2 Samuel 17:1-29
17 Tsënam Ahitofelqa Absalonta kënö nirqan: “Döci mil soldädukunata akrëkur, kanan paqas Davidta qatipar ëwarishaq.
2 Pishipashqa* ëwëkaqta+ taripëkurmi mantsakätsishaq. Tsënam llapan nunakuna mantsakar qeshpir ëwakuyaptin, gobernantitaqa japallanllata wanuratsishaq.+
3 Tsëpitanam llapan nunakunata kutitsimushaq. Wanutsita munanqëki nuna wanuptinqa, llapan nunakunam kutiyämunqa. Y llapan israelïtakunam tranquïluna kawakuyanqa”.
4 Ahitofel tsënö ninqanqa Absalonpaq y Israelchö dirigentikunapaqpis allim karqan.
5 Peru Absalonqa kënömi nirqan: “Arkïta Husaïtaraq+ tapunapaq qayarayämuy, mä pëqa imash ninqa”.
6 Husäi chäriptinnam Absalonqa Ahitofel ninqanta willarqan. Tsëpitanam, “¿ninqanta rurashwanku o manaku? Mana allinö kaptinqa, mä qam niyämë imata ruranapaq kaqta” nir tapurqan.
7 Tsënam Husäiqa Absalonta nirqan: “Ahitofel niyäshunqëkiqa manam allitsu”.+
8 Tsëpitanam Husäiqa kënö nirqan: “Qamqa musyankim papänikiwan soldädunkunaqa alli pelyaq kayanqanta.+ Kanan höraqa wawanta oqrashqa china ösunömi cölerashqa këkäyan.+ Papänikiqa guërrakunachö alli pelyaqmi+ y manam nunakunawan juntuqa waranqatsu.
9 Kanan höraqa mana rikäyänampaqchi machëkunachö kar o mëchö karpis këkan,+ y tsëpita yarqamurchi llapan soldäduykikunata ushakäratsimunqa. Y nunakuna tsëta musyëkurqa, ‘¡Absalonpa yanapaqninkunatam ushakätsiyashqa!’ nirchi parlayanqa.
10 Tsëqa, leonnö mas valienti+ kaq soldäduykipis alläpa mantsakarmi ima rurëtapis puëdinqatsu. Y llapan israelïtakunam musyayan papänikiqa alli pelyaq kanqanta+ y soldädunkunapis valienti kayanqanta.
11 Tsëpa rantinqa, lamar kuchunchö arënanö mana yupëtapis puëdipaq,+ Danpita Beer-Sëbayaq+ täkoq* israelïta ollqukunata juntamuy, y kikikim pëkunata guërrachö diriginëki.
12 Mëchö këkäyaptimpis, shullyanö* mëtsika yurirkurmi llapanta ushakätsishun, y manam salvakunqatsu ni gobernanti ni juk soldädunllapis.
13 Më markamampis qeshpir ëwayaptinqa, llapantsikmi markapa perqankunata waskawan qaracharkur ura pampaman jitashun y manam ni imallatapis dejashuntsu”.
14 Tsënö niptinmi Absalonwan israelïtakunaqa niyarqan: “¡Ahitofel ninqampitaqa, arkïta Husaï ninqanmi mas alliqa!”.+ Tsënöqa karqan Ahitofelpa+ alli consëjunkunata Jehovä Dios mana välitsishqa kaptinmi. Tsënöpam Teyta Jehoväqa Absalonta desgraciaman chätsinan karqan.+
15 Tsëpitanam Husäiqa, sacerdötikuna Sadocta y Abiatarta+ willarqan Absalontawan Israelchö dirigentikunata Ahitofel ninqanta. Y kikin imata consejanqantapis willarqanmi.
16 Tsënö willaskirmi Sadoctawan Abiatar kënö nirqan: “Kananqa jinan höra willakoqkunata Davidman mandayë, mayuta* pasana sitiukunachö kanan paqas mana quedakuyänampaq, sinöqa wak tsimpaman tsimpayänampaq. Mana tsimpayaptinqa kikin gobernantita y llapan nunakunatam wanutsiyanqa”.+
17 Markaman yëkuykaqta mana rikäyänampaqmi Jonatanwan+ Ahimäazqa+ En-Roguel+ pukyullachö quedakushqa kayarqan. Tsëllamannam juk sirweq warmi willakoq ëwarqan. Y pëkunanam Davidta willaq ëwayarqan.
