Hëchus 2:1-47
2 Pentecostes Fiesta junaqnam,+ llapankuna juntu juk sitiullachö këkäyarqan.
2 Tsënam illaqpita shukukuy vientunöraq ciëlupita bunrurümur tëkäyanqan wayi junta wiyakarqan.+
3 Y qallunö ninakuna yurir wakpa këpa rakikar cada ünupa jananman churakaqtam rikäyarqan.
4 Llapankunam santu espïrituta chaskiyarqan,+ y santu espïritu yanapanqannömi tukuyläya idiömata parlar qallëkuyarqan.+
5 Tsë witsanqa, entëru patsachö nacionkunapita llapan shonqunkunawan Teyta Diosta sirweq judïukunam Jerusalenchö këkäyarqan.+
6 Tsëmi tsë bunruroq wiyakaptin, kikinkunapa idiömankunachö Jesuspa qateqninkuna parlapäyanqanta wiyar, mëtsikaq nunakuna alläpa mantsakashqa juntakäyarqan.
7 Awmi, alläpa espantakurmi kënö niyarqan: “Rikäyë kë llapan parlëkaq nunakunata, Galilëapita+ nunakunam kayan, ¿aw?
8 Tsëqa, ¿imanöpatan wiyëkantsik yurikunqantsikpita cada ünu parlanqantsik idiömachö parlayanqanta?
9 Këchöqa këkantsik Partiapita, Mediapita+ y Elampita+ nunakunam, Mesopotamiachö, Judëachö, Capadociachö, Pontuchö y Asia provinciachö kawaqkunam.+
10 Këchömi këkäyan Frigiachö y Panfiliachö, Egiptuchö y Cirënipa amänun Libia kinrëchö kawaqkuna; Römapita wallka tiempullapa shamushqa judïukuna y judaismu religionman yëkoqkuna,+
11 Crëtapita nunakuna y Arabiapita nunakunapis, llapantsikmi Teyta Dios espantëpaqkunata ruranqampita idiömantsikchö parlayanqanta wiyëkantsik”.
12 Awmi, llapankunam espantashqa y mantsakashqa këkäyarqan, y kikinkunapuram, “¿imanirtan këqa pasakuykan?” nir parlayarqan.
13 Tsënö kaptimpis wakinkunaqa burlakurmi, “mishkeq vïnuwanmi* pasëpa* machashqa këkäyan” nir parlayarqan.
14 Peru Pëdruqa Onci+ apostolkunawan sharkurmi* fuertipa kënö nirqan: “Judëapita ollqukuna y Jerusalenchö kawaqkuna, ninqäkunata shumaq wiyayë y këta musyayë.
15 Rasumpa kaqchöqa, las nuëvi de la mañänanöllaran,* y pëkunaqa manam qamkuna niyanqëkinötsu machashqa këkäyan.
16 Tsëpa rantinqa, kë pasëkanqanwanqa, Diospa willakoqnin Joel kënö ninqanmi cumplikëkan.
17 Teyta Diosmi nin: ‘Ushanan tiempuchöqa tukuyläya nunakunatam podernïwan yanapashaq. Ollqu y warmi tsurinkunam willakoq kayanqa, jövin kaqkunanam revelacionta chaskiyanqa y edäna kaqkunam suëñukunata suëñukuyanqa.+
18 Tsë witsanqa, ollqu y warmi sirwimaqkunatapis, willakuyänampaqmi podernïwan yanapashaq.+
19 Ciëluchömi alläpa espantëpaqkunata rurashaq, y patsachömi milagrukunata rurashaq: yawarta, ninata y qoyëtam o qoshnitam rikäyanki.
20 Noqa Jehovä* nunakunata juzganä mantsëpaq y espantëpaq tiempu manaraq chämuptinqa, intipis o rupaypis manam aktsinqanatsu y killapis yawarmanmi tikranqa.
21 Noqa Jehoväpa* jutïman confiakoqkunaqa salvashqam kayanqa’.+
22 Israel nunakuna, këta wiyayë: qamkuna alli musyayanqëkinöpis, rikënikikunachö ruranqan milagrukunata y imëka espantëpaqkunata ruranampaq yanaparmi,+ Teyta Diosqa cläru musyatsiyäshurqëki Nazaretpita Jesusta kikin mandamushqa kanqanta.
23 Kë nunataqa Teyta Dios dispuninqannö y puntallapitana willakunqannömi chikeqninkunaman entregayarqan+ y pëtam mana allita ruraqkunawan qeruman warkutsir wanutsiyarqëki.+
24 Peru wanuyqa manam imanöpapis katsita puëdinmantsu karqan,+ tsëmi Teyta Diosqa wanuypa makimpita* salvar kawatsimurqan.+
25 Davidmi pëpaq kënö nin: ‘Teyta Jehovätaqa,* puntächö këkaqtanömi imëpis rikä. Derëcha kaq lädüchö pë këkaptinqa, manam imapis pasamanqatsu.
