Hëchus 20:1-38
20 Büllëkaqkuna upällaskiyaptinnam, Pabluqa creikoqkunata qayatsirqan. Tsëpitanam kallpayoq kayänampaq yanaparir y pëkunapita despidikurir Macedoniata ëwakurqan.
2 Tsë kinrëpa pasar tsëkunachö creikoqkunata kallpayoq kayänampaq yanapëkurnam Greciaman charqan.
3 Kima killam tsëchö quedakurqan. Tsënö kaptimpis barcuwan Siriata ëwanampaq këkaptinmi, judïukunaqa+ wanutsiyänampaq yachatsinakuyarqan, tsëmi Macedoniapa kutikunampaq decidirqan.
4 Pëwan ëwaqkunam kayarqan: Berëa markapita Pïrrupa tsurin Söpater, Tesalönicapita Aristarcuwan+ Segundu, Derbi markapita Gäyu, Timoteu,+ y Asia provinciapita Tïquicuwan+ Tröfimu.+
5 Pëkunaqa puntata ëwarmi, Tröas markachö shuyäyämarqan.
6 Noqakunanam Levadürannaq+ Tantata Mikuyänan Fiesta pasariptin, Filïpus markapita barcuwan ëwar pëkuna këkäyanqan Tröas markaman pitsqa junaqta chäyarqä y tsëchömi qanchis junaq quedakuyarqä.
7 Semäna qallanan junaq mikuyänäpaq juntarëkäyaptïnam, waränin junaq ëwakunan kaptin tsëchö këkaqkunata Pablu parlapar qallëkurqan, y pullan paqasyaqmi yachatsikur këkarqan.
8 Tsëmi juntarëkäyanqä altus cuartuchöqa atska chiwchikuna karqan.
9 Pablu yachatsikuykaptinmi Eutïcu jutiyoq jövin ventänachö tëkar punukärirqan y punuy venciptinmi kima kaq pïsupita patsaman jeqarkurqan y wanushqatanam pallarkayämurqan.*
10 Tsënam Pabluqa bajarkur jananman jitakëkur waqurkurqan o makallarkurqan+ y kënömi nirqan: “Ama mantsakäyëtsu, pëqa kawëkanmi”.+
11 Tsëpitanam yapë witsar, tantata pakir mikur qallëkurqan. Patsa waranqanyaq atska tiempupa pëkunata parlapëkurnam Pabluqa ëwakurqan.
12 Tsënam jövinta kawëkaqtana apakuyarqan, y alläpam kushikuyarqan.
13 Tsëpitanam noqakunaqa ëwar barcuman yëkur Ason markayaq ëwayarqä, tsëchömi Pabluqa barcuman yëkamunan karqan. Tsë sitiuyaq chakipa ëwëta munarmi, pëqa tsënö rurayänäpaq mandayämarqan.
14 Ason markachö taripäyämaptinnam, ëwëkäyanqä barcuman yëkaratsir Mitilëni islata ëwayarqä.
15 Waränin junaqnam, tsë sitiupita barcuwan ëwar Quïos islapa frentinchö pärayarqä. Waränin junaqnam, Sämus islachö juk rätu pärayarqä, y mas waränin junaqnam, Milëtu markaman chäyarqä.
16 Asia provinciachö mana alläpa tiempu kanampaqmi, Pabluqa Ëfesu+ markachö pärëta munarqantsu. Puëdirqa Pentecostes Fiesta junaqpaq Jerusalenman+ chëta munarmi, pëqa apurädu ëwëta munarqan.
17 Tsënö kaptimpis, Milëtu markachö këkarmi, anciänukunata* qayatsimunampaq Ëfesu markaman juk willakuyta apatsirqan.
18 Tinkuriyaptinnam pëkunata kënö nirqan: “Qamkunaqa allim musyayanki Asia provinciaman chämunqä junaqpita qamkunachö imanö portakunqäta.+
19 Noqaqa humildi shonquwanmi Señorta esclävunö sirwirqö+ y judïukuna yachatsinakur wanutsiyämëta munayaptinmi imëkata sufrir waqarqö.
20 Tsënö kaptimpis, biennikikunapaq kaqkunata qamkunata willëta y nunakunapa puntanchö+ y wayin wayin+ qamkunata yachatsitaqa manam dejarqötsu.
