2 Corintius 13:1-14
13 Kananwanqa kima kutinam qamkunaman shamunäpaq alistakü. “Ishkaq o kimaq willakuyanqanwanmi* ima asuntupis cläru quedanan”.+
2 Kanan tsëchö mana këkarpis, ishkë kutipana tsëchö këkaqnömi këkä. Tsëmi unë jutsata* ruraqkunata y wakinkunata puntallapitana niyaq,* qamkunaman yapë shamuptïqa corregiyänaqpita mana salvakuyänëkipaq kaqta.
3 Qamkunaqa Cristu noqawan parlapëkäyäshunqëkita rikätsikoq pruëbatam ashikäyanki. Pëqa manam imanö tratayäshunqëkichö mana puëdeq kanqantatsu rikätsikun, sinöqa alläpa puëdeq kanqantam rikätsikun.
4 Rasunmi pëqa nunakunanö dëbil këkarmi qeruchö wanurqan, peru kananqa Diospa poderninrëkurmi kawëkan.+ Tsënöllam noqakunapis pënö dëbil këkäyä, peru qamkunachö këkaq Diospa poderninwanmi+ pëwan juntu kawayäshaq.+
5 Creikuyanqëkichö imanö këkäyanqëkita imëpis alli rikäyë. Imanö këkäyanqëkita imëpis rikëkäyë.+ ¿O manaku cuentata qokuyanki Jesucristu qamkunawan juknölla këkanqanta? Tsënö kaptimpis, Teyta Diospa rikëninchö mana alli kayaptikiqa, manam Cristu qamkunawan juknöllatsu kanqa.
6 Noqaqa Diospa rikëninchö alli këkäyanqäta cuentata qokuyänëkitam munä.
7 Teyta Diostam mañakuyä ima mana allitapis mana rurayänëkipaq. Tsëtaqa mañakuyä, manam allita ruraqnö rikashqa kayänäpaqtsu, sinöqa noqakuna mana allita ruraqnö rikashqa kayaptïpis, qamkuna alli kaqta rurayänëkipaqmi.
8 Awmi, rasumpa kaqpa contranqa manam ima rurëta puëdiyätsu, sinöqa rasumpa kaqpa favorninllam.
9 Noqakuna mana alli këkarpis qamkuna alli këkäyaptikiqa, rasumpam alläpa kushikuyä. Yapë alli kaqta rurayänëkipaqmi* imëpis mañakuyä.
10 Tsëmi manaraq qamkunawan këkar tsëkunata qellqamü. Tsënömi qamkunawan këkarqa Señorpita chaskinqä carguyoq kanqarëkurqa manam mana allipa tratayashqëkitsu,+ tsëpa rantinqa, qamkunata ushakätsiyänaqpa* rantinmi alli kayänëkipaqmi yanapayashqëki.
11 Usharinapaq wawqikuna y panikuna, sïguiyë kushikur, imanö pensayanqëkita corregir, yanapayäshunëkita permitir,+ juknölla pensar+ y yamë kawakur,+ tsëqa kuyakoq y yamë kë kananta munaq Teyta Diosmi+ qamkunawan këkanqa.
12 Jukniki juknikikuna limpiu shonquykikunawan cärachö mutsanakur saludanakuyë.
13 Llapan limpiu nunakunam qamkunapaq salüdunkunata apatsikayämun.
14 Señor Jesucristu qamkunawan alläpa alli këkutsun, Teyta Dios qamkunawan kuyakoq këkutsun y imëkachö yanapayäshoqninki santu espïritu llapëkichö këkätsun.
Nötakuna
^ O “testïgukuna willakuyanqanwanmi”.
^ Kënöpis niyanmi: pecäduta.
^ Kënöpis niyanmi: nï.
^ O “Imanö pensayanqëkita corregiyänëkipaqmi”.
^ Kënöpis niyanmi: ushakätsinäpa.