2 Rëyes 8:1-29
8 Juk kutim Eliseuqa kawaritsinqan wamrapa mamäninta kënö nirqan:+ “Jehovä Diosmi nimashqa mikuy mana kaptin kë markachö qanchis watapa mallaqë kanampaq.+ Tsëmi më naciontapis familiëkiwan ëwakuyänëki”.
2 Teyta Diospa sirweqnin tsënö niptinmi, warmiqa familianta pusharkur filisteukunapa+ nacionninkunata ëwakuyarqan. Y tsë nacionchömi qanchis watapa kawakuyarqan.
3 Qanchis wata pasariptinnam tsë warmiqa filisteukunapa nacionnimpita kutikamurqan. Y gobernantitam nirqan wayinta y chakrankunata kutitsiyänampaq.
4 Tsë warmi chänampaqqa, gobernantiqa Eliseupa sirweqnin Guehazïwanmi parlëkäyarqan. Kënömi nikarqan: “Eliseu imëka ruranqankunata willamë”.+
5 Tsëmi Guehazïqa willarqan wanushqa wamrata Eliseu imanö kawaritsinqanta.+ Tsë höram kawarimoq wamrapa mamänin gobernantiman chärirqan chakrankunata y wayinta kutitsinampaq rogakoq.+ Tsënam Guehazïqa nirqan: “Teyta, kë warmipaqmi willëkarqoq y Eliseu kawaritsimunqan wamrampis pëmi”.
6 Tsënam warmiqa gobernanti tapupaptin llapan pasanqanta willarqan. Tsëpitanam gobernantiqa tsë warmita yanapanampaq cortichö trabajaqta kënö nirqan: “Kë warmita llapanninta kutitsiyätsun y ëwakunqan watapita kananyaq chakranta muruyanqampitapis pagayätsun”.
7 Siria nacionpa gobernantin Ben-Hadad qeshyanqan witsanmi, Eliseuqa Damascu+ markata ëwarqan. Tsëta musyarirmi Ben-Hadadta+ kënö nir willayarqan: “Teyta Diospa sirweqninmi chämushqa”.+
8 Tsënam gobernantiqa yanapaqnin Hazaelta+ kënö nir mandarqan: “Qaranëkipaq imallatapis aparkur Diospa sirweqninman ëwë.+ Y Jehoväta tapumutsun qeshyäpita alliyänäpaq o mana alliyänäpaq kaqtapis musyanäpaq”.
9 Tsënö niptinmi Hazaelqa, cuarenta camëllukunawan allin kaq qarëkunata cargarkur Eliseu kaqta ëwarqan. Chärirmi kënö nirqan: “Siria nacionpa gobernantin Ben-Hadadmi papänintanö respetashunki, y willarinkish qeshyanqampita alliyänampaq kaqta o mana alliyänampaq kaqtapis”.
10 Eliseunam nirqan: “Awmi, qeshyampitaqa alliyanqam, ëwar willë. Tsënö kaptimpis Jehovä Diosmi nimashqa wanunampaq o wañunampaq kaqta”.+
11 Tsënö nirmi Hazaelta penqakunqanyaq rikararqan. Tsëpitanam Eliseuqa waqarqan.
12 Tsënam Hazaelqa Eliseuta tapurqan, “teytë, ¿imanirtan waqanki?” nir. Eliseunam nirqan: “musyämi israelïtakunata imanö sufritsinëkipaq kaqta.+ Murällayoq markankunatam ushakätsinki, mas allin ollqukunatam espädawan wanutsinki, wamrankunatam wanuyanqanyaq astanki y qeshyaq warmikunapa pachantam pishtar ushanki”.+
13 Hazaelnam nirqan: “Teytë, noqalläqa mana väleq allqunöllam kallä, ¿imanöraq tsëta rurëküman?”. Tsënam Eliseuqa nirqan: “Jehovä Diosmi willamashqa Siria nacionpa gobernantin qam kanëkipaq kaqta”.+
14 Tsënam Hazaelqa gobernanti kaqta kutikurqan. Chäriptinnam gobernantiqa, “¿imatan nishurqunki Eliseu?” nir tapurqan. Hazaelnam nirqan: “Alliyänëkipaq kaqtam nimashqa”.+
15 Waräninnam Hazaelqa juk colchata yakuman ushmarkatsir Ben-Hadadpa cäranta unëpa tsaparätsirqan,+ tsëmi shütëta mana puëdir wanurqan. Tsënö wanuskatsirmi kikin gobernar qallëkurqan.+
16 Acabpa tsurin Jehoram+ Israelchö pitsqa watapa gobernëkaptinmi, Jehosafatpa tsurin Jehoramqa+ papänin gobernëkaptinllaran Judächö gobernar qallëkurqan.
