2 Samuel 9:1-13
-
Mefiböset-ta David yanapan (1-13)
9 Juk kutim Davidqa sirweqninkunata nirqan: “¿Saulpa familianqa jukllëllapis kawanraqku llakipëkunäpaq?*+ Jonatantam änirqä tsëta ruranäpaq”.*
2 Saulpam Zibä+ jutiyoq juk sirweqnin karqan, y pëta qayaskayämuptinmi Davidqa, “qamku Zibä kanki” nir tapurqan. Pënam, “awmi teytë, noqam kallä” nirqan.
3 Tsënam gobernanti Davidqa kënö tapurqan: “¿Saulpa familianqa jukllëllapis kawanraqku Jonatanta äninqäta cumplir, Diosnintsik alläpa kuyakoq kanqannö yanapëkunäpaq?”. Zibänam, “awmi, kanran Jonatanpa tsurin. Pëpaqa ishkan chakinmi cöjuyashqa”+ nirqan.
4 Tsënam gobernanti Davidqa, “mëchötan këkan” nir tapurqan. Zibänam, “Lo-Debar sitiuchömi këkan, Amielpa tsurin Makirpa wayinchö”+ nirqan.
5 Tsënam gobernanti Davidqa, Lo-Debar sitiuchö Amielpa tsurin Makirpa wayimpita Mefiböset-ta apayämunampaq mandakurqan.
6 Saulpa willkan y Jonatanpa tsurin Mefiböset David kaqman chärirqa, patsamampis urkun chanqanyaqmi qonqurikurqan. Tsënam Davidqa, “¡Mefiböset!” nirqan. Pënam, “teytallë” nirqan.
7 Davidnam kënö nirqan: “Ama mantsakuytsu. Papäniki Jonatan nimanqantam cumplishaq. Tsëmi qamtaqa llakipashqëki.*+ Awiluyki Saulpa chakrankunatam kutitsishqëki, y noqawan juntum imëpis mikunki”.*+
8 Tsënam Mefibösetqa yapë qonqurikur kënö nirqan: “Teytallë, ¿imanirtan wanushqa o wañushqa allqunö këkaptïpis yanapallämëta munanki?”.+
9 Tsëpitanam gobernanti Davidqa Saulpa sirweqnin Zibäta qayëkatsir kënö nirqan: “Patronniki Saulpa y familiampa llapan chakrankunatam willkanta kutïkatsishaq.+
10 Y Mefibösetpa llapan sirweqninkuna mikuyänampaqmi, wamrëkikunawan y sirwishoqnikikunawan chakranta murupar cosechayänëki. Peru kikin Mefibösetqa noqawan juntum imëpis mikunqa”.+
Zibäqa quinci tsuriyoq y veinti sirweqyoqmi karqan.+
11 Tsënam Zibäqa gobernanti Davidta, “teytallë, llapan nimanqëkitam rurashaq” nirqan. Tsëmi Mefibösetqa gobernantipa tsurinnö David mikunqanchö mikurqan.
12 Mefibösetpaqa Micä+ jutiyoq wamrallaraq tsurinmi karqan. Y Zibäpa wayinchö täkoqkunaqa* llapanmi Mefibösetpa sirweqnin tikrayarqan.
13 Cöjuyashqa* Mefibösetqa,+ Jerusalen markachömi kawakurqan, y gobernanti Davidwan juntum imëpis mikoq.+
Nötakuna
^ Kënöpis niyanmi: ankupëkunäpaq; kuyapëkunäpaq.
^ O “alläpa kuyanqäta rikätsinäpaq”.
^ Hebreu idiömachöqa “tantata mikunki” ninmi.
^ O “alläpa kuyanqaqta rikätsishqëki”.
^ Kënöpis niyanmi: täraqkunaqa; päraqkunaqa.
^ Ishkan chakinmi cöju karqan.
