2 Samuel 13:1-39
13 Davidpa tsurin Absalonpam, Tamar+ jutiyoq alläpa shumaqllan panin karqan. Y Davidpa Amnon+ jutiyoq tsurinmi panin Tamarta löcuyëpa kuyakurkurqan.
2 Tamarqa manam ni pï ollquwampis kashqaraqtsu* karqan. Tsëmi Amnonqa pëwan imëkanöpapis këta munarqan, y panin Tamarpaq yarparäkurmi qeshyaskirqan.
3 Amnonpaqa, alläpa musyaq Jehonadab+ jutiyoq amïgunmi kapurqan. Pëqa Davidpa wawqin Simeäpa+ tsurinmi karqan.
4 Jehonadabmi kënö tapurqan: “¿Imanirtan gobernantipa tsurin këkarqa llakishqalla warämunki? Imatan pasëkäshunki, willamë”. Amnonnam, “wawqï Absalonpa panin Tamartam+ alläpa kuyëkü” nir willarqan.
5 Tsënam Jehonadabqa kënö nirqan: “Qeshyaq tukur cämëkillachö jitarë. Papäniki watukashoqniki shamuptinqa kënö ninki: ‘Panï Tamar imallatapis mikunäpaq apamutsun. Rikëkaptï cocinaramur* qaramaptinqa mikushaqmi’”.
6 Tsëmi Amnonqa qeshyaq tukur cämanllachö këkarqan, y gobernanti David watukaqnin chäriptinnam nirqan: “Panï Tamarta watukamänampaq mandëkallämuy, y rikëkaptï ishkë tantata rurëkur qaramätsun”.
7 Tamarqa wayichömi këkarqan. Tsënam Davidqa mandakurqan Tamarta kënö willayänampaq: “Turiki Amnonmi qeshyëkan, wayinta ëwar imallatapis cocinarapuy”.*
8 Y Tamarqa willaskiyaptinmi turin Amnonpa wayinta ëwarqan. Mikunampaqmi tantan rurapurqan.
9 Peru Amnonqa, tantan apapuptin manam mikuyta munarqantsu, y tsëchö këkaqkunatam, “këpita yarquyë” nirqan. Tsëmi llapankuna yarquyarqan.
10 Tsënam Amnonqa Tamarta nirqan: “Cuartuman mikuyta* apëkamur mikutsimë”. Tsënam Tamarqa, turin Amnonpa cuartunman tantata aparqan.
11 Mikutsinampaq lädunman witïkuptinnam, Amnonqa paninta tsarikurkur kënö nirqan: “Qamwanmi këta munä”.
12 Tsënam Tamarqa nirqan: “Turillä, ama penqakuyman churamëtsu. Tsënö mana allikunataqa manam Israelchö rurayantsu.+ Ama tsë mana allitaqa rurëkamëtsu.+
13 Tsëta rurëkuptikiqa, ¡penqakuypaqmi noqapaq kanqa! Y qamtapis pasëpa* mana allitanömi israelïtakuna rikäyäshunki. Noqawan këta munarqa, gobernanti Davidta parlapë, parlapaptikiqa munanqam”.
14 Tsënö niptimpis, Amnonqa manam panin ninqanta cäsurqantsu. Y mas kallpayoq karmi vencirir paninta violaskirqan.
15 Tsëpitanam Amnonqa paninta melanaskirqan, y mëläya kuyashqa karpis chikikurkurqanmi. Tsëmi, “sharkur, këpita ëwakuy” nirqan.
16 Tsënam Tamarqa kënö nirqan: “¡Turillä ama këpita qarqamëtsu! ¡Tsëta ruraptikiqa violamanqëkipitapis mas peormi kanqa!”. Tsënö niptimpis, Amnonqa manam panin ninqanta cäsurqantsu.
17 Sirweqnin jövinta qayëkurmi nirqan: “Manam kë warmita rikëta munänatsu, këpita qarquskir punkuta wichqë”.
18 (Tamarqa shumaq vestïduta vistishqam këkarqan, tsënömi gobernantipa warmi wamrankunaqa ollquwan manaraq kashqa karnin vistikuyaq). Tsënam Amnonpa sirweqninqa Tamarta qarquskir punkuta wichqarkurqan.
19 Tamarqa peqanmanmi o umanmanmi uchpata jicharqan,+ y shumaq vestïduntam llakikur rachirirqan. Y peqanta o umanta aptakurkurmi waqar ëwakurqan.
20 Tsënam Absalonqa+ panin Tamarta nirqan: “¿Amnonku violashurqunki? Ama pitapis willëtsu, pëqa turikim.+ Ama kë pasashunqëkimanqa yarpachakuynatsu”. Tsëmi Tamarqa penqakurnin turin Absalonpa wayinllachöna täkurqan.*
21 Tsë llapan pasanqanta musyëkurmi gobernanti Davidqa feyupa cölerakurqan.+ Amnonqa kuyë mayor tsurinmi karqan, tsëmi mana llakitsinanrëkur imatapis nirqantsu.
