2 Corintius 2:1-17
2 Yapë shamur qamkunata mana llakitsiyänaqpaqmi* decidirqö.
2 Qamkunata llakitsiyapteqqa,* llakitsinqä kaqkuna mana karqa, ¿piraq kushitsimanqa?
3 Qellqamunqätaqa qellqamurqä, shamuptï kushikuyänëkipaq kaqpita mana llakikunäpaqmi. Noqaqa segürum këkä, kushitsimanqankuna qamkunatapis kushitsiyäshunqëkita.
4 Sufrimientupa pasar y shonqüchö llakishqa karmi, qamkunaman waqar qellqamurqä. Peru tsëtaqa manam llakishqa kayänëkipaqtsu rurarqä,+ sinöqa alläpa kuyayanqaqta musyayänëkipaqmi.
5 Peru pillapis llakitsiyäshurnikiqa, manam noqallatatsu llakitsimashqa,+ sinöqa imallachöpis llapëkitam llakitsiyäshurqunki, tsënöpa ninqäwan alläpa mana llakikuyänëkipaq.
6 Tsë nunataqa allinam cäsi llapëki corregiyarqunki.
7 Kananqa alläpa llakikur kallpachakuyta mana dejanampaqmi,*+ llakipar* perdonëkuyänëki y shoqayänëki.+
8 Tsëmi consejayaq kuyayanqëkita cläru musyatsiyänëkipaq.+
9 Y kërëkurmi qamkunaman qellqamurqö: llapanchö cäsukoq o mana cäsukoq kayanqëkita musyanäpaq.
10 Jukkunata imatapis perdonayaptikiqa, noqapis pëta perdonämi. Rasumpa kaqchöqa, imapitapis perdonanqäqa, imallatapis perdonashqa kaptïqa, qamkunapa biennikikunapaqmi Cristupa rikëninchö rurarqö,
11 tsënöpa Satanas mana engañamänapaq.*+ Awmi, imakunata ruranqantaqa* manam mana musyaqtsu kantsik.+
12 Cristupita alli noticiakunata willakunäpaq Tröasman+ char y Señorpa kaqchö masta rurëta puëdirqä,*
13 wawqï Tïtuta mana tarirmi shonqüchö* tranquïlutsu karqä.+ Tsëmi despidikur Macedoniata ëwakurqä.+
14 ¡Teyta Diostam agradecikuntsik! Pëqa Cristutawan juntum guërrata ganar kushishqa kutimoq soldädukunatanö pushamantsik y noqantsikwanmi shumaq pukutaq o mushkoq perfümitanö pëpita musyëta mëtsëman chëkätsin.
15 Salvashqa këkaqkunata* y ushakëman ëwëkaqkunata* Cristupita willaqkunaqa, shumaq pukutaq o mushkoq perfüminömi Teyta Diospaq këkantsik.
16 Ushakëman ëwëkaqkunapaqqa wanuynömi pukutan o mushkun, y pëkunatam wanuyman chätsin,+ y salvashqa këkaqkunapaqqa kawënömi pukutan y pëkunatam kawëman chätsin. ¿Y pitan tsëkunata ruranampaq listu këkan?
17 Noqakunam. Noqakunaqa manam mëtsika nunakunanötsu Diospa palabranta rantikur puriyä.*+ Tsëpa rantinqa, Teyta Dios mandayämashqa kaptinmi, Cristupa qateqnin kar Teyta Diospa rikëninchö rasun kaqllata parlayä.
Nötakuna
^ Kënöpis niyanmi: llakitsinäpaqmi.
^ Kënöpis niyanmi: llakitsiptïqa.
^ O “alläpa llakikuy mana nitirinampaqmi”.
^ Kënöpis niyanmi: ankupar; kuyapar.
^ O “noqantsikpita mana provechakunampaq”.
^ O “logrëta munanqantaqa”.
^ O “masta ruranäpaq punku kichakämurqan”.
^ Griëgu idiömachöqa “espïritüchö” ninmi.
^ O “Salvacionman ëwëkaqkunata”.
^ O “wanuykaqkunata”.
^ O “negociar puriyä; Diospa palabranwan qellëta ganayä”.
