2 Samuel 1:1-27
1 Saul wanuriptinmi, Davidqa amalequïtakunata pelyachö ganaskir, Ziclag+ markachö ishkë junaq quedakurqan.
2 Waränin junaqnam Saulpa campamentumpita juk soldädu röpampis rachishqa y allpallana peqanwan o umanwan David kaqman charqan, y patsamampis urkun chanqanyaqmi qonqurikurqan.
3 Tsënam Davidqa, “¿mëpita shamuykanki?” nir tapurqan. Pënam, “israelïtakuna pelyëkäyanqan sitiupitam qeshpir ëwakamurqö” nirqan.
4 Tsënam Davidqa, “¿imatan pasakushqa?, willamë” nirqan. Pënam nirqan: “Israelïta soldädukunam guërrapita qeshpir ëwakuyashqa y mëtsikaqmi wanuyashqa o wañuyashqa. Saulwan tsurin Jonatanpis wanuyashqam”.+
5 Tsënam Davidqa, “¿imanöpatan musyanki Saulwan tsurin Jonatan wanuyanqanta?” nir tapurqan.
6 Tsënam soldäduqa nirqan: “Guilboa+ jirkachö këkarmi Saulta rikarqä lanzanman tanupakushqa o tukmakushqa këkaqta. Y filisteu soldädukunaqa guërrapaq carrëtankunawan y cawallunkunawanmi pë kaqman chëkäyarqanna.+
7 Tsënam Saulqa rikäramar qayamarqan. Tsëmi, ‘imallachötan yanapaq’ nirqä.
8 Pëqa, ‘¿pitan kanki?’ nirmi tapumarqan. Noqanam, ‘amalequïtam+ kä’ nirqä.
9 Tsënö niptïnam, ‘kanan höra wanuratsimë, manam sharkuytapis puëdïnatsu, alläpam sufrikä’ nimarqan.
10 Tsëmi sufrirnin jitarëkaqta y wanunëkaqta rikar juklla wanuskatsirqä.+ Y corönantawan rikranchö adornuntam qampaq apamurqö”.
11 Tsënö willëkuptinmi Davidqa llakikur röpanta rachirqan, y yanapaqninkunapis tsënöllam rurayarqan.
12 Saulta, tsurin Jonatanta, Jehovä Diospa sirweqninkunata y llapan israelïtakunata+ espädawan wanutsishqa kayaptinmi alläpa waqayarqan, y patsa tardiyanqanyaqmi imatapis mikuyarqantsu.+
13 Tsëpitanam Davidqa, “¿më nunatan kanki?” nir tsë soldäduta tapurqan. Pënam, “amalequïta nunapa tsurinmi kä, israelïtakunapa markanchömi täkü”* nirqan.
14 Davidnam, “¿imanirtaq wanutsirqunki Jehovä Dios akranqan gobernantita?” nirqan.+
15 Tsë höram Davidqa juk yanapaqninta, “taqë soldäduta wanutsi” nirqan. Tsënam yanapaqninqa wanuskatsirqan.+
16 Y manaraq wanutsiptinmi Davidqa kënö nishqa karqan: “Kikikim, ‘noqam wanutsirqö Jehovä akranqan gobernantita’ nir parlarqunki. Tsënöpam wanuyta ashirqunki”.+
17 Tsëpitanam Davidqa, Saulwan tsurin Jonatan wanuyanqampita llakikur juk cancionta cantarqan.+
18 Y Judä nunakunata yachatsiyänampaqmi nirqan. Kë canciontaqa “Arcu” nirmi jutin churarqan. Jasar+ libruchömi qellqarëkan, kënömi nin:
19 “¡Allaw Israel! Jirkëkikunachömi+ puëdeq nunakuna ushakäyashqa.
¡Puëdeq këkarpis wanuyashqam!
20 Ama Gat+ markachö tsëta musyayätsuntsu,Asquelon markapa cällinkunachöpis ama parlayätsuntsu.
Tsëta musyaskirqa filistëa warmikunam kushikuyanqa,tsë filistëa warmikunam fiestata kushishqa rurayanqa.
21 Guilboa+ jirkakunachöqa,ama tamyatsunnatsu ni shullyapis* katsunnatsu,ni chakrakunapis ama imatapis wayutsunnatsu.+
Tsë jirkachömi alli pelyaqkunapa escüdunkuna penqakuypaq quedashqa,y Saulpa escüdumpis mananam aceitiwan chipapannatsu.
22 Jonatanpa flëchanqa imëpis yawartam jichaq,+y alli pelyaqkunapa ëtsantam pasaq.
Saulpa espädanqa pelyachö vencirninran kutimoq.+
23 Saultawan Jonatantaqa+ nunakuna kuyayarqanmi,pëkunaqa manam wanurpis rakikäyashqatsu.+
Pichakpitapis* mas lijërum kayarqan,+leonkunapitapis mas kallpasapam kayarqan.+
24 Saulmi wanushqa, Israel warmikuna waqayë,pëmi adornashqa chipapëkaq puka röpakunata vistitsiyäshurqëki,röpëkikunamanmi örupita adornukunata churamurqan.
25 ¡Valienti soldädukunam guërrachö wanuyashqa!
¡Jonatanqa jirkachömi wanushqa!+
26 Wawqillä Jonatan, qampaqmi llakikü,qamtaqa alläpam kuyarqaq.+
Juk warmi qowanta o runanta* y wawanta kuyanqampitapis masmi qamqa kuyamarqëki.+
27 ¡Valientikunam guërrachö wanuyashqa,llapan armankunapis ushakashqam!”.
Nötakuna
^ Kënöpis niyanmi: tärä; pärä.
^ Kënöpis niyanmi: shullapis; shushalpis; shushapis.
^ Kënöpis niyanmi: Ankapitapis; Pichakapitapis.
^ Kënöpis niyanmi: ollqunta.
