2 Samuel 11:1-27
11 Cada wata qallaptinmi* gobernantikunaqa juk markakunaman pelyaq ëwayaq, tsëmi Davidqa Joabta, llapan soldädukunata y wakin sirweqninkunata mandarqan ammonïtakunata ushakätsiyänampaq. Pëkunaqa ëwëkurmi Rabä markapa+ entëru lädunman churanakuyarqan. Peru Davidqa Jerusalen+ markachömi quedakurqan.
2 Juk kutim Davidqa pununqampita shärikurir tardi höra palaciun jananchö purikarqan, y tsëchö purikarmi, juk shumaqllan warmi bañakuykaqta rikärirqan.
3 Tsënam Davidqa mandakurqan tsë warmi pï kanqanta musyayämunampaq, y musyaq ëwaqkunanam, “pëqa Eliampa+ tsurin y hitïta+ Urïaspa+ warmin Bat-Sebam”+ nir willayarqan.
4 Tsënam Davidqa wayinman pushayänampaq mandakurqan,+ y chäratsiyaptinnam tsë warmiwan punurqan.*+ Tsëpitanam warmiqa wayinta kutikurqan. (Tsëqa pasarqan Ley mandakunqannö limpiu kanampaq bañakuykaptinmi).*+
5 Tsëpitanam warmiqa qeshyaq tikrashqa kanqanta musyarir, Davidta willayänampaq mandakurqan.
6 Willariyaptinnam, Davidqa Joabta kënö willayänampaq mandakurqan: “Hitïta Urïasta mandamuy”. Tsëmi Joabqa Urïasta mandarqan.
7 Urïas chäriptinnam, Davidqa tapuparqan Joabwan soldädukuna guërrachö imanö këkäyanqanta.
8 Tsëpitanam Davidqa, “wayikita ëwë jamapänëkipaq” nir Urïasta mandarqan. Yarquriptinnam, Davidqa qarëkunata apatsirqan.
9 Peru Urïasqa wayinta ëwanampa rantinmi, palaciuchö täpakoq soldädukunawan quedakurqan.
10 Tsënam Davidta willayarqan Urïas wayinta mana ëwashqa kanqanta. Tsëmi Davidqa Urïasta qayëkurnin nirqan: “Karupita shamushqa këkarqa, ¿imanirtan wayikiman ëwarqunkitsu?”.
11 Tsënö niptinmi Urïasqa Davidta nirqan: “Diosnintsikpa Sagrädu Cäjan,+ Israel y Judä soldädukuna, Joabwan sirwiyäshoqniki soldädukunapis carpallachömi* punuykäyan. ¿Tsëtsuraq noqaqa wayïta ëwëkur mikur, upur y warmïwan punukur kushishqa kaküman?+ ¡Teytallë, manam tsëtaqa rurëkümantsu!”.
12 Tsënam Davidqa Urïasta nirqan: “Kanan junaqpis këchö quedakuy, warënam kutikunki”. Tsëmi Urïasqa tsë junaq y waränimpis Jerusalenchö quedakurqan.
13 Tsëpitanam Davidqa Urïasta mikunampaq y upunampaq qayatsirqan, y machanqanyaqmi upyatsirqan. Peru Urïasqa manam tsë paqaspis wayinta ëwarqantsu, sinöqa palaciuta täpakoq soldädukunawanmi punur quedakurqan.
14 Waräninnam Davidqa Joabpaq cartata qellqëkur, Urïaswan apatsirqan.
15 Cartachöqa kënömi nirqan: “Pelyachöqa Urïasta mas puntaman churanki, y chikimaqnintsik soldädukuna atacayäshuptikiqa japallanta dejariyanki wanuratsiyänampaq”.+
16 Joabqa musyarqannam tsë markapa më lädunchö alli pelyëta yachaq soldädukuna kayanqanta, y pëkunawan pelyanampaqmi Urïasta churarqan.
17 Y tsë markapita soldädukuna yarqaramurmi Joab diriginqan soldädunkunawan pelyayarqan. Y Davidpa wakin soldädunkunatam wanutsiyarqan, y hitïta Urïastapis+ tsëchömi wanutsiyarqan.
18 Tsëpitanam Joabqa Davidman willatsirqan guërrachö llapan pasakunqanta.
19 Willakoqtam kënö nirqan: “Guërrachö llapan pasakunqanta willaptikiqa,
20 capaz gobernanti Davidqa cölerar kënö nishunki: ‘¿Imanirtaq marka lädunyaq pelyaq ëwayarqëki? ¿Manaku musyayarqëki perqa janampita flëchayäshunëkipaq kaqta?
21 ¿Pitaq Jerubësetpa+ tsurin Abimëlecta+ Tëbez markachö wanutsirqan? ¿Manaku perqa janampita juk warmi rumi mulinuwan wanuskatsirqan? ¡Imanirtaq perqa lädunyaq ëwayarqëki!’. Tsënö nishuptikiqa kënö ninki: ‘Sirwishoqniki hitïta Urïaspis wanushqam’”.
22 Tsënam willakoqqa, Joab llapan ninqanta Davidta willarqan.
23 Tsëpitanam tsë willakoqqa Davidta kënö nirqan: “Chikimaqnintsik soldädukunaqa pampachö pelyayänäpaqmi yarqayämurqan. Peru noqakunaqa vencirmi markankunapa yëkunanyaq kutitsiyarqä.
24 Tsëmi chikimaqnintsik soldädukunaqa, perqa janampita flëchar wakin soldäduntsikkunata wanutsiyämurqan, y tsëchömi sirwishoqniki hitïta Urïastapis wanuskatsiyämurqan”.+
25 Tsënö willariptinmi Davidqa tsë willakoqta kënö mandarqan: “Kë pasakunqankunapita mana mantsakänampaq Joabta nï. Tsënömi guërrachöqa pita karpis wanutsiyan. Valienti kanampaq nï, y tsë markapa duëñun kanqantsikyaq pelyatsun”.+
26 Urïas wanushqa kanqanta musyarirmi, warminqa alläpa llakir waqarqan.
27 Y Davidqa, llakir waqar kanqan tiempu ushariptinmi warmin kanampaq+ Bat-Sebata wayinman apayänampaq mandakurqan, y pëchömi juk tsurin yurirqan. Peru Jehovä Diostaqa manam gustarqantsu+ David tsëta ruranqanqa.
Nötakuna
^ Tsëqa kaq alalë tiempu pasariptinllam.
^ O “purificäkuykaptinmi”. Capazchi killanwan kanqampita pasariptin bañakuykarqan.
^ O “oqllanakurqan”.
^ Kënöpis niyanmi: toldullachömi.