26 Tsëmi shonqüpis alläpa kushikurqan, y kushikurmi shimïpis parlarqan. Noqaqa Teyta Diosman confiakurmi kawashaq.
27 Qamqa manam Sepultürachö* dejamankitsu. Y manam permitinkitsu llapan shonqunwan sirwishoqniki ismur ushakänanta.+
28 Imanö kawakunäpaqmi yachatsimanki. Läduykichö* këkarqa, alläpa kushishqam kashaq’.+
29 Wawqikuna, unë awiluntsik Davidpita cläru parlapäyänaqta permitïkayämë. Pëtaqa wanukuptinmi pampayarqan,+ y sepultüranqa markantsikchömi kanan junaqyaq këkan.
30 Pëqa Teyta Diospa willakoqnin kar, y tsëpita yureq kastan gobernar täkunanchö jamakunampaq kaqta Teyta Dios jurar äninqanta musyarmi,+
31 puntallapitana Cristu kawarimunampaq kaqta musyarqan, Sepultürachö* mana qonqashqa kanampaq kaqta y ëtsampis ismur mana ushakänampaq kaqtam willakurqan.+
32 Tsë Jesustam Teyta Diosqa kawaritsimurqan, y llapäkunam tsënö pasanqanta rikaq testïgukuna kayä.+
33 Tsëmi ciëluta ëwakunqampita Teyta Diospa derëcha lädunchö kar+ y änikunqan santu espïrituta Teytapita chaskishqa kar,+ kë rikëkäyanqëkita y wiyëkäyanqëkita mandamushqa.
34 Davidqa manam ciëluman witsarqantsu, peru kikinmi kënö nin: ‘Jehovä* Diosmi Mandakoq Teytalläta kënö nirqan: “Derëcha lädüman jamakamuy,
35 llapan chikiyäshoqnikikunata chakiki jawanman* churamunqäyaq”’.+
36 Tsëmi llapan Israel nunakuna alli cläru musyayätsun, qamkuna qeruchö wanutsiyanqëki Jesusta,+ Señor kanampaq y Cristu kanampaq Teyta Dios churanqanta”.+
37 Tsëta wiyëkurnam shonqunkunachö alläpa llakikur Pëdrutawan wakin apostolkunata, “wawqikuna, ¿imatataq rurayäshaq?” nir tapuyarqan.
38 Tsënam Pëdruqa pëkunata kënö nirqan: “Arrepentikuyë,+ y jutsëkikunapita* perdonashqa kayänëkipaq,+ cada ünu Jesucristupa jutinchö bautizakuyë,+ tsëqa Teyta Dios qarakunqan* santu espïritutam chaskiyanki.
39 Teyta Dios änikunqanqa,+ qamkunapaq, tsurikikunapaq, karuchö këkaqkunapaq y Jehovä* Diosnintsik llapan qayanqan kaqkunapaqmi”.+
40 Maskunata parlarmi llapanta cläru musyatsirqan, y “salvakuyta munarqa, ama kanan witsan mana allita ruraq nunakunanö kayëtsu”+ nirmi consejarqan.
41 Tsëmi Pëdru ninqanta shumaq chaskikoqkunaqa bautizakuyarqan.+ Tsë junaqqa tres milnö nunakunam Jesuspa qateqnin tikrayarqan.+
42 Y apostolkuna yachatsikuyanqanta wiyakur, juntakar,* mikur+ y Teyta Diosman mañakurmi imëpis këkäyarqan.+
43 Rasumpa kaqchöqa, llapan nunakunam mantsakar qallëkuyarqan, apostolkunaqa alläpa espantëpaqkunata y milagrukunata rurarmi qallëkuyarqan.+
44 Llapan creikoq tikraqkunam juntu këkäyarqan, y imëkankunatam rakipänakuyaq,
45 chakrankunata y imëkankunata rantikuykurmi,+ cada ünuta wanayanqanmannö* tsë qellëta entregayarqan.+
46 Y waran waranmi juk yarpëyoqlla mana dejëta templuman ëwayaq. Jukpa jukpa wayinchömi mikuyaq y shonqupitam kushishqa mikuyninkunata qaranakuyaq.
47 Tsënömi Teyta Diosta alabayarqan y nunakunapa rikëninchöpis alli këkäyarqan. Tsëyaqmi Teyta Jehoväqa* cada junaq salvakoqkunata Jesuspa qateqninkunaman yapakätsirqan.+
Nötakuna
^ O “llullu vïnuwanmi”.
^ Kënöpis niyanmi: jankat.
^ Kënöpis niyanmi: ichirkurmi.
^ Griëgu idiömachöqa “3 kaq höranö” ninmi. Tsëtaqa patsa waranqampitam yupayaq.
^ O “podernimpita”.
^ O “Hädeschö”. Rikäri “Bibliachö palabrakunata entiendinapaq” neqta.
^ O “Rikënikichö”.
^ O “Hädeschö”. Rikäri “Bibliachö palabrakunata entiendinapaq” neqta.
^ Kënöpis niyanmi: qopinman.
^ O “debaldilla qarakunqan”.
^ Kënöpis niyanmi: pecäduykikunapita.
^ O “qaranakur”.
^ Kënöpis niyanmi: necesitäyanqanmannö.
