2 Corintius 12:1-21
12 Alabakunämi. Mana imata jorqunä kaptimpis, suëñuchönö rikäyanqampaq+ y Señorpita revelacionkunapaqmi parlamushaq.+
2 Cristuwan juknölla këkaq nunatam reqï, pëqa catorci wata qepatam kima kaq ciëluman apashqa karqan, cuerpunchö këkar o mana cuerpunchö këkar kanqantaqa manam musyätsu, tsëtaqa Teyta Diosllam musyan.
3 Awmi, tsë nunataqa reqïmi, cuerpunchö këkar o mana cuerpunchö këkar kanqantaqa manam musyätsu, tsëtaqa Teyta Diosllam musyan, pëqa
4 shumaq patsamanmi apashqa karqan, y parlëta mana puëdina y pï nunapis parlëta mana puëdinqan palabrakunatam wiyarqan.
5 Tsë nunapitam alabakushaq, peru kikïpa cäsuchöqa imachöpis pishipanqällapitam alabakushaqtsu.
6 Alabakuyta munarpis, rasumpa kaqllata parlarmi juiciunnaqtsu käman. Peru manam tsëtaqa rurätsu, tsënöpa pï nunapis noqachö rikanqampita o imatapis ninqäpita masqa mana alabamänampaq,
7 sinöqa alläpa shumaq revelacionkunata chaskinqällapita.
Mana orgullösu kanäpaqmi, cuerpüchö kasha tukshimaptinnö sufrikä,+ tsëqa mana orgullösu kanäpaq Satanaspa angelnin sufritsimar* këkanqanmi.
8 Kima kutim Señorta rogakurqä tsëta ushakätsinampaq.
9 Peru pëqa kënömi nimarqan: “Qamwan alläpa alli kanqäqa tsëllapaqnam. Imachöpis pishipaqkunachömi podernïqa cläru rikakun”.*+ Tsëmi Cristupa podernin carpa* wayi cuenta noqachö imëpis këkänampaq, imachöpis pishipanqäpita alabakushaq.
10 Tsëmi Cristurëkur imachöpis pishipanqäpita, insultayämanqampita, faltapakunqäpita, chikimar imëkata rurayämanqampita y imëka mana allikunata pasanqäpita kushikushaq. Awmi, imachöpis pishipanqä höram kallpayoq tikrarï.+
11 Juiciunnaqmi tikrarqö y qamkunam tsëman chätsiyämarqunki. Noqaqa mana ima karpis, manam imachöpis “alli apostolnikikunapita” mënustsu karqö, tsënö kaptimpis, qamkunaqa manam noqapa favornï allita parlayarqunkitsu.+
12 Rasumpa kaqchöqa, imëkata aguantanqächö, milagrukunata ruranqächö, imëka espantëpaqkunata ruranqächö+ y espantëpaq milagrukunata ruranqächömi* apostol kanqäta rikätsiyarqoq.+
13 Tsëqa, ¿imachötan wakin congregacionkunachö kaqkunapita mënuspaq churashqa kayarqunki? ¿Qamkunata imatapis mana mañakushqa kaptïku?+ Tsëta rurar mana allita ruranqäpita perdonëkayämë.
14 Rikäyë, kananwanqa kima kutinam qamkunaman shamunäpaq listu këkä, y manam imachöpis afanatsiyashqëkitsu. Noqaqa manam imëkëkikunatatsu ashikä,+ sinöqa qamkunatam. Awmi, manam wamrakunatsu papäninkunapaq imatapis juntayan,+ sinöqa papäkunam wamrankunapaq imatapis juntayan.
15 Noqaqa kushishqam llapan imëkäta ushashaq, y qamkunarëkurmi* llapan puëdinqäta rurashaq.+ Qamkunata tsëläya kuyëkäyapteqqa, ¿imanirtan qamkunaqa tsënötsu kuyayämanki?
16 Imanö kaptimpis, manam qamkunata afanatsiyarqoqtsu.+ Tsënö kaptimpis qamkunaqa, “sabïdu” kanqäta y “trampakunawan” engañayanqaqtam* niyanki.
17 ¿Qamkunaman mandamunqä kaqkunawanku imëllapis qamkunapita provechakurqö?
18 Tïtutam qamkunaman shamunampaq rogarqä y pëwanmi juk wawqita mandamurqä. ¿Imanöllapis Tïtuqa qamkunapita provechakurqanku?+ ¿Manaku llapäkunapis tsë pensëyoqllam kayarqä? ¿Manaku llapäkunapis pë ruranqannöllam rurayarqä?
19 ¿Qamkunachö defendikur tsëkunata qellqamunqätaku creiyanki? Noqakunaqa Cristuwan juknölla karmi Teyta Diospa rikëninchö tsëkunata nikäyä. Tsënö kaptimpis, kuyë wawqikuna y panikuna, llapan rurayanqätaqa qamkuna alli kayänëkipaqmi rurayä.
20 Peru qamkunaman shamuptï, imallachöpis munanqänö mana kayänëkita y noqapis munayanqëkinö mana kanätam mantsä, tsëpa rantinqa, capaz pelyar këkaqta, chikinakur këkaqta, cölerakur këkaqta, discutir këkaqta, calumnianakur këkaqta,* jukkunapa wasan rimar këkaqta, allish tukur këkaqta y pleytur këkaqta tariyashqëki.
21 Qamkunaman yapë shamuptïqa, capaz Teyta Diosnï puntëkikunachö penqakatsimanqa, y capazchi unëna jutsata* ruraqkuna, melanëpaqkunata rurayanqampita, oqllanakur melanëpaqkunata rurayanqampita,* mana penqakur mana allikunata rurayanqampita* manaraq arrepentikushqa kayaptin llakikushaq.
Nötakuna
^ O “maqamar”.
^ O “mas alliyan”.
^ Kënöpis niyanmi: toldu.
^ Griëgu idiömachöqa “espantakuypaq rurëkunachömi” ninmi.
^ O “almëkikunarëkurmi”. Rikäri “Bibliachö palabrakunata entiendinapaq” neqta.
^ Kënöpis niyanmi: engañanqätam.
^ O “pakëllapa jukkunapaq mana allita parlar këkaqta”.
^ Kënöpis niyanmi: pecäduta.
^ Griëgu idiömachö: pornëia. Rikäri “Bibliachö palabrakunata entiendinapaq” neqta.
^ Griëgu idiömachö: aselguëia. Rikäri “Bibliachö palabrakunata entiendinapaq” neqta.
