Hebrëus 1:1-14
1 Unë witsanchömi Teyta Diosqa willakoqninkunawan mëtsika kuti y imëkanöpa unë kastantsikkunata parlaparqan.+
2 Kë ushanan tiempuchöqa Tsurinwanmi parlapämashqantsik,+ pëtam herenciatanö imëkata chaskinampaq akrashqa,+ pëwanmi ciëluchö y patsachö llapan kaqkunata* rurarqan.+
3 Pëmi Teyta Diospa chipapäkuykaq poderninta+ y imanö kanqanta cläru rikätsikun.+ Poderyoq palabranwanmi llapanta tsarëkan.*+ Jutsantsikpita* limpiuyätsimarnintsikmi ciëluchö Teyta Diospa derëcha lädunman jamakushqa.+
4 Tsëmi pëqa angelkunapitapis mas respetashqa këman chashqa+ y mas väleq jutita chaskishqa.+
5 ¿Mëqan angeltataq Teyta Diosqa imëllapis, “qammi tsurï kanki; noqam kanampitaqa teytëki kashaq”+ nirqan? O ¿“noqam Teytan kashaq y pëmi tsurï kanqa”+ nirqan?
6 Y Punta Tsurinta patsaman yapë mandamurmi kënö nin:+ “Teyta Diospa llapan angelninkuna respetar puntanman qonqurikuyätsun”.
7 Angelkunapaqnam kënö nin: “Angelninkunatam puëdeqta tikratsin, y sirweqninkunatam*+ rawrëkaq o lunyëkaq ninaman tikratsin”.+
8 Peru Tsuripaqqa kënömi nin: “Kikin Diosmi imëyaqpis gobernanëkipaq churashunki,+ qamqa gobernaqkuna mandakuyanqan tukrutam katsinki y gobernarqa justiciatam ruranki.
9 Qamtaqa allikuna rurëmi gustashunki y mana allikuna rurëtaqa melanankim, tsëmi Teyta Diosqa peqëkiman o umëkiman aceitita jichamur akrashurqunki,+ y wakin gobernaqkunapaq kushikunqampitapis qampaqmi masqa kushikushqa”.+
10 Kënöpis ninmi: “Qallananchöqa, Señorllä, qammi patsapa cimientunta patsätsirqëki, y makikiwanmi ciëlutapis rurarqëki.
11 Patsawan ciëlu ushakaptimpis qamqa këkankillam. Tsëkunaqa röpanö makwayarmi ushakäyanqa,
12 y largu röpata pitur juk sitiuman churaqnö y röpata cambiaqnömi cambianki. Peru qamqa imëpis kanqëkinöllam këkanki, y manam imëpis ushakankitsu”.+
13 Tsënö kaptimpis, ¿mëqan angelpaqtan imëllapis, “derëcha lädüman jamakamuy, llapan chikiyäshoqnikikunata chakiki jawanman* churamunqäyaq”+ nirqan?
14 ¿Manaku angelkunaqa Teyta Diosta sirweq* espïritukuna kayan+ y salvacionta chaskeqpaq kaqkunata yanapayänampaq Teyta Dios mandamushqa?
Nötakuna
^ O “imëkapis imanö këkanqankunata”. Rikäri “Bibliachö palabrakunata entiendinapaq” neqta.
^ Kënöpis niyanmi: achkurëkan.
^ Kënöpis niyanmi: Pecäduntsikpita.
^ O “wakinkunata sirweqkunatam”.
^ Kënöpis niyanmi: qopinman.
^ O “wakinkunata sirwiyänampaq”.
