13 Tsënam yanapaqnin soldäduqa nirqan: “Pitsqallana quedaq cawallukunata montakurkur soldädukuna rikapakarayämutsun. Alfin imanäshunraq soldädukunata wanutsiyaptimpis, Israelchöqa mëtsikaqnam wanuyashqa o wañuyashqa y quedaq kaqkunapis wanuyanqallam. Jinan höra mandashun rikapakayämunampaq”.
14 Tsëmi gobernantiqa soldädukunata mandarqan ishkë carrëtakunawan siriu soldädukunapa campamentunman rikapakoq ëwayänampaq.
15 Y rikapakoqkunaqa siriu soldädukunata ashirmi Jordan mayuyaq* ëwayarqan. Y mantsakar ëwarnin röpakunata y imëka cösaskunata entëru nänichö dejayanqantam tariyarqan. Tsënam kutïkur llapan rikäyanqanta gobernantita willayarqan.
16 Tsënam israelïtakunaqa siriu soldädukunapa campamentumpita llapan cösasninkunata apakuyarqan. Y Jehovä Dios ninqannömi, chusku kïlunö* alli aqashqa harina juk pläta qellë* cuestarqan, y puwaq kïlunö* cebädapis juk pläta qellë* cuestarqan.+
17 Gobernantiqa yanapaqnin soldädutam churashqa karqan markapa punkunta cuidanampaq. Peru nunakunaqa tanqanakur-raq yarqamurmi wanoqpaq jarukacharkuyarqan. Tsënömi cumplikarqan Diospa sirweqnin Eliseu ninqan.
18 Israelpa gobernantinta Diospa sirweqnin Eliseu ninqannömi cumplikarqan. Kënömi nishqa karqan: “Warë kë höranömi Samaria markapa punkunchö,+ chusku kïlunö* alli aqashqa harina juk pläta qellë* cuestanqa. Y puwaq kïlunö* cebädam juk pläta qellë* cuestanqa”.
19 Peru gobernantipa yanapaqnin soldädum kënö nishqa karqan: “Bendicimänapaq Jehovä Dios ciëlupa punkunta kichamuptimpis manachi tsënöqa kanmantsu”. Tsënam Eliseuqa kënö nishqa karqan: “Awmi, tsënö kanqantam rikanki, peru manam mikunkitsu”.
20 Tsënömi cumplikarqan Diospa sirweqnin Eliseu ninqan. Nunakunaqa tanqanakur punkupa yarqurmi wanoqpaq o wañoqpaq jarukacharkuyarqan.
Nötakuna
^ Hebreu idiömachöqa “1 sea” ninmi. Rikäri “Masllata musyanapaq” neqchö B14 kaqta.
^ Hebreu idiömachöqa “1 siclu” ninmi. Rikäri “Masllata musyanapaq” neqchö B14 kaqta.
^ Hebreu idiömachöqa “2 seas” ninmi. Rikäri “Masllata musyanapaq” neqchö B14 kaqta.
^ Kënöpis niyanmi: tutapar.
^ Kënöpis niyanmi: tutapanqan.
^ Kënöpis niyanmi: tolduman.
^ Kënöpis niyanmi: toldunkunapis.
^ Kënöpis niyanmi: riuyaq.
^ Hebreu idiömachöqa “1 sea” ninmi. Rikäri “Masllata musyanapaq” neqchö B14 kaqta.
^ Hebreu idiömachöqa “1 siclu” ninmi. Rikäri “Masllata musyanapaq” neqchö B14 kaqta.
^ Hebreu idiömachöqa “2 seas” ninmi. Rikäri “Masllata musyanapaq” neqchö B14 kaqta.
^ Hebreu idiömachöqa “1 siclu” ninmi. Rikäri “Masllata musyanapaq” neqchö B14 kaqta.
^ Hebreu idiömachöqa “1 sea” ninmi. Rikäri “Masllata musyanapaq” neqchö B14 kaqta.
^ Hebreu idiömachöqa “1 siclu” ninmi. Rikäri “Masllata musyanapaq” neqchö B14 kaqta.
^ Hebreu idiömachöqa “2 seas” ninmi. Rikäri “Masllata musyanapaq” neqchö B14 kaqta.
^ Hebreu idiömachöqa “1 siclu” ninmi. Rikäri “Masllata musyanapaq” neqchö B14 kaqta.