22 Panin Tamarta violar penqakatsishqa kaptinmi,+ Absalonqa Amnonta alläpa chikirqan.+ Peru manam imatapis nirqantsu.
23 Tsëpita ishkë wata pasarinqanchönam, Absalonqa Efrainpa+ lädun Baal-Hazor sitiuchö üshata rututsir këkarqan y gobernantipa llapan tsurinkunatam qayatsirqan mikoq ëwayänampaq.+
24 Absalonqa gobernantimanmi ëwarqan kënö ninampaq: “Papä, kananqa millwatam rutuykätsï, imallatapis mikunantsikpaq sirwishoqnikikunawan shayämuy”.
25 Peru gobernanti Davidnam, “hïju, llapäkuna shayämuptïqa alläpam gastakunki” nirqan. Absalon kutin kutin rogaptimpis manam munarqantsu. Peru llapankuna alli pasayänanta munarmi agradecikurqan.*
26 Tsënam Absalonqa nirqan: “Qam mana shamuptikipis wawqï Amnon shamuykullätsun”.+ Gobernanti Davidnam, “¿imanirtan pë ëwananta munanki?” nirqan.
27 Absalon tsënö rogaptinnam Davidqa Amnonta y wakin tsurinkunata ëwayänampaq mandarqan.
28 Tsëpitanam Absalonqa sirweqninkunata kënö mandarqan: “Alkäbulla këkäyanki. Amnon vïnuta upur kushishqa kanqan höram, ‘Amnonta wanutsiyë’ niyashqëki. Tsë höram mana mantsashpa wanutsiyänëki. Noqam mandëkäyaq, ama mantsayankitsu”.
29 Absalon mandakunqannömi sirweqninkunaqa Amnonta wanuratsiyarqan, tsë höram gobernantipa wakin tsurinkunaqa mulankunata montarkur qeshpir ëwakuyarqan.
30 Y manaraq chäyaptinmi gobernanti Davidtaqa, “Absalonmi llapan tsurikikunata wanutsishqa” nir willayarqan.
31 Tsënö willayaptinnam gobernanti Davidqa llakikur röpanta rachiskir patsaman jitakärirqan y lädunchö këkaq llapan sirweqninkunapis tsënöllam llakikur röpankunata rachiyarqan.
32 Simeäpa*+ tsurin Jehonadabnam+ Davidta nirqan: “Amnonllam wanushqaqa+ teytallë, wakin kaq jövin tsurikikunaqa manam wanuyashqatsu. Panin Tamarta+ Amnon violar penqakatsishqa kaptinmi,+ Absalonqa unëpitana wanutsinampaq jurapashqa karqan.+
33 Ama creitsu llapan willayäshunqëkita teytallë, Amnonllam wanushqaqa, y manam wakin tsurikikunaqa”.
34 Tsëyaqnam Absalonqa qeshpir ëwakurqan.+ Mas tardinam markata täpakoq nunaqa rikarqan, jirka lädumpa atskaq nunakuna shamuykäyaqta.
35 Tsënam Jehonadabqa+ gobernanti Davidta nirqan: “Teytallë, tsurikikunam kutikäyämun. ¿Manaku rasumpa kaqllata willarqaq?”.
36 Tsënö nikaptinmi gobernantipa llapan tsurinkunaqa waqarnin chäyarqan. Tsënam gobernanti y tsëchö llapan sirweqninkunapis Amnon wanukushqa kaptin pëkunawan juntu waqayarqan.
37 Tsëmi Davidqa tsurin Amnonpaq llakikur waran waran waqarqan. Absalonqa Guesurchö gobernanti Talmäi*+ kaqmanmi qeshpir ëwakurqan. Talmäiqa Amihudpa tsurinmi karqan.
38 Y Guesurchömi+ Absalonqa kima watapa täkurqan.*
39 Gobernanti Davidqa mananam tsurin Amnonpaq llakikurqannatsu, tsëmi tsurin Absalonta rikëta munarqan.
Nötakuna
^ O “oqllanakushqaraqtsu”.
^ Tsë mikuyqa qeshyaqkunapaqmi karqan.
^ O “duëlu tantata rurarapuy”.
^ O “duëlu tantata”.
^ Kënöpis niyanmi: jankat.
^ Kënöpis niyanmi: tärarqan; pärarqan.
^ Hebreu idiömachöqa “bendicïkurqan” ninmi.
^ Pëqa Davidpa wawqinmi karqan.
^ Sesäi, Ahïman y Talmäiqa capaz cada ünu rikätsikuyarqan kastankunata.
^ Kënöpis niyanmi: tärarqan; pärarqan.
