2 Samuel 2:1-32
2 Tsëpitanam Davidqa Jehovä Diosta tapurqan:+ “¿Judächö këkaq mëqan markamampis kutïmanku o manaku?”. Jehovänam, “awmi, kutinëkim” nirqan. Davidnam, “¿mëqan markamantan kutïman?” nir tapurqan. Teyta Diosnam, “Hebron+ markaman” nirqan.
2 Tsënö niptinmi Davidqa ishkan warminkunata pusharkur ëwakurqan. Juknin warminmi karqan Jezreel markapita Ahinoam+ y jukninnam karqan Carmëlu markapita Nabalpa viudan Abigail.+
3 Davidqa yanapaqnin soldädukunatapis+ familiankunatawanmi pusharqan. Y Hebronpa lädunchö këkaq markakunachömi kawakuyarqan.
4 Tsëchönam, Judäpa+ kastankunachö dirigeqkunaqa, gobernantinkuna kanampaq Davidta churayarqan.
Tsëpitanam Davidtaqa willayarqan, “Saulpa ayantaqa Jabes-Galaadchö ollqukunam pampayashqa” nir.
5 Tsëmi Davidqa willakoqkunata mandarqan Jabes-Galaadchö ollqukunata kënö niyänampaq: “Alläpa kuyakoq kar Saulta shumaq pampayanqëkipita,+ Jehovä Dios bendicïkuyäshuy.
6 Imëpis Jehovä Dios kuyëkuyäshuy.* Tsëta rurayanqëkipitam noqapis qamkunawan alli kashaq.+
7 Gobernaqnikikuna Saulqa wanukushqanam, ama llakikuyënatsu, valienti kayë. Noqatanam Judäpa kastankunaqa gobernanti kanäpaq churayämashqa”.
8 Peru Saulpa soldädunkunata mandaq Abnerqa,*+ Saulpa tsurin Is-Böset-tam+ Jordan mayupa* wak tsimpan Mahanäim+ sitiuman pushashqa karqan.
9 Y asurïtakunapa gobernaqnin kanampaqmi churarqan, y Galaadchö,+ Jezreelchö,+ Efrainchö,+ Benjaminchö y entëru Israelchö gobernanampaqpis churarqanmi.
10 Saulpa tsurin Is-Böset Israelchö gobernar qallanqan witsanqa, cuarenta watayoqnam karqan y ishkë watapam gobernarqan. Peru Judäpa kastankunallam, gobernantinkuna kanampaq Davidta churayanqantaqa välitsiyarqan.+
11 Davidqa Hebron markachömi, qanchis watapa y joqta killapa Judäpa kastankunata gobernarqan.+
12 Tsëpitanam Nerpa tsurin Abnerqa, Mahanäim+ sitiupita Gabaon+ markaman ëwarqan Saulpa tsurin Is-Bösetpa soldädunkunata pusharkur.
13 Tsënöllam Zeruyäpa+ wamran Joabpis,+ Davidpa soldädunkunata pusharkur Gabaon pözuman ëwarqan. Y tinkurirmi ishkan grüpu frenti frenti Gabaon pözuchö jamayarqan.
14 Tsënam Abnerqa Joabta nirqan: “Rikänantsikpaq soldädukuna pelyaq yarqayämutsun”. Joabnam, “pelyayämutsun ari” nirqan.
15 Tsëmi soldädukunaqa pelyayänampaq churakäyarqan. Benjaminpa kastampita Saulpa tsurin Is-Bösetpa soldädunkunam döci kayarqan y Davidpa soldädunkunapis döcim kayarqan.
16 Cada ünu pelyarmi* espädawan costillachö tuksinakuyarqan y llapankuna juntum wanuyarqan. Tsëmi Gabaonchö këkaq sitiutaqa Helcat-Hazurim* nir jutin churayarqan.
17 Tsënö wanutsinakuyanqanta rikëkurnam, wakin soldädukunapis pelyar qallëkuyarqan. Y Davidpa soldädunkunam, Abnerta y Israel soldädukunata venciyarqan.
