2 Samuel 3:1-39
3 Saulpa familiankunata yanapaqkunaqa, Davidpa yanapaqninkunawanmi chikinakuyaq, tsëmi atska tiempupa guërrachö kayarqan. Davidta yanapaqkunaqa atskanam kayarqan,+ peru Saulpa familianta yanapaqkunaqa ushakarmi qallëkurqan.+
2 Tsë witsankunam Hebron+ markachö Davidpa tsurinkuna yuriyarqan. Mayor kaq tsurimpa jutinqa Amnonmi+ karqan, y mamäninqa Jezreel markapita Ahinoammi+ karqan.
3 Amnonpa qepanmannam Kileab karqan, y mamäninqa Carmëlu markapita Nabalpa viudan Abigailmi+ karqan. Kileabpa qepanmannam Absalon+ karqan, y mamäninqa Maacämi karqan. Maacäpa papäninqa Guesurchö gobernaq Talmäimi+ karqan.
4 Absalonpa qepanmannam Adonïas+ karqan, y mamäninqa Haguitmi karqan. Adonïaspa qepanmannam Sefatïas karqan, y mamäninqa Abitalmi karqan.
5 Y Sefatïaspa qepanmannam Itream karqan, y mamäninqa Eglämi karqan. Pëkunam kayarqan Davidpa tsurinkuna, y Hebron markachömi yurikuyarqan.
6 Saulpa familianta yanapaqkuna, Davidta yanapaqkunawan guërrachö kayanqan witsanmi, Abnerqa+ Saulpa familianchö mandakoq tikrarqan.
7 Saulpam Rizpä+ jutiyoq juk warmin* karqan, Rizpäpa papäninqa Ayä jutiyoq nunam karqan. Y juk kutim Is-Bösetqa,+ “¿imanirtaq papänïpa warminwan kakurqunki?”* nir Abnerta tapurqan.+
8 Tsënam Abnerqa feyupa cölerar Is-Böset-ta kënö nirqan: “¿Noqaqa Judä allquku kä tsënö nimänëkipaq? Kananyaqmi papäniki Saulpa familiankunata, wawqinkunata y amïgunkunata respetatsirnin* yanaparqö. Y manam Davidpa makinchö kanëkita dejarqötsu. ¿Tsënö yanapëkaptïku kananqa reclamamanki juk warmiwan karinqäpita?*
9 Kananqa Davidta Jehovä Dios äninqantam rurashaq, tsëta mana ruraptïqa Teyta Dios fuertipa castiguëkamätsun.+
10 Manam Saulpa familiannatsu gobernanqa, Davidtanam yanapashaq Israelchö y Judächö gobernanti kanampaq, pëmi Danpita Beer-Sëbayaq gobernanqa”.+
11 Tsënam Is-Bösetqa Abnerta mantsarnin imatapis nirqannatsu.+
12 Abnerqa jinan höram willakoqkunata mandarqan Davidta kënö niyänampaq: “¿Pipa makinchötan entëru nacionqa këkan? Amïgu kanapaq acuerduta rurashun, y noqam imëkanöpis yanapashqëki entëru Israel nacion makikichö kanampaq”.+
13 Tsënam Davidqa nirqan: “Allim kanqa, tsëqa parlashun. Peru parlanapaq shamurqa, Saulpa tsurin Micalta+ apamunki, pëta mana apamurqa ama chämunkitsu”.
14 Tsëpitanam Davidqa Saulpa tsurin Is-Bösetman+ willakoqkunata kënö niyänampaq mandarqan: “Warmï Micalta kutitsimë, pëwan casakunäpaqmi cien filisteu soldädukunapa ishpakuyänampa puntanta roquskir papäniki Saulman aparqä”.+
15 Tsëmi Is-Bösetqa Läispa tsurin Paltielpita+ Micalta rakiyänampaq mandakurqan.
16 Warminta apakuyaptinmi Paltielqa, waqarnin qepanta ëwarqan Bahurim+ markayaq. Tsënam Abnerqa, “¡wayikita kutikuy!” nirqan, tsëmi kutikurqan.
17 Tsëpitanam Abnerqa, Israelchö dirigentikunaman kënö willakatsirqan: “Qamkunaqa mëtsika watapanam David gobernantikikuna kananta munayarqunki.
18 Tsëmi kananqa gobernanti kanampaq pëta churashun. Kikin Jehovä Diosmi Davidta kënö nishqa karqan: ‘Sirwimaqnï Davidwanmi+ filisteukunapita y llapan chikeqninkunapita israelïtakunata salvashaq’”.
19 Tsëpitanam Abnerqa Benjaminpa+ kastankunawan y llapan israelïtakunawan parlarqan. Y parlayanqanta Davidta willanampaqmi, pitapis mana musyatsillapa Hebron markata ëwarqan.
20 Abnerqa Hebron markatam veinti soldädunkunawan David kaqta ëwarqan, y chäriyaptinnam Davidqa pëkunapaq alli mikuyta ruratsirqan.