17 Pëqa treinta y dos watayoq këkarmi gobernar qallarqan. Y puwaq watapam Jerusalen markachö gobernarqan.
18 Y Acabpa wamranwan casakushqa karmi,+ Acabpa familiankunanö+ y Israelpa gobernantinkunanölla, Jehovä Diosta mana cäsukur imëka mana allikunata rurarqan.+
19 Tsënö kaptimpis, Jehovä Diosqa Davidtam änishqa karqan kastampita*+ Judächö imëpis gobernanti kanampaq.+ Tsëmi Judä nacionta ushakätsirqantsu.
20 Jehoram gobernanqan witsanmi, edomïta nunakunaqa Judä nacionpa podernimpita yarqurir+ kikinkuna juk gobernantita churayarqan.+
21 Tsëmi Jehoramqa guërrapaq carrëtankunawan Zair sitiuta ëwarqan. Tsënam edomïta soldädukuna y carrëtakunata manejaqpa mandaqninkunaqa atacayänampaq entëru lädumpa churanakuyarqan. Peru Jehoramqa paqaspam atacarqan y edomïta soldädukunatam vencirqan, tsëmi Edom soldädukunaqa mantsakar carpankunaman* ëwakuyarqan.
22 Edomïta nunakunaqa manam kananyaqpis Judä nacionpa poderninchötsu kayan. Tsë witsankunam Libnä+ nunakunapis Judä nacionpa podernimpita rakikäkuriyarqan.
23 Jehoram ruranqankunapitaqa Judächö gobernaqkunapaq willakoq librum masllata willakun.
24 Tsëpitanam Jehoramqa wanukurqan, y David Markamanmi+ pampayarqan. Tsënam tsurin Ocozïas+ gobernar qallëkurqan.
25 Acabpa tsurin Jehoram döci watapa Israelchö gobernëkaptinmi,+ Jehorampa tsurin Ocozïasqa Judächö gobernar qallëkurqan.
26 Veintidos watayoq këkarmi gobernar qallarqan. Y juk watapam Jerusalen markachö gobernarqan. Mamanqa Atalïa+ jutiyoq warmim karqan. Pëqa Israelpa gobernantin Omrïpa+ willkanmi karqan.
27 Ocozïasqa Acabpa+ familiankunanömi Jehovä Diosta mana cäsukur imëka mana allikunata rurarqan. Y papäninqa Acabpa familian warmiwanmi casakushqa karqan.+
28 Ocozïasmi Acabpa tsurin Jehoramwan juntakarkur Siria nacionpa gobernantin Hazaelwan pelyayänampaq Ramot-Galaad+ markata ëwayarqan. Y tsëchömi Jehoramta+ flëchawan chëkatsiyarqan.
29 Tsënam Jehoramqa Jezreel markata kutirqan+ alliyanqanyaq tsëchö quedakunampaq. Pëtaqa Siria nacionpa gobernantin Hazaelwan+ Ramä markachö pelyëkaptinmi soldädukuna flëchawan chëkatsiyarqan. Tsënö qeshyaptinmi Jehorampa tsurin Ocozïasqa, Acabpa tsurin Jehoramta watukanampaq Judäpita Jezreel markaman ëwarqan.
