Hëchus 19:1-41
19 Apölus+ Corintuchö këkanqanyaqmi, Pabluqa jirkakunapa ëwaq nänipa pasar Ëfesuman+ urarqan. Tsëchömi juk ishkë creikoqkunata tarir,
2 “¿creikoq tikrarqa santu espïrituta chaskiyarqëkiku?”+ nir tapurqan. Pëkunanam, “¡santu espïritu kanqantaqa manam imëpis wiyayarqötsu!” nir contestayarqan.
3 Tsënam pëqa, “tsëqa, ¿ima bautismutataq bautizakuyarqunki?”+ nirqan. Pëkunanam, “Juan willakunqan bautismuwanmi” niyarqan.
4 Tsënam Pabluqa kënö nirqan: “Juanqa arrepentikuyanqanta rikätsikuyänampaqmi nunakunata bautizarqan,+ y qepanta shamoq kaqman o Jesusman creiyänampaqmi+ pëkunata nirqan”.
5 Tsëta wiyëkurnam, pëkunaqa Señor Jesuspa jutinchö bautizakuyarqan.
6 Pëkunaman Pablu makinta churaptinnam santu espïrituta chaskir,+ atska idiömachö parlar y Teyta Dios willakunqanta musyatsikur qallëkuyarqan.+
7 Llapan ollqukunaqa döcinömi kayarqan.
8 Pabluqa Diosta adorayänan wayiman yëkurmi,+ yachatsikur y cläru entienditsikur kima killapa mana mantsakur Teyta Diospa Gobiernumpita parlarqan.+
9 Peru wakinqa rumi shonqu karmi creikuyta munayarqantsu,* y nunakuna jananchömi Rasumpa Kaq Näni+ niyanqanchö kaqkunapaq mana allita parlayaq. Tsëmi pëkunata dejëkur+ creikoqkunata pëkunapita rakirqan, y llapan junaqkunam Tiränupa escuëlampa sälanchö yachatsikoq.
10 Ishkë watapa tsëta rurar kaptinmi, Asia provinciachö kawaq judïukuna y griëgu nunakunaqa, Teyta Diospa palabranta wiyayarqan.
11 Diosqa Pabluwanmi alläpa espantëpaq milagrukunata rurar sïguirqan.+
12 Pablupa cuerpun topanqan päñukunata+ y mandilkunatapis qeshyëkaqkunamanmi apayaq, tsënömi qeshyankunapita alliyäyaq y mana alli espïritukunapis pëkunapita yarquyaq.+
13 Markan markan demoniukunata qarqur ëwaq wakin judïukunapis, nunakunaman yëkushqa mana alli espïritukunata Señor Jesuspa jutinchö qarquyta munarmi kënö niyaq: “Pablu willakunqan Jesuspa jutinchömi, yarquyänëkipaq qamkunata mandayaq”.*+
14 Tsënömi Escëva jutiyoq mandakoq judïu sacerdötipa qanchis tsurinkuna rurayaq.
15 Tsënö kaptimpis, juk mana alli espïrituqa kënö nirmi pëkunata contestarqan: “Jesustaqa reqïmi,+ y musyämi Pablu pï kanqantapis,+ peru qamkunaqa, ¿pikunatan kayanki?”.
16 Tsëpitanam mana alli espïrituyoq nunaqa janankunaman saltëkur, jukpa jukpa llapankunata vencirqan. Tsënam pëkunaqa, qalapächu y maqar ushashqa tsë wayipita qeshpir ëwakuyarqan.
17 Tsë pasanqantaqa, Ëfesuchö judïukuna y griëgu nunakunapis llapanmi musyariyarqan. Tsëmi llapankuna alläpa mantsakäyarqan y Señor Jesuspa jutinqa imëpitapis masmi reqishqa tikrarqan.
18 Llapan creikoq tikraqkunam jutsankunata* musyatsikoq y mana allikunata rurayanqanta willakoq ëwayaq.
19 Awmi, mëtsikaq magia ruraqkunam librunkunata juntëkur, llapankunapa puntanchö ninawan ushakätsiyarqan.+ Tsë llapan ëka cuestanqanta jipirqa, cincuenta mil yuraq pläta qellë välinqantam musyariyarqan.
20 Tsënömi Teyta Jehoväpa* palabranqa, mëtsëman char y imëkata vencir sïguirqan.+
21 Tsë llapan pasariptinnam, Pabluqa shonqunchö pensarqan Macedoniapa+ y Acäyapa pasar Jerusalenman viajanampaq,+ y kënöpis nirqanmi: “Tsëta ëwarqa, Römatapis ëwanämi”.+
22 Tsëmi ishkaq sirweqninkunata, awmi, Timoteutawan+ Erastuta+ Macedoniaman mandarqan. Tsënö kaptimpis, kikinqa Asia provinciachömi juk tiempupa quedakurqan.