18 Peru juk jövinmi Jonatantawan Ahimäazta ëwëkaqta rikärir, Absalonta willarqan. Tsënam Jonatanwan Ahimäazqa empëñu ëwar Bahurim+ markachö juk nunapa wayinman chäyarqan. Y mana tariyänampaqmi tsë nunapa patiunchö këkaq pözuman yëkuriyarqan.
19 Tsë nunapa warminnam pözuta tëlawan tsaparkur jananman trïguta mashtëkurqan. Y manam pillapis cuentata qokurqantsu pözuchö këkäyanqantaqa.
20 Absalon mandanqan nunakuna chëkurnam tsë warmita, “¿rikarqunkiku Ahimäaztawan Jonatanta?” nir tapuyarqan. Warminam, “yaku kaqpam ëwayashqa”+ nirqan. Tsënam nunakunaqa mëtsëpa ashiyarqan, y mana tarirmi Jerusalen markata kutikuyarqan.
21 Tsë nunakuna kutiriyaptinnam Ahimäazwan Jonatanqa pözupita yarqurir David kaqman ëwayarqan, y chëkurmi willayarqan Absalonta Ahitofel consejanqanta. Tsëpitanam, “jinan höra mayuta* tsimpayë”+ niyarqan.
22 Tsëmi Davidqa llapan nunakunawan Jordan mayuta* tsimpayarqan, y patsa waränampaqqa llapankunam tsimpashqana kayarqan.
23 Peru Ahitofelqa, ninqanta mana cäsuyashqa kayaptinmi ashnunta sillarkur markanta kutikurqan.+ Y familianta shumaq parlapärir+ y imëkankunata shumaq dispunïkurmi, jurkakur wanurirqan o wañurirqan.+ Tsënam unë familiankuna pamparanqanman pampëkuyarqan.
24 Tsëyaqnam Davidqa Mahanäim+ sitiuman charqan. Y Absalonnam, llapan israelïta soldädukunawan Jordan mayuta* tsimpayarqan.
25 Absalonqa Joabpa+ rantinmi, soldädukunata diriginampaq Amasäta+ churarqan. Amasäqa israelïta Iträpa tsurin y Abigailpa+ wamranmi karqan. Abigailnam Nahaspa tsurin karqan. Y Joabpa mamänin Zeruyäpa nanannam o ñañannam Abigail karqan.
26 Absalonwan soldädunkunaqa Galaad+ läduman chëkurmi campamentunkunata rurayarqan.
27 Mahanäim sitiuman David chäriptinnam, ammonïtakuna kayanqan Rabä+ markapita Nahaspa tsurin Sobï, Lo-Debar markapita Amielpa tsurin Makir+ y Roguelim markapita galaadïta Barziläiqa,+
28 apayarqan cämakunata, tazonkunata, allpa mankakunata, trïguta, cebädata, harinata, ankashqa gränukunata, häbasta, lentëjasta,
29 mielta, mantequïllata, üshakunata y quësuta. Tsë llapantam Davidpaq y nunankunapaq apayarqan.+ Pëkunaqa kënömi niyarqan: “Kë tsunyaq sitiuchö nunakunaqa pishipashqa,*+ mallaqashqa y yakunashqachi këkäyan”.
Nötakuna
^ Kënöpis niyanmi: Utishqa; Shaykushqa.
^ Kënöpis niyanmi: täraq; päraq.
^ Kënöpis niyanmi: shullanö; shushalnö; shushanö.
^ Kënöpis niyanmi: riuta.
^ Kënöpis niyanmi: riuta.
^ Kënöpis niyanmi: riuta.
^ Kënöpis niyanmi: riuta.
^ Kënöpis niyanmi: utishqa; shaykushqa.
