Cantar de los Cantäres 5:1-16
5 Mitsikoq jövinmi kënö nin: “Kuyë noviallä, alläpam kuyaq.*
Huertämanmi yëkurqö,+shumaq pukutaq o mushkoq mïrrata y balsamutam pallamurqö.+
Panalpita shutuykaq mieltam mikumurqö, y vïnutapis, lichitapis upumurqömi”.+
Jerusalenpita warmikunam kënö niyan:
“¡Kuyë amïgalläkuna y amïgulläkuna kushishqa mikuyë y upuyë!
¡Juiciuykikunatapis oqrayanqëkiyaq kuyanakuyë!”.+
2 Sulamïta shipashmi kënö nin: “Punuykarpis shonqüchöqa pëllamanmi pensëkarqä.+
Suëñuynïchömi wiyarqä kuyanqä jövin kënö qayamaqta:
‘¡Kuyëllapaq palumïta, shonqu suwa shipash, alläpam kuyaq!*
¡Punkuykita kicharamuy!
Paqaspa shamushqa kaptïmi peqäpis o umäpis shullyawan* oqupüru këkan.
Aqtsäpitapis yakum shutuykan’.+
3 Chakïtam yakuwan awishqana* karqä.
Yarqurqa, chakïtachi allpatäriman karqan.
Röpätapis cambiakushqanam karqä,yapë cambiakuytaqa qelanarqänam.
4 Kuyanqä jövinqa makinwan punkuta kichamuyta munëkanqanchö dejarirqan.
Noqaqa alläpam rikëta munarqä.
5 Punkuta kichapunäpaqmi jinan höra sharkurqä.
Makïpita y dëdükunapitam,shumaq pukutaq o mushkoq mïrra shuturqan.
Punkupa aldäbampis, yatëkuptïmi oqupüru tikrarirqan.
6 Peru punkuta kicharirqa manam rikarqänatsu,kuyanqä jövinqa ëwakushqanam kanaq.
Ëwakushqa kanqanta rikëkurqa manam imanö këtapis puëdirqätsu.*
Mëläya ashirpis manam tarirqätsu.+
Qayaptïpis manam contestamarqantsu.
7 Tsënö purikarmi markata cuidar purikaq guardiakunawan tinkurqä,y pëkunaqa maqayämarqanmi.
Murällakunachö cuidakoq guardiakunanam jaküta* apakuyarqan.
8 Jerusalen warmikuna rogakuyashqëki,*kuyanqä jövinta rikarqa ashikanqäta willëkuyanki.
Pëpaq yarparkurqa wanukuytapis munämi”.
9 Jerusalenpita warmikunanam kënö niyan:
“Qamqa wakin shipashkunapitapis mas shumaqmi kanki.
¿Imanirtan tsëläya rogakayämanki? ¿Imanirtan tsë jövintaqa alläpa kuyanki?
¿Imanirtan qampaqqa wakin jövinkunapitapis mas shumaq tsë jövin?”.
10 Sulamïta shipashnam kënö nin: “Kuyanqä jövinqa alläpa shumaqmi y kallpasapam.*
Diez mil nunakuna kayaptimpis pëmi mas mejorqa.
11 Cäranqa örunö shumaqmi, alli kaq örunö shumaq.
Aqtsannam vientuwan kuyuykaq palmëranö,* alläpa yanam, cuervu pishqukunanö yanam.
12 Nawinkunaqa, mayu* kuchunchö këkaq palumakunanömi,lichichö bañakuykaq palumakunanö,atska yakuyoq pözu lädunchö këkaq palumakunanö.
13 Cäranqa shumaq pukutaq o mushkoq wëtakuna këkanqan huertanömi,*+pukutaq plantakuna këkanqan huertanö.
Shiminnam liriu wëtanö, tsëpitam shumaq mushkoq mïrra shutuykan.+
14 Makinkunapis örupitam, y crisölitu rumiwan adornashqam këkan.
Pachannam zafïru rumiwan adornashqa y alli chipapätsishqa marfilnö.*
15 Chakinkunaqa alli kaq örupitam y chankankunanam marmolpita columnanö.
Pëqa Lïbanunö y cedrukunanö+ alläpa shumaqmi. Pëwanqa manam ni pï igualantsu.
16 Shiminqa mielnöraqmi mishkin.
Pëqa alläpa kuyakuyllapaqmi.+
Jerusalen warmikuna, tsënömi kuyanqä jövinqa.
Tsëmi pëtaqa alläpa kuyëkü”.
Nötakuna
^ Kënöpis niyanmi: kuyä.
^ Kënöpis niyanmi: kuyä.
^ Kënöpis niyanmi: shullawan; shushalwan; shushawan.
^ Kënöpis niyanmi: paqashqana; mayllashqana.
^ O capazchi “parlapämanqanta wiyarirqa, wanuytapis munarqämi”.
^ O “chalnïta”.
^ Hebreu idiömachöqa “äniyämë” ninmi.
^ O “manam qeshyapäkuntsu”.
^ O capazchi “palmërapa sarta frütankunanö”.
^ Kënöpis niyanmi: riu.
^ O “cuadru cuadru rurashqachö këkaq plantakunanömi”.
^ Marfilqa elefantipa colmillunmi karqan.