23 Tsë witsanmi Rasumpa Kaq Näni+ niyanqanchö këkaqkunapa contran büllata rurar sharkuyarqan.*+
24 Artemispa templuntanö taksha templukunata plätapita ruraq Demetriu jutiyoq nunam, plätawan trabajaqkunata mëtsika qellëta ganatseq.+
25 Tsënam pëkunata y tsëtanö rurar trabajaqkunata juntëkur kënö nirqan: “Teytakuna, qamkunaqa allim musyayanki kë negociuntsikwan qellëta gananqantsikta.
26 Peru kanan rikëkäyanqëkinö y wiyëkäyanqëkinöpis kë Pabluqa manam Ëfesullachötsu,+ sinöqa cäsi llapan Asia provinciachömi, makiwan rurashqa dioskunaqa mana rasumpa dioskuna kayanqanta nir mëtsikaq nunakunata juknöpa pensatsishqa.+
27 Tsëpitapis masqa, tsëkuna sïguinanta dejashqaqa, manam negociuntsikllapaqtsu mana allita parlayanqa, sinöqa puëdeq diösa Artemispa templuntapis mana kaqpaqmi churayanqa, entëru Asia provinciachö y entëru patsachö adorashqa këkarmi, Pablu ninqanrëkur alabashqanatsu kanqa”.
28 Tsëta wiyëkurnam nunakunaqa alläpa cölerar fuertipa, “¡alläpa puëdeqmi Ëfesuchö Artemisqa!”* niyarqan.
29 Tsënam markachö nunakunaqa büllar qallëkuyarqan, y Pabluwan viajar ëwaq Macedoniapita Gäyutawan Aristarcuta+ qaracharkurmi, llapankuna cörripa teatruman yëkukuykuyarqan.
30 Pablupis nunakuna këkäyanqanmanmi yëkuyta munarqan, peru creikoqkunaqa manam dejayarqantsu.
31 Fiestakunata y pukllakunata patsätseqkunapis, pëwan amïgu karmi, teatruman yëkur vïdanta peligruman mana churanampaq nunakunata mandar rogayarqan.
32 Tsëyaqnam juntakashqa këkaqkunaqa pantashqa karnin y cäsi llapan imarëkur juntakashqa kayanqanta mana musyar, wakinkuna fuertipa jukta niyaq y wakinkunana jukta niyaq.
33 Judïukuna frentiman tanqëkuyaptinnam, wakin nunakunaqa Alejandruta parlanampaq niyarqan, y Alejandruqa nunakunapa puntanchö defendikuyta munarmi makinwan sëñasta rurarqan.
34 Peru judïu kanqanta musyëkurmi, llapankuna juknölla büllar qallëkuyarqan, y ishkë hörapanömi, “¡alläpa puëdeqmi Ëfesu nunakunapa Artemisninkunaqa!” niyarqan.
35 Mëtsika nunakuna upälläyänanta logrëkurnam, tsë markachö alcaldiqa kënö nirqan: “Ëfesu ollqukuna, ¿pï nunatan musyantsu Ëfesu markaqa alläpa puëdeq Artemispa templumpa y ciëlupita jeqamoq imäginpa täpaqnin kanqanta?
36 Mana ni pï tsënö kanqanta mana nikaptinqa, tranquïlu kayë y ama imatapis ras o sas rurayëtsu.
37 Këman apayämunqëki ollqukunaqa, manam templukunata suwakoqtsu kayan, y manam diösantsikpaqpis mana allita parlayashqatsu.
38 Tsëmi Demetriu+ y pëwan këkaq plätawan trabajaqkuna pitapis acusëta munayaptinqa, kanmi juezkuna juiciuta rurayänan junaqkuna y provinciata gobernaqkunapis.* Tsë junaqkunachö jukkunapita quejakuyätsun.
39 Peru tsëpita masta ashikäyaptikiqa, ley mandakunqannömi llapan nunakuna juntakëkur-raq tsëkunata rikäyänan.
40 Kanan junaq pasëkanqampitaqa, imanir büllar këkanqantsikta mana nita puëdishqam, gobiernupa contran këkanqantsikta nirpis tumpamënintsikta puëdiyanqa”.
41 Tsënö nirmi, tsëchö juntarëkaq nunakunata ëwakuyänampaq nirqan.
Nötakuna
^ O “shonqunkunata chukruyätsirmi creikuyta munayarqantsu”.
^ Kënöpis niyanmi: mandä.
^ Kënöpis niyanmi: pecädunkunata.
^ Kënöpis niyanmi: ichirkuyarqan.
^ Griëgu idiömachöqa “Ëfesu nunakunapa Artemisninqa” ninmi.
^ O “proconsulkunapis”. Rikäri “Bibliachö palabrakunata entiendinapaq” neqta.