2 Corintius 6:1-18
6 Pëpaq trabajarmi,+ noqakunapis rogayaq Teyta Dios qamkunawan alläpa alli kanqanta rikashqa këkar, munanqanta rurëta mana dejayänëkipaq.+
2 Pëmi kënö nin: “Alli tiempuchömi qamta wiyarqaq y salvacion junaqmi qamta yanaparqaq”.+ ¡Imëpitapis masqa kananmi alli tiempuqa! ¡Kananmi salvacion junaqqa!
3 Manam pitapis ishkitsiyänäpaqqa imatapis rurëkäyätsu, tsënöpa Teyta Diospaq rurayanqächö ima mana allitapis mana tariyänampaq.+
4 Tsëpa rantinqa, llapan rurayanqächömi Teyta Diospa sirweqnin kayanqäta rikätsikuyä:+ sufrimientukunapa pasar alli tsarakuyanqächö, imatapis faltapakuyanqächö, imëka mana allikunapa pasayanqächö,+
5 maqashqa kayanqächö, prësuyämanqanchö,+ nunakuna conträkuna kayanqanchö, alli trabajayanqächö, paqaspa mana punuyanqächö, höra höra mana mikuyanqächö;+
6 limpiu shonquyoq kayanqächö, musyayanqämannö portakuyanqächö, pacienciayoq+ y alli nuna kayanqächö,+ santu espïritu pushayämanqannö kawayanqächö, janan shonqulla mana kuyakuyanqächö,+
7 rasumpa kaqllata parlayanqächö, Teyta Diospa poderninman confiakuyanqächö+ y derëcha* y izquierda* makïkunachö allita rurayänäpaq yanapakoq armakunata katsiyanqächö;+
8 alabayämanqan tiempuchö y mana allipa rikäyämanqan tiempuchö, alli rikashqa kar o mana alli rikashqa karpis. Rasumpa kaqllata parlayaptïpis engañakoqtanömi rikäyäman,
9 alli reqikäyämarpis mana reqishqatanö, kawëkäyaptïpis wanuykaqtanö,*+ mana wanutsiyämashqa këkäyaptimpis castigashqatanö,*+
10 imëpis kushishqa këkäyaptïpis llakishqatanö, mëtsikaqta rïcuyëkätsiyaptïpis waktsatanö y imëkayoq këkäyaptïpis mana imayoqtanö.+
11 Corintu nunakuna, qamkunata parlapäyänaqpaqmi shimïkunata kichayarqö* y qamkunatam alläpa kuyayaq.*
12 Noqakunaqa kuyayanqaqtam rikätsiyarqoq,*+ peru qamkunaqa manam kuyayämanqëkita rikätsiyämarqunkitsu.
13 Tsëmi tsurïkunatanö parlapäyarniki qamkunata niyaq,* kuyayanqaqnölla kuyayämänëkipaq y shonqupita mas kuyayämänëkipaq.+
14 Ama mana creikoqkunawan juntakäyëtsu.*+ Awmi, ¿imachötan allita rurë mana allita rurëwan igualan?+ ¿O imachötan aktsiwan ampi o tsakë* igualayan?+
15 Tsëpitapis masqa, ¿imachötan Cristuwan Satanas* igual kayan?+ ¿O imachötan creikoqkuna* mana creikoqkunawan igualayan?+
16 ¿Imatataq santukuna rurayanman Teyta Diospa templunchö?+ Noqantsikmi kawëkaq Diospa templun kantsik,+ Teyta Dios kënö ninqannö: “Noqaqa pëkunawanmi kawashaq+ y pëkunawanmi këkäshaq, y noqam Diosninkuna kashaq, y pëkunam sirwimaqnïkuna kayanqa”.+
17 Teyta Jehovämi* kënö nin: “‘Tsëqa pëkunapita witikuyë y rakikäyë, y mana limpiu kaqkunata ama yatayënatsu’”,+ ‘“noqam chaskiyashqëki’”.+
18 “‘Y noqam teytëkikuna kashaq,+ y qamkunam ollqu tsurïkuna y warmi wamräkuna kayanki’+ ninmi Llapanta Puëdeq Teyta Jehovä”.*
Nötakuna
^ Capazchi defendikuyänampaq.
^ Capazchi pelyayänampaq.
^ O “wanutsiyänampaq kaqkunatanö”.
^ O “corregishqatanö”.
^ O “qamkunataqa clärum parlapäyarqoq”.
^ O “shonqükunatam qamkunapaq kichayarqö”.
^ O “qamkunata kuyayänaqpaqqa shonqükunachö sitiu kanmi”.
^ Kënöpis niyanmi: nï.
^ O “tsullan tsullan yügushqanö kayëtsu”.
^ Kënöpis niyanmi: tutapë.
^ O “Teyta Diosta mana dejëpa sirweqkuna”.
^ O “Belial”. Tsë jutiqa, hebreu idiömachö “mana imapaqpis sirweq” ninan palabrapitam shamun. Tsënö nirqa Satanaspaqmi parlëkan.
