2 Rëyes 9:1-37
9 Eliseum* Diospa juk willakoqninta qayëkur kënö nir mandarqan: “Tseqllëkita alli watarkur jinan höra kë järrachö aceitita aparkur Ramot-Galaad markata ëwë.+
2 Chärirna Nimsïpa willkan Jehüta+ ashinki. Pëqa Jehosafatpa tsurinmi. Soldädukunapa wakin mandaqninkunawanmi këkanqa, y chärir japallanta juk cuartuman pushanki.
3 Y peqanman o umanman aceitita jicharkur kënö ninki: ‘Jehovä Diosmi kënö nishunki: “Qamtam Israelpa gobernantin kanëkipaq churëkaq”’.+ Tsënö nïkur punkuta kicharir qeshpir ëwakunki”.
4 Eliseu tsënö mandaptinmi Diospa willakoqninqa ëwarqan Ramot-Galaad markata.
5 Chärirnam soldädukunapa mandaqninkunata tëkaqta tarirqan. Tsënam pëqa, “teytë capitan, jukta willanaqpaqmi urgenti shamurqö” nirqan. Y Jehünam, “¿mëqäkunata?” nirqan. Diospa willakoqninnam, “qamta willanaqpaqmi” nirqan.
6 Tsëmi Jehüwan ishkan cuartuman yëkuyarqan. Tsëchömi Jehüpa peqanman o umanman aceitita jicharkur kënö nirqan: “Israelpa Diosnin Jehovämi kënö nishunki: ‘Noqa Jehovämi qamta churëkaq Israelchö gobernanti kanëkipaq.+
7 Gobernanti Acabpa llapan familiankunatam wanutsinëki. Y Jezabeltapis wanutsinëkim, pëmi noqa Jehoväpa sirwimaqnïkunata y willakoqnïkunata wanutsirqan.+
8 Acabpa kastampita llapan ollqukunatam ushakätsinëki, hasta mana väleq ollqukunatapis.+
9 Nebatpa tsurin Jeroboanpita+ y Ahïyapa tsurin Baasäpa+ kastankunata ushakätsinqänöllam, Acabpa kastankunatapis ushakätsishaq.
10 Jezabelpa ayantaqa Jezreel+ chakrachömi allqukuna mikuyanqa y manam pillapis pampanqatsu’”. Tsënö nïkurmi Diospa willakoqninqa punkuta kicharir qeshpir ëwakurqan.+
11 Jehü kutiriptinnam tëkaq nunakunaqa, “¿imaqtan tsë löcu shamushqa? ¿Ima nishurqunkitan?” nir tapuyarqan. Jehünam, “qamkunaqa musyayankim tsë nunakuna imanö kayanqanta y imatapis lluta parlayanqanta” nirqan.
12 Tsënam pëkunaqa niyarqan: “¡Ama tsënö niyämëtsu! Rasumpa kaqta willayämë”. Tsënö niyaptinmi Jehüqa willarqan: “Tsëkunata niramarmi kënö nimashqa: ‘Jehovä Diosmi kënö nishunki: “Qamtam Israelchö gobernanti kanëkipaq churëkaq”’”.+
13 Tsënö niriptinmi escalon kaqchö këkaptin,+ llapankuna chakin kaqman röpankunata mashtayarqan. Y waqrapita trompëtata tocarmi, “¡kananqa Jehünam gobernaq yëkurishqa!” nir kushikuyarqan.+
14 Tsënam Jehosafatpa tsurin Jehüqa,+ gobernanti Jehorampa contran tikrarqan. Jehüqa Nimsïpa willkanmi karqan.
Jehoramqa Ramot-Galaad+ markachömi llapan israelïta soldädukunawan, Siria nacionpa gobernantin Hazaelwan+ guërrachö kashqa kayarqan.
15 Y siriu+ soldädukuna flëchawan chätsishqa kayaptinmi, Jehoramqa alliyänampaq Jezreel markata kutishqa karqan.+
Jehünam tsëchö këkaqkunata nirqan: “Noqata yanapayämëta munarqa, kë markapita pillapis yarqunanta dejayëtsu, sinöqa Jezreel markata ëwarmi willakunqa”.
16 Tsëpitanam Jehüqa guërrapaq carrëtanwan Jezreel markata ëwarqan. Jehoramqa guërrachö flëchashqa kayaptinmi qeshyarnin cämachö jitarëkarqan. Y Judäpa gobernantin Ocozïaspis tsëchömi këkarqan watukaq ëwashqa karnin.
17 Jehütawan yanapaqninkunata rikëkurmi, Jezreel markachö täpakoqqa, “atskaq nunakunam shamuykäyan” nir willakurqan. Tsënam Jehoramqa nirqan: “Juk soldäduta mandë cawalluta montakurkur ëwanampaq y kënö tapumutsun: ‘¿Amïgükuna karku o conträkuna karku shamuykanki?”.
18 Tsëmi soldäduqa cawallun montakurkur taripaqnin ëwarqan y chärirnam kënö nir tapurqan: “Gobernantim nin: ‘¿Amïgükuna karku o conträkuna karku shamuykanki?’”. Jehünam, “¿imanirtan tsëta tapumanki? Qepäkunaman churakärir upällalla shamuy” nirqan.
Tsënam täpakoqqa kënö nir willakurqan: “Ëwaq soldäduqa pëkunaman chashqam, peru manam kutimushqatsu”.