21 Tsëpa rantinqa, judïukunata y griëgu nunakunatapis, arrepentikur+ Teyta Diosman kutiyänampaq y Señor Jesusman markäkuyänampaqmi o yärakuyänampaqmi cläru yachatsirqö.+
22 Peru kananqa, santu espïritu pushamaptinmi, tsëchö ima pasamänampaq kaqta mana musyarpis, Jerusalenman kutikä.
23 Tsënö kaptimpis, markan markanmi santu espïrituqa carcelayämänampaq kaqta, y imëkata sufrinäpaq kaqta kutin kutin willaman.+
24 Tsënö kaptimpis, cörrikanqä carrërata ushë,+ y Teyta Dios alläpa alli kanqampita alli noticiakunata llapankunata musyatsinäpaq Señor Jesuspita chaskinqä sagrädu rurëta ushëmi, noqapaqqa kikïpa vïdäpitapis mas välin.
25 Kananqa musyämi Diospa Gobiernumpita willanqä kaqkunapita mëqëkipis yapëqa manana rikäyämänëkipaq kaqta.
26 Tsëmi qamkunata qayëkäyaq,* mëqan nunapis wanunqampita o wañunqampita mana culpayoq kanqäta* testïgu kayänëkipaq.+
27 Noqaqa manam dejarqötsu Teyta Dios llapan munanqanta* willayënikita.+
28 Kikikikunapis cuidakur+ Diospa üshannö kaqkunata cuidayë. Musyayanqëkinöpis Tsurimpa yawarninwan rantinqan+ Diospa congregacionninchö këkaqkunata cuidayänëkipaqmi,+ santu espïrituqa anciänu*+ kayänëkipaq churayäshurqunki.
29 Noqaqa musyämi ëwakushqächö mantsëpaq atoqnö* nunakuna qamkunaman yëkamur+ Teyta Diospa üshannö kaqkunata mana shumaq tratayänampaq kaqta,
30 y qamkunachö këkaq ollqukunam, creikoqkuna pëkunata qatiyänampaq llutankunata parlayanqa.+
31 Tsëmi alkäbu alkäbu këkäyë y yarpäyë kima watapa waqar+ paqasta junaqta cada ünuta consëjayanqaqta.
32 Kananqa Teyta Dios y alläpa alli kanqampita willakoq palabran qamkunata cuidëkuyäshuy. Tsë palabraqa kallpayoq kayänëkipaq* y limpiu kaqkunapaq* herenciata chaskiyänëkipaqmi yanapayäshunki.+
33 Noqaqa manam pipa qellëninta ni örunta ni röpanta munaparqötsu.+
34 Qamkunaqa musyayankim wananqäkunapaq* y noqawan pureqkuna wanayanqampaq kikï trabajanqäta.+
35 Llapan ruranqanchömi qamkunata cläru rikätsiyarqoq,* tsënö alli trabajarnin kallpannaq këkaqkunata yanapayänëkipaq,+ y Señor Jesus kënö ninqantam imëpis yarpäyänëki: ‘Imatapis chaskir kushikunqantsikpitaqa, imatapis qarakurmi+ masqa kushikuntsik’”.
36 Tsëkunata nïkurnam, llapankunawan qonqurikuykur Teyta Diosman mañakurqan.
37 Tsënam llapankuna waqar Pabluta waquyarqan o makallayarqan* y kuyëpa mutsayarqan.
38 Yapëqa manana rikäyänampaq kaqta nishqa kaptinmi, pëkunaqa alläpa llakitsishqa këkäyarqan.+ Tsëpitanam pëwan juntu barcuyaq ëwayarqan.
Nötakuna
^ Kënöpis niyanmi: joqarkayämurqan.
^ O “cristiänukunata dirigeqkunata”.
^ Griëgu idiömachöqa “nunakunapa yawarnimpita limpiu kanqäta” ninmi.
^ Kënöpis niyanmi: qayëkä.
^ O “Diospa voluntäninta”.
^ O “cristiänukunata dirigeq”.
^ Griëgu idiömachöqa “löbunö” ninmi. Tsë animalqa atoq niraqmi, peru mas jatunmi.
^ O “Diospa kaqchö alli kayänëkipaq”.
^ O “Diospaq rakishqa kaqkunapaq”.
^ Kënöpis niyanmi: necesitanqäkunapaq.
^ Kënöpis niyanmi: rikätsirqö.
^ Griëgu idiömachöqa “kunkanmanmi warkukäyarqan” ninmi.