18 Tsëchömi Zeruyäpa+ wamrankuna Joab,+ Abisai+ y Asahel+ këkäyarqan. Asahelqa jirkachö luychunöran* cörreq.
19 Tsëmi Asahelqa Abnerpa qepanta cörripa ëwarqan y mana dejëpam qatiparqan.
20 Abner rikëkurqa, “¿Asahelku kanki?” nirmi tapurqan. Asahelnam, “awmi, noqam kä” nirqan.
21 Tsënam Abnerqa nirqan: “Amana qatipamënatsu, tsëpa rantinqa mëqan soldädutapis vencirir cösasninkunata apakuy”. Tsënö niptimpis Asahelqa mana dejëpam qatiparqan.
22 Y mana cäsuptinnam Abnerqa yapë nirqan: “Ama qatimënatsu, ¿wanutsinaqtaku munanki? Wanuratsirnikiqa, ¿ima cäräwanraq wawqiki Joabwan tinküman?”.
23 Peru Asahelqa qatipëkarqanllam, tsëmi Abnerqa lanzanwan+ pachachö tuksïkurqan waqtampa pasanqanyaq. Tsë höram ishkirir wanuskirqan. Y tsëpa llapan pasaqkunam Asahelpa ayanta unë rikarärir pasayaq.
24 Tsënam Joabwan Abisaiqa, Abnerta qatipar ëwayarqan. Y patsa tardiyëkaptinnam Amä niyanqan jirkaman chäyarqan. Tsëqa karqan Guïah sitiupa frentinchömi, Gabaon markapita tsunyaq sitiuman ëwaq nänichö.
25 Tsëmanmi Benjaminpa kastankunaqa Abnerta yanapayänampaq ëwayarqan y pelyayänampaqmi juk jirkaman churanakuyarqan.
26 Tsëpitanam Abnerqa Joabman kënö qayakurqan: “¿Imëpis tsënö wanutsinakurllatsuraq këkäshun? ¿Manaku musyanki tsënö wanutsinakunqantsikqa mas llakikuyman chätsimänapaq kaqta? ¿Imë hörataq soldäduykikunata ninki israelïta mayinkunata manana qatikachäyänampaq?”.
27 Joabnam nirqan: “Tsënö mana nimaptikiqa, patsa waranqanyaqmi israelïta mayinkunata soldädükuna qatikachäyanman karqan. Rasuntam nikaq, tsëtaqa Teyta Diosmi musyëkan”.
28 Tsëpitanam Joabqa waqrapita trompëtata tocarqan y soldädunkunaqa manam israelïta mayinkunata qatikachäyarqannatsu ni pelyayarqannatsu.
29 Tsë paqasmi Abnerwan soldädunkunaqa Arabäpa+ ëwarnin Jordan mayuta* tsimpayarqan y zanjakunapa* ëwarmi Mahanäim+ sitiuman chäriyarqan.
30 Y Joabqa Abnerta qatipëta dejëkurmi, Davidpa llapan soldädunkunata qayatsir yuparqan. Asahelwan diecinuëvi soldädukunam pishiyarqan.
31 Davidpa soldädunkunaqa, Benjaminpa kastankunata y Abnerpa soldädunkunatam trescientus sesentata wanutsishqa kayarqan.
32 Y Asahelpa+ ayantaqa Belen+ markaman apëkurmi, papänin pamparanqanman pampayarqan. Tsëpitanam Joabwan llapan soldädunkunaqa paqaspa kutikuyarqan y waräninnam tempränulla Hebron+ markaman chäyarqan.
Nötakuna
^ O “alläpa kuyëkuyäshuy”.
^ Kënöpis niyanmi: riupa.
^ Hebreu idiömachöqa “Nerpa tsurin Abnerqa” ninmi.
^ Hebreu idiömachöqa “peqapita o umapita tsarinakurkur pelyarmi” ninmi.
^ Tsë jutiqa, “pedernal rumipita cuchillukuna kanqan sitiu” ninanmi.
^ Hebreu idiömachöqa “gacëlanöran” ninmi, tsë animalqa Israelchömi kan y luychu niraqmi.
^ Kënöpis niyanmi: riuta.
^ O capazchi “Bitronpa”.
