Abdïas 1:1-21
1 Llapanta Gobernaq Teyta Jehovämi Abdïasta* revelarqan Edom+ nunakunata ima pasanampaq kaqta.
Abdïasmi kënö willakun:
“Teyta Jehovämi willayämashqa ima pasanampaq kaqta,tsëmi mëtsë nacionkunachö kënö willakunampaq juk willakoqta mandayarqö:
‘Edom nunakunawan pelyanantsikpaq kanan höra alistakuyë’”.+
2 Teyta Diosmi kënö nishqa: “Wakin nacionkunapita mas takshallamanmi tikratsishqëki,y melanëpaqmi kayanki.+
3 Qamkunaqa qaqakunachö täkur*y altu sitiukunachö täkurmi,allish tukuyanki,+y orgullösu karmi, ‘¿piraq noqakunataqa këpita qarqayämanqa?’ nir parlayanki.
4 Pichaknö* altu sitiukunachö täkuyaptikipis*o estrëllakuna lädunchö qeshutarurayaptikipis jitayämushqëkim” ninmi Teyta Jehovä.
5 “Ladronkuna paqaspa suwakoq shamurqa,munayanqanllatam apakuyanman.
O üvas cosechaqkunapis,wakinkuna pallapakuyänampaqmi juk ishkë sartakunata dejayanman.
(¡Peru chikiyäshoqnikikunaqa llapëkitam ushakätsiyäshunki!).+
6 ¡Esaüpa kastankuna, imëkëkikunatam apakuyänampaq ashipuyäshunki!
¡Pakarätsiyanqëki väleq cösasnikikunatam ashipuyäshunki!
7 Lindëruykimanmi qarquyäshunki.
Yanapayäshunëkipaq parlayanqëki nunakunam engañayäshunki.
Alli kawakuyanqëki nunakunam contrëkikuna churakar venciyäshunki.
Juntu mikuyanqëki nunakunam yachëllapa traicionayäshunkiy manam cuentata qokuyankitsu.
8 Tsë junaqmi ushakätsishaq Edomchö+ musyaq nunakunata,y jirkakunachö kawaq Esaüpa kastan musyaq nunakunatapis”ninmi Teyta Jehovä.
9 “Jirkakunachö täkoq Esaüpa llapan kastankunatam wanutsiyanqa o wañutsiyanqa,+tsëmi Teman+ sitiuchö soldädukunaqa alläpa mantsakäyanqa.+
10 Wawqiki Jacobpa+ kastankunawan pelyayanqëkipitam,alläpa penqakuyanki,+y ushakäyankim.+
11 Qamkunaqa manam defendiyarqëkitsu,juk nacionpita chikeqnin soldädukuna ëwëkur soldädunkunata prësu apayaptin+y punkupa yëkur Jerusalenpaq sortiayaptimpis.+
Tsëpa rantinqa tsë chiki soldädukuna rurayanqannömi rurayarqëki.
12 Wawqiki desgraciapa pasëkaptinqa,+ ama kushipäyankimantsu karqan,Judä nunakuna wanuykäyaptinqa,+ ama asipäyankimantsu karqan,imëka sufrimientupa pasëkäyaptinqa, ama alabakur parlëkachäyankimantsu karqan.
13 Sirwimaqnïkuna desgraciapa pasëkäyaptinqa, ama punkumpa yëkuyankimantsu karqan,+desgraciapa pasëkäyaptinqa, ama kushipäyankimantsu karqan,desgraciapa pasar llakishqa këkäyaptinqa, ama cösasninkunata apakuyankimantsu karqan.+
14 Qeshpir ëwakoqkunata nänikunachö shuyëkur, ama wanutsiyankimantsu karqan,+desgraciapa pasëkäyanqanta musyëkarqa, ama kawëkaqkunatapis chikeqninkunaman entregayankimantsu karqan.+
15 Llapan nacionkunata noqa Jehovä juzganä tiempuqa chëkämunnam.+
Imanömi wakinkunata rurayarqëki, tsënöllam qamkunatapis rurayäshunki.+
Imanömi jukkunata tratayarqëki, tsënöllam qamkunatapis tratayäshunki.
16 Imanömi sagrädu jirkächö upuyarqëki,tsënöllam llapan nacionkuna seguïdu upuyanqa.+
Allim upuyanqay tsëpitam ushakäyanqa.
17 Peru salvakoqkunaqa Sion jirkachömi kayanqa,+Sion jirkaqa sagrädunam kanqa.+
Jacobpa kastankunaqa yapëmi herenciankunaman kutiyanqa.+
18 Jacobpa y Josëpa kastankunaqa* ninanömi kayanqa.
Peru Esaüpa kastankunaqa tsakishqa raströjunömi kayanqa.
Tsëmi ninawan llapanta ushakätsiyanqa.
Y noqa Jehovä nishqa kaptïmi,Esaüpa+ kastankunaqa llapan ushakäyanqa.
19 Jacobpa y Josëpa kastankunam, Nëguebchö markakunapa, Esaüpa+ kastankuna täkuyanqan* jirkakunapa,Sefelächö markakunapa y filisteukunapa+ markankunapa duëñun tikrayanqa.
Efrainpa kastankuna muruyanqan chakrakuna y Samariachö+ chakrakunapis pëkunapanam kanqa.
Benjaminpa kastankunanam Galaadchö markakunapa duëñun tikrayanqa.
20 Alli murallashqa markachö prësu këkaq israelïtakunapam,+cananeukunapa llapan markankuna kanqa Sarepta+ markayaq.
Y Sefaradchö këkaq Jerusalen nunakunapanam, Nëguebchö+ llapan markakuna kanqa.
21 Jirkakunachö kawaq Esaüpa+ kastankunata juzgayänampaqmi,dirigentikuna Sion jirkaman witsäyanqa.
Y noqa Jehovällanam gobernanti kashaq”.+
Nötakuna
^ Tsë jutiqa, “Jehoväta sirweq” ninanmi.
^ Kënöpis niyanmi: tärar; pärar.
^ Kënöpis niyanmi: Ankanö; Pichakanö.
^ Capaz “volayaptikipis” ninan.
^ Hebreu idiömachöqa “wayinkunaqa” ninmi.
^ Kënöpis niyanmi: täräyanqan; pärayanqan.