21 Tsënam Abnerqa Davidta nirqan: “Teytallë, shumaq parlayänëkipaq ëwä llapan israelïtakunata qayatsimushaq, tsënöpam llapan munanqëki markakunata qam gobernanki”. Tsëmi Davidqa Abner ëwakunanta dejarqan.
22 Davidwan parlarir Hebron markapita Abner yarqunqanllachömi, Joabwan Davidpa soldädunkunaqa juk markata ushakäratsir, tariyanqan cösaskunata aparishqa chäyarqan.
23 Llapan soldädukunawan Joab+ chäriptinmi kënö willayarqan: “Nerpa+ tsurin Abnermi+ gobernanti Davidwan parlaq shamushqa. Y Davidqa ëwakunantam dejashqa”.
24 Tsënam Joabqa David këkanqanman yëkuskir kënö nirqan: “Teytë, ¿imatataq rurarqunki? ¿Imanirtaq Abner chëkämuptin kutikunanta dejarqunki?
25 ¡Qamqa musyankim Nerpa tsurin Abner imanö kanqanta! Pëqa shamushqa mana kaqkunata creitsishunëkipaq y mëpa ëwanqëkita y imata ruranqëkikunata musyapakunampaqmi”.
26 Tsëpitanam Joabqa David kaqpita yarquskir, Abnerta kutitsiyämunampaq willakoqkunata mandarqan, y Sirä niyanqan pözupitam kutitsiyämurqan. Peru Davidqa manam musyarqantsu Joab rurëkanqantaqa.
27 Hebron+ markaman Abner kutiriptinnam, Joabqa parlapänampaq marka yëkunanman japallanta pusharqan. Tsëchönam wawqin Asahelta+ wanutsinqampita, Abnerta pachachö tuksir wanuratsirqan.+
28 David tsëta musyaskirqa kënömi nirqan: “Teyta Jehovämi musyëkan Nerpa tsurin Abner wanunqampita noqa ni gobernanqä nunakuna mana culpayoq kayanqäta.+
29 Joabwan+ papänimpa familiankuna culpayoq kayätsun. ¡Joabpa familianchö mëqan ollqupis sufritsun yawar ishpëwan+ o lepra+ qeshyawan o cöjuyärir warminöpis putskapakur katsun o espädawan wanutsun o mallaqëta pasatsun!”.+
30 Joabwan Abisaiqa,+ Abnerta+ wanutsiyarqan Gabaonchö pelyar+ wawqinkuna Asahelta wanutsishqa kaptinmi.
31 Tsëpitanam Davidqa, Joabta y tsëchö llapan këkaqkunata nirqan: “Röpëkikunata rachir chukru tëlakunata vistikurkur Abnerpaq waqayë”. Kikin gobernanti Davidpis ayata apayaptinmi qepanta ëwarqan.
32 Hebron markachö Abnerta pampayaptinmi, Davidqa alläpa waqarqan y llapan nunakunapis tsënöllam waqayarqan.
33 Gobernanti Davidqa, Abnerpaq llakikurmi kënö cantarqan:
“Abner, ¿imanirtan upatanö wanutsiyäshurqunki?
34 Manataq makikipis ni chakikipis watararqantsu.*
Qamqa asesïnukunapa* makinchönömi wanurqunki”.+
Tsënam llapan nunakuna Abnerpaq yapë waqayarqan.
35 Tsëpitanam nunakunaqa Davidta rogayarqan mikunampaq,* peru pëqa kënömi nirqan: “¡Manaraq patsa tardiyaptin tantata* o imallatapis mikuptïqa Teyta Dios castiguëkamätsun!”.+
36 Gobernanti David tsënö ninqan y llapan ruranqanqa, llapankunapaqmi alli karqan.
37 Tsënöpam llapankuna tsë junaq musyayarqan, Nerpa+ tsurin Abnerta David mana wanutsishqa kanqanta.
38 Tsëpitanam Davidqa sirweqninkunata nirqan: “¿Manaku cuentata qokuyanki Israelchö soldädukunapa mandaqnin wanushqa kanqanta?+
39 Gobernantikikuna kanäpaq churayämashqa kayaptikipis,+ manam Zeruyäpa+ wamrankunataqa imanëta puëdïtsu. Pëkunaqa alläpa mana allim kayan.+ Mana alli ruraqkunataqa Jehovä Dios castiguëkutsun”.+
Nötakuna
^ Kënöpis niyanmi: oqllanakurqunki.
^ Hebreu idiömachöqa “concubïnan” ninmi. Rikäri “Bibliachö palabrakunata entiendinapaq” neqta.
^ O “alläpa kuyarnin”.
^ Kënöpis niyanmi: oqllanakunqäpita.
^ Hebreu idiömachöqa “cobripita grillëtiwan” ninmi.
^ Hebreu idiömachöqa “mana allita ruraqkunapa tsurinkunapa” ninmi.
^ O “duëlukunapaq rurayanqan tantata mikunampaq”.
^ O “duëlukunapaq rurayanqan tantata”.