19 Tsënam Gobernantiqa cawallun montashqata juk soldädu masta mandarqan. Y Jehüman chärirnam kënö tapurqan: “Gobernantim nin: ‘¿Amïgükuna karku o conträkuna karku shamuykanki?’”. Jehünam, “¿imanirtan tsëta tapumanki? Qepäkunaman churakärir upällalla shamuy” nirqan.
20 Tsënam täpakoqqa kënö nir willakurqan: “Ëwaq soldäduqa pëkunaman chashqam, peru manam kutimuntsu. Y carrëtata manejar shamoqqa Nimsïpa willkan Jehünömi, löcunöraq manejar shamuykan”.
21 Tsënö niptinmi Jehoramqa, “jinan höra guërrapaq carrëtata alistayämuy” nir mandakurqan. Alistariyaptinnam, Israelpa gobernantin Jehoramqa Judäpa gobernantin Ocozïaswan+ cada ünu carrëtankunawan ëwayarqan. Y Jehüwanqa tinkuyarqan Jezreelchö Nabotpa+ chakran kaqchömi.
22 Jehüwan tinkurirnam Jehoramqa nirqan: “Jehü, ¿amïgü karku o conträ karku shamuykanki?”. Tsënam pëqa nirqan: “¿Amïguyki kar shamunqätaku pensanki? ¿Manaku mamëki Jezabel+ jukwan jukwanraq kakun* y brüjukuna rurayanqanta rurëkan?”.+
23 Tsënö niptinmi Jehoramqa qeshpir ëwakunampaq tsë höra tumarirqan y Ocozïastam, “¡wanutsimänapaqmi shamushqa!” nirqan.
24 Tsënam Jehüqa Jehoramta flëchawan, waqtampa flëchëkurqan. Shonqumpa flëcha pasariptinmi, Jehoramqa carrëtanchö ishkirir wanurirqan.
25 Tsëpitanam Jehüqa, Bidcar jutiyoq yanapaqnin soldäduta nirqan: “Jezreelïta Nabotpa+ chakranman tsë ayata jitarkuy. ¿Yarpankiku Acabpa qepanta carrëtata manejar ëwanqantsikta? Tsë kutim Jehovä Diospa willakoqninqa Jehorampa papänin Acabta kënö nirqan:+
26 ‘Jehovä Diosmi kënö nishunki: “Qanyan wanutsinqëki Nabotpa y tsurimpa yawarnintam rikarqö,+ tsëmi qamtapis tsë chakrallachö castigashqëki”+ tsëtam Jehovä nin’. Tsëmi kananqa Jehovä Dios ninqannö, Nabotpa chakranman tsë ayata jitarkunëki”.+
27 Tsëta rikëkurnam Judäpa gobernantin Ocozïasqa+ jatun kaq huerta* nänipa qeshpir ëwakurqan. (Tsëpitanam Jehüqa qatiparnin Ibleam+ markapa amänun Gurman witsëkaqta tariparqan. Y “¡pëtapis wanutsiyë!” nir mandakuptinmi flëchawan chëkatsiyarqan. Ocozïasqa Meguidö markayaqmi qeshpir ëwakurqan, y tsëchömi wanurqan o wañurqan.
28 Tsënam sirweqninkunaqa, carrëtawan Jerusalen markaman aparnin familiankuna pamparäyanqan David Markachö sepultüranman pampayarqan.+
29 Acabpa tsurin Jehoram onci watana Israelchö gobernëkaptinmi Ocozïasqa+ Judächö gobernar qallarqan).
30 Tsëpitam Jehüqa Jezreel+ markaman ëwarqan. Tsëchöna këkanqanta musyëkurmi Jezabelqa+ nawinta yanaman pintarkur y aqtsanta shumaq adornarkur ventänapa qawarkamurqan.
31 Y markapa punkumpa Jehü yëkuykaptinmi Jezabelqa, “¿yarpankiku gobernantita wanutseq Zimrïta ima pasanqanta?” nirqan.+
32 Tsëpitanam Jehüqa ventänaman rikarkur, “¿pillapis tsëchö kanku yanapamänampaq”?+ nir qayakurqan. Tsënö niptinmi cortichö trabajaq ishkaq o kimaq nunakunaqa ventänapa rikarkayämurqan.
33 Jehünam, “¡tsë warmita jitarpayämuy!” nirqan. Tsënam warmita jitarpayämuptin, yawarninqa perqamampis y cawallukunamampis pillchirqan.* Y Jehüqa aya janampam cawallunkunatawan carrëtanta pasaratsirqan.
34 Tsëpitanam mikoq y upoq ëwarqan. Rätuntanam kënö nirqan: “Taqë maldicishqa warmiqa gobernantipa tsurinmi,+ ëwar pampëkuyë”.
35 Peru pampaq ëwaqkunaqa chakinta, rikranta y peqanllatanam o umanllatanam tariyarqan.+
36 Y kutirnin willayaptinnam Jehüqa kënö nirqan: “Kananmi cumplikan Jehovä Dios ninqanta+ tisbïta Elïas willakunqan. Pëmi kënö willakurqan: ‘Jezreel chakrachömi+ Jezabelpa ayantaqa allqukuna mikuyanqa.
37 Y Jezreel chakrachömi Jezabelpa ayanqa wanuman tikranqa. Tsënöpam nunakunaqa, “këmi Jezabel” niyanqatsu’”.
Nötakuna
^ O “Diospa willakoqnin”.
^ O “santukunata adorëkan”.
^ Hebreu idiömachöqa “huerta wayi” ninmi.
^ Kënöpis niyanmi: chispiarqan.
