Hebrëus 11:1-40
11 Markäkuyqa o yärakuyqa, imatapis shuyanqantsikta chaskinapaq kaqta següru këmi,+ y mana rikanqantsikkuna rasumpa kanqanta cläru* rikëmi.
2 Tsënö markäkoq o yärakoq kayaptinmi, Teyta Diosqa unë witsan nunakunata* shonqumpaqnö kayanqanta musyatsirqan.
3 Markäkurmi o yärakurmi rikantsik imëkapis imanö këkanqankunataqa, Teyta Dios parlanqanwan patsätsishqa kanqanta, tsëmi rikanqantsikkunaqa mana rikanqantsik kaqkunapita yurimushqa.
4 Markäkurmi o yärakurmi, Abelqa Cainpitapis mas valoryoq qarëta Teyta Diospaq aparqan.+ Tsënö markäkuptinmi, Teyta Diosqa apanqan qarëta chaskir, allita ruraq kanqanta musyatsirqan.+ Tsëmi wanushqana o wañushqana këkarpis, yärakunqanrëkur parlëkanraq.+
5 Markäkurmi o yärakurmi, Enocqa+ sufrir mana wanunampaq illakätsishqa karqan, Teyta Dios illakätsishqa kaptinmi yapëqa rikäyarqannatsu.+ Manaraq illakätsirmi Teyta Diosqa shonqumpaqnö kanqanta musyatsirqan.
6 Awmi, mana markäkoq o yärakoq karqa, manam ni pï Teyta Diospa shonqumpaqnö këta puëdintsu. Pï nunapis Teyta Diosta adoranampaq witeqqa, pë rasumpa kawanqanta y shonqupita asheqninkunata bendicinqantam creinan.+
7 Markäkurmi o yärakurmi, Noëqa+ manaraq rikäyanqankunapaq Teyta Dios willanqanta chaskir,+ Teyta Diosta alläpa respetar, wayinchö kawaqkuna salvakuyänampaq arcata rurarqan.+ Tsënö markäkoq karmi, mana cäsukoq nunakunata condenarqan+ y allita ruraq nuna tikrarqan.
8 Markäkurmi o yärakurmi, Abrahanqa+ Teyta Dios qayaptin herenciatanö chaskinampaq kaq sitiuman ëwakurqan. Mëta ëwanampaq kaqta mana musyarpis ëwarqanmi.+
9 Markäkurmi o yärakurmi, pëqa nunapa markanchönö,+ Teyta Dios äninqan markakunachö forastërunö kawarqan. Tsë änikuyllata chaskeq Isaacwan+ y Jacobwanmi, carpa* wayikunachö kawarqan.+
10 Abrahanqa rasumpa cimientuyoq markatam shuyarqan, tsë marka imanö kananta patsätseq* y ruraqqa Teyta Diosmi.+
11 Markäkurmi o yärakurmi, Särapis edäna këkarnin poderta chaskir qeshyaq tikrarqan.+ Tsënöqa karqan, äneqnin kaqman confiakushqa kaptinmi.
12 Tsënömi wanushqanöna o wañushqanöna këkaq juk nunallapita,+ ciëluchö mëtsika estrëllakunanö y lamar kuchunchö yupëtapis mana puëdipaq arënanö+ mëtsika wamrakuna yurirqan.+
13 Änikunqan cumplikanqanta mana rikëkarpis, llapankunam alli markäkuykar o yärakuykar wanuyarqan o wañuyarqan. Karullapita rikëkarpis+ kushishqam chaskikuyarqan,+ y patsachö mana reqishqa y juk tiempulla kawaq kayanqantam musyatsikuyarqan.
14 Tsënö parlaqkunaqa shonqupita kikinkunapaq juk sitiuta ashiyanqantam rikätsikuyan.
15 Peru dejayanqan sitiuman imëpis yarpararqa,+ kutikuyta puëdiyanmanmi karqan.
16 Tsënö kaptimpis kananqa mas alli sitiuta, awmi, ciëlupita shamoq sitiuta lograyänampaqmi kallpachakuyan. Tsëmi Diosninkuna kanqanta niyaptin, Teyta Diosqa pëkunapita penqakuntsu,+ y pëkunapaqmi juk markata alistashqa.+
17 Markäkurmi o yärakurmi, Abrahanqa pruëbaman churashqa karnin,+ imëka qarëtanö Isaacta entregarqan. Awmi, äninqanta kushishqa chaskeq nunam, japallan tsurinta qarëtanö entreguëta munarqan,+
18 pëta kënö nishqa këkaptimpis: “Kastëkikunaqa Isaacpitam kanqa”.+
19 Pëqa wanunqampita tsurinta Teyta Dios kawatsimuyta puëdinqantam musyarqan, awmi, wanuypita o wañuypita tsurinta yapë chaskeqnömi karqan, y tsëmi shamoq tiempuchö pasanampaq kaqta rikätsikurqan.+
20 Markäkurmi o yärakurmi, Isaacpis shamoq tiempuchö ima pasanampaq kaqta musyatsir, Jacobta+ y Esaüta bendicirqan.+
21 Markäkurmi o yärakurmi, Jacobqa wanunampaqna këkar,+ Josëpa tsurinkunata cada ünuta bendicirqan+ y tukrunta aptarkur Teyta Diosta adorarqan.+
22 Markäkurmi o yärakurmi, Josëqa wanunampaqna këkar, Israelpa tsurinkuna Egiptupita yarquyänampaq kaqta parlarqan, y pëpa tullunkunawan imata rurayänampaq mandakurqan.+
23 Markäkurmi o yärakurmi, Moisestaqa shumaq kanqanta rikar,+ yurinqampita kima killapa papäninkuna pakarätsiyarqan,+ y manam gobernaq mandakunqanta mantsayarqantsu.+
24 Markäkurmi o yärakurmi, Moisesqa mayorna këkar,+ Egiptuchö gobernaqpa warmi tsurimpa wamrannö reqishqa këta munarqantsu.+
25 Pëqa jutsa* ruraq cuerpun munanqanta rurar, juk tiