Hëchus 3:1-26
3 Juk kutinam Pëdruwan Juanqa, las tres de la tardinö* mañakuyänan hörapaq templuman witsëkäyarqan,
2 y yurikunqampita cöju nunatam templuchö Shumaq niyanqan punkunman apëkäyarqan. Templuman yëkoqkunata limushnata mañakunampaqmi, llapan junaqkuna tsëman apayaq.
3 Pëdruwan Juan templuman yëkuyänampaqna këkaqta rikarnam, tsë nunaqa pëkunata limushnata mañakur qallëkurqan.
4 Tsënam Juanwan këkaq Pëdruqa, tsë nunata defrenti rikëkur, “rikäyämë” nirqan.
5 Tsënam pëqa imallatapis qarayänanta shuyarar, pëkunata defrenti rikararqan.
6 Pëdruqa kënömi nirqan: “Plätawan öruqa manam kapamantsu, peru kapamanqantam qaraq. ¡Nazaretpita Jesucristupa jutinchö, puri!”.+
7 Tsënö nirmi derëcha makimpita aptarkur sharkatsimurqan,*+ tsë höram chakinkuna y utsuputunkunaqa alliyaskirqan.+
8 Y juklla saltar sharkurmi+ purir qallëkurqan, y purir saltar y Teyta Diosta alabarmi pëkunawan juntu templuman yëkurqan.
9 Llapan nunakunam purikaqta y Teyta Diosta alabëkaqta rikäyarqan.
10 Tsëpitanam templuchö Shumaq Punku niyanqanchö+ limushnata mañakoq nuna kanqanta cuentata qokuyarqan, tsë nunata pasanqampitam alläpa mantsakashqa y espantashqa këkäyarqan.
11 Tsë nuna Pëdrupa y Juanpa makinkunapita tsarapakushqaraq këkaptinmi, nunakunaqa alläpa mantsakashqa, Salomonpa+ Pasadïzun niyanqanchö këkäyaptin, pëkunaman cörripa ëwayarqan.
12 Tsëta rikëkurmi Pëdruqa nunakunata kënö nirqan: “Israel nunakuna, ¿imanirtan alläpa espantakuyanki? ¿Imanirtan kikïkunapa podernïkunawan o llapan shonqükunawan Diosta sirwiyanqäpita kë nunata puritsishqa kayaptïnöpis mantsakashqa rikaräyämanki?
13 Unë kastantsikkuna Abrahanpa, Isaacpa y Jacobpa Diosninmi,+ Sirweqnin Jesusta+ mas puëdeq këman churashqa.+ Pëtam qamkunaqa chikeqninkunaman entregayarqëki,+ y Pilätu libri dejëta munëkaptinmi rikëninchö despreciayarqëki.
14 Awmi, qamkunaqa tsë limpiu y allita ruraq nunata despreciarmi, asesïnu nunata libri dejanampaq mañakuyarqëki,+
15 y kawëman chätsikoq Pushakoqtam wanutsiyarqëki o wañutsiyarqëki.+ Peru Teyta Diosqa wanushqampitam kawatsimushqa, y noqakunam tsëta rikaq testïgukuna kayä.+
16 Pëpa jutinrëkur y jutinman markäkuyanqärëkurmi o yärakuyanqärëkurmi, kë rikëkäyanqëki y reqiyanqëki nunaqa alliyärishqa. Pëman markäkuyanqärëkurmi, kë nunaqa qamkunapa puntëkikunachö alliyashqa.
17 Wawqikuna, musyämi gobernadornikikuna+ rurayanqannölla qamkunapis mana musyar tsëta rurayanqëkita.+
18 Peru tsënömi Teyta Diosqa, llapan willakoqninkunawan Cristun sufrinampaq kaqta puntallapitana willakunqanta cumplitsishqa.+
19 Tsëqa arrepentikuyë,+ y jutsëkikunapita* perdonashqa kayänëkipaq+ Teyta Diosman kutiyë,+ tsënöpa kikin Teyta Jehoväpita* yamë këta tariyänëkipaq,
20 y qamkunata yanapayäshunëkipaq churanqan Cristu Jesusta mandamunampaq.
21 Unë witsan limpiu willakoqninkunawan Teyta Dios willakunqannölla, imëkapis unë kanqanman kutinqan tiempuyaqmi pëqa ciëluchö këkanqa.*
22 Rasumpa kaqchöqa, Moisespis kënömi nirqan: ‘Teyta Jehoväqa* qamkunapitam noqanö juk willakoqta churamunqa,+ pë ninqantam wiyakuyänëki, y llapan niyäshunqëkitam rurayänëki.+
23 Rasumpa kaqchöqa, tsë Willakoq parlanqanta pï nunapis mana cäsukuptinqa, Teyta Diosmi ushakätsinqa’.+
24 Teyta Diospa llapan willakoqninkunam, Samuelpita qallëkur, kë junaqkunapaq cläru willakuyarqan.+
25 Qamkunaqa tsë willakoqninkunapa tsurinkuna, y unë kastëkikunawan acuerduta rurar+ Teyta Dios änikunqan herenciata chaskeqkunam kayanki. Tsë acuerduta rurarmi Abrahanta kënö nirqan: ‘Qampa kastëkiwanmi patsachö llapan familiakuna bendicionta chaskiyanqa’.+
26 Tsë Sirweqninta carguman churarkurmi, Teyta Diosqa mana alli rurëkunata dejëchö yanapayäshunëkipaq, qamkunaman puntata mandamurqan”.+
Nötakuna
^ Griëgu idiömachöqa “9 kaq höra” ninmi. Tsëtaqa patsa waranqampitam yupayaq.
^ Kënöpis niyanmi: ichirkatsimurqan.
^ Kënöpis niyanmi: pecäduykikunapita.
^ O “pëtaqa ciëluchö katsinan”.
