2 Samuel 6:1-23
6 Davidqa yapëmi treinta mil mas allin kaq soldädukunata qayatsirqan.
2 Tsëpitanam llapan soldädukunawan Diospa Sagrädu Cäjanta apayämunampaq+ Baale-Judä markata ëwayarqan. Nunakunaqa Sagrädu Cäjapa puntanchömi, querubinkuna jananchö këkaq*+ angelkunata mandaq Jehoväman mañakuyarqan.+
3 Diospa* Sagrädu Cäjantaqa, jirkanchö täkoq* Abinadabpa+ wayimpitam mushoq carrëtaman+ churarkur apayarqan. Y Abinadabpa tsurinkuna Uzäwan Ahiömi carrëta lädumpa ëwayarqan.
4 Tsënömi Diospa* Sagrädu Cäjantaqa, jirkanchö täkoq* Abinadabpa wayimpita apayarqan, y Abinadabpa tsurin Ahiömi Sagrädu Cäjapa puntanta ëwarqan.
5 Davidwan llapan israelïtakunaqa kushishqam këkäyarqan, tsëmi Jehovä Diospa rikëninchö tushur y cantar ëwayarqan. Enebru qerupita rurashqa instrumentukunata, arpata, cuerdayoq instrumentukunata,+ panderëtata,+ sonäjata y platïllukunata+ tocarëkarmi ëwayarqan.
6 Naconpa ëranman chäriyaptinnam carrëtaqa cäsi tikrakärirqan, tsëmi Uzäqa Diospa* Sagrädu Cäjan+ mana jeqanampaq tsarëkurqan.
7 Tsënam Jehovä Diosqa cölerarnin, mana respetanqampita+ Uzäta wanuratsirqan.+ Y Uzäqa Diospa* Sagrädu Cäjan lädunmanmi ishkirirqan.
8 Tsëmi Jehovä Dios Uzäta wanuratsiptin David cölerarqan,* tsëmi tsë sitiutaqa Përez-Uzä* nir kananyaq reqiyan.
9 Y Davidqa Jehovä Diosta mantsarninmi,+ “kananqa manam apashaqnatsu Jehoväpa Sagrädu Cäjanta”+ nirqan.
10 Tsëmi Davidqa, täkunqan* markanman*+ Jehoväpa Sagrädu Cäjanta apanampa rantin, guitïta Obed-Edompa+ wayinman apëkatsirqan.
11 Jehoväpa Sagrädu Cäjanqa kima killapam guitïta Obed-Edompa wayinchö quedakurqan, tsëmi Jehovä Diosqa Obed-Edomta y familianta bendicirqan.+
12 Tsënam Davidtaqa kënö nir willayarqan: “Sagrädu Cäja wayinchö kaptinmi, Obed-Edompa familianta y llapan kapunqanta Jehovä Dios bendicishqa”. Tsënö niyaptinmi Davidqa, Obed-Edompa wayinta alläpa kushishqa ëwarqan Diospa Sagrädu Cäjanta täkunqan* markaman+ apamunampaq.
13 Jehoväpa Sagrädu Cäjanta apaqkuna+ joqta päsuta yarquyaptinmi, Davidqa juk töruta y juk wirayätsishqa* animalta Teyta Diospaq rupatsirqan.
14 Tsëpitanam Davidqa lïnupita mandilnin vistikushqa,+ Jehovä Diosta alabar kushishqa tushur ëwarqan.
15 Davidwan israelïtakunaqa kushishqa karmi, waqrapita trompëtata tocarëkar+ y büllata rurar+ Jehoväpa Sagrädu Cäjanta+ apayarqan.
16 Peru Jehoväpa Sagrädu Cäjanta David Markaman chäratsiyaptinmi, Saulpa tsurin Micalqa+ ventänapa rikëkurqan gobernanti David Jehovä Diosta alabar kushishqa tushur y saltar ëwëkaqta, tsëmi shonqunllachö despreciarqan.*+
17 Y Jehoväpa Sagrädu Cäjantaqa David alistanqan carpa* wayimanmi churayarqan.+ Tsëpitanam Davidqa pishtashqa animalkunata+ y Teyta Dioswan amïgu kayanqanta rikätsikoq*+ qarëkunata Jehovä Diospaq rupatsirqan.+
18 Pishtashqa animalkunata y Dioswan amïgu kayanqanta rikätsikoq qarëkunata ruparatsirnam, Davidqa angelkunata mandaq Jehovä Diosman mañakurqan llapankunata yanapëkunampaq.
19 Tsëpitanam Davidqa tsëchö llapan këkaqkunata warmitapis ollqutapis, rosca tantata, palmërapa frütampita rurashqa tortillata y päsaspita rurashqa tortillata qararqan. Tsëpitanam nunakunaqa wayinkunata kutikuyarqan.
20 Davidpis familiankunapaq Teyta Diosman mañakunampaqmi wayinta kutikurqan. Chäriptinnam Saulpa tsurin Micalqa+ Davidta nirqan: “¡Israelïtakunapa gobernaqnin karchi kanan junaqqa kushishqa tushuykurqunki! ¡Löcukunanöran tushurqunki sirwishoqniki warmikunatapis qarëkita rikätsir!”.+
21 Tsënö niptinnam Davidqa Micalta nirqan: “Jehovä Diosta alabarmi kushishqa tushurqö. Jehovämi papänikita y papänikipa familianta akranampa rantin noqata akramashqa y israelïtakunapa gobernantin kanäpaq churamashqa.+ Tsëmi Teyta Jehoväta alabarnin kushishqa tushurqö.
22 Despreciayämänan kaptimpis, Teyta Diospaqqa tsëpitapis mastaran rurashaq, y sirwimaq warmikunam alabayämanqa”.
23 Tsëmi Saulpa tsurin Micalpaqa,+ wanukunqanyaqpis wamran karqantsu.
Nötakuna
^ O capazchi “chowpinchö o pullanninchö”.
^ Hebreu idiömachöqa “rasumpa Diospa” ninmi. Rikäri “Bibliachö palabrakunata entiendinapaq” neqta.
^ Kënöpis niyanmi: täraq; päraq.
^ Hebreu idiömachöqa “rasumpa Diospa” ninmi. Rikäri “Bibliachö palabrakunata entiendinapaq” neqta.
^ Kënöpis niyanmi: täraq; päraq.
^ Hebreu idiömachöqa “rasumpa Diospa” ninmi. Rikäri “Bibliachö palabrakunata entiendinapaq” neqta.
^ Hebreu idiömachöqa “rasumpa Diospa” ninmi. Rikäri “Bibliachö palabrakunata entiendinapaq” neqta.
^ O “mana alli sientikurqan”.
^ Tsë jutiqa “Uzäpa contran tikrashqa” ninanmi.
^ Hebreu idiömachöqa “David Markaman” ninmi.
^ Kënöpis niyanmi: täranqan; päranqan.
^ Kënöpis niyanmi: täranqan; päranqan.
^ Kënöpis niyanmi: werayätsishqa.
^ Kënöpis niyanmi: musyaparqan; penqaparqan.
^ Kënöpis niyanmi: toldu.
^ Rikäri “Bibliachö palabrakunata entiendinapaq” neqta.
