2 Samuel 5:1-25
5 Tiempuwannam, Israelchö llapan kastakuna Hebron+ markata ëwëkur Davidta niyarqan: “Tsë yawarllam* kantsik.+
2 Saul gobernanqan witsampis, israelïta soldädukunapa mandaqninqa qammi karqëki.+ Y qamtam Jehovä Diosnintsikqa sirweqnin israelïtakunata cuidanëkipaq y diriginëkipaq nishurqëki”.+
3 Tsënam Israelchö llapan dirigentikuna Hebron markaman ëwayarqan gobernanti David kaqta. Chäriyaptinnam Davidqa Jehovä Diospa rikëninchö pëkunawan acuerduta rurarqan.+ Tsëpitanam Israelchö gobernanti kanampaq Davidta churayarqan.+
4 Davidqa treinta watayoq këkarmi gobernanti këman charqan, y cuarenta watapam mandakurqan.+
5 Hebron markapitam, Judäpa kastankunata qanchis watapa y joqta killapa gobernarqan. Jerusalen markapitanam,+ llapan israelïtakunata y Judäpa kastankunata treinta y tres watapa gobernarqan.
6 Davidqa llapan soldädunkunawanmi, Jerusalen markata ëwarqan jebuseu nunakunawan pelyayänampaq. Peru jebuseukunaqa+ burlakurmi Davidta niyarqan: “¡Manam këmanqa imëpis yëkamunkitsu! Qamtaqa hasta wiskukunapis* y cöjukunapis mantsakätsiyäshunkim”. Tsënöqa niyarqan David imëpis mana yëkunampaq+ kaqta pensarmi.
7 Tsënö nikäyaptimpis Davidqa vencïkurmi Sion jirkachö këkaq següru markaman yëkurqan. Tsë markataqa David Marka+ nirmi kananqa reqiyan.
8 Tsë junaqmi David nirqan: “Jebuseukunawan pelyaq yëkoqkunaqa yaku ëwanqan tünel-llapa yëkurirmi ‘wiskukunata* y cöjukunata’ ushakätsiyänëki, pëkunataqa alläpam chikï”. Tsënö ninqampitam kënö nir parlayaq: “Wiskukuna y cöjukunaqa manam wayiman yëkuyänantsu”.
9 Davidqa tsë següru markachömi kawakurqan, David Marka niyanqan wayikunachö. Tsëchömi Milö* niyanqampita qallëkur+ mas wayikunata ruratsirqan.+
10 Y Angelkunata mandaq Jehovä Dios yanapaptinmi+ Davidqa mas puëdeq tikrarqan.+
11 Tïru markapita gobernanti Hiram-mi+ willakoqkunata Davidman mandarqan parlayänampaq. Tsëpitanam cedru qeruta,+ carpintërukunata, albañilkunata mandarqan, y pëkunam palaciu wayita Davidpaq rurayarqan.+
12 Tsëmi Davidqa cuentata qokurqan+ Teyta Jehovä akrashqa kanqanta y israelïtakunata+ alli gobernanampaq yanapëkanqanta.
13 Davidqa Hebron markapitam Jerusalen markata ëwakurqan. Tsëchömi mas warmikunawan casakurqan,+ y sirweqnin warmikunatapis* wätarqanmi. Tsë warmikunachömi ollqupis warmipis mas tsurinkuna kapurqan.+
14 Jerusalen markachö yureq ollqu tsurinkunam kayarqan Samüa, Sobab, Natan,+ Salomon,+
15 Ibhar, Elisüa, Nëfeg, Jafïa,
16 Elisamä, Eliadä y Elifëlet.
17 Israelpa gobernantin kanampaq Davidta churashqa kayanqanta+ musyëkurmi, filisteukunaqa pëwan pelyayänampaq asheq ëwayarqan.+ Y tsëta musyëkurnam Davidqa, fäcil-lla mana chäna sitiuman qeshpir ëwakurqan.+
18 Filisteukunaqa Refaim+ pampa* urëmanmi churanakuyarqan.
19 Tsënam Davidqa Teyta Jehoväta kënö tapurqan:+ “¿Ëwämanku filisteukunawan pelyaq? ¿Vencinäpaq yanapamankitsuraq?”. Jehovänam, “awmi, ëwëlla, yanapashqëkim vencinëkipaq”+ nirqan.
20 Tsëmi Davidqa Baal-Perazim sitiuta ëwar filisteukunata vencirqan. Tsëpitanam kënö nirqan: “Perqata yaku ishkitseqnömi, Jehovä Diosqa chikimaqnïkunata+ ushakätsishqa”. Tsënö nirmi tsë sitiutaqa Baal-Perazim*+ nir jutin churarqan.
21 Filisteukunaqa santunkunata dejarirmi qeshpir ëwakuyarqan, tsënam Davidwan soldädunkunaqa tsë santukunata apakuyarqan.
22 Filisteukunaqa yapëmi ëwarnin Refaim+ pampa* urëman churanakuyarqan.
23 Tsënam Davidqa Jehovä Diosta yapë tapurqan, pënam kënö contestarqan: “Ama puntankunapaqa ëwankitsu, sinöqa qepankunapa ëwëkur mana rikäyäshunëkipaq bacä* niyanqan montikunapa rurinman yëkunki y tsëpita atacanki.
24 Bacä montikunapa altu puntanchö soldädukuna pureqtanö wiyarqa, filisteukunata vencinäpaq puntëkita noqa Jehovä ëwëkanqätam musyanki, tsë höram yarqur atacanëki”.
25 Davidqa Jehovä Dios ninqannömi rurarqan, tsëmi filisteukunata+ Guëba+ markapita Guëzer+ markayaq qati qatïkur wanutsiyarqan.
Nötakuna
^ Hebreu idiömachöqa “tullulla y ëtsallam” ninmi.
^ Kënöpis niyanmi: qaprakunapis.
^ Kënöpis niyanmi: qaprakunata.
^ Hebreu idiömachöqa “allpa qoturëkaq” ninmi. Capazchi taksha markanö karqan.
^ Hebreu idiömachöqa “concubïnakunatapis” ninmi. Rikäri “Bibliachö palabrakunata entiendinapaq” neqta.
^ O “ruri pampa”.
^ Tsëqa “rakikëpa duëñun” ninanmi.
^ O “ruri pampa”.
^ O “bekja”.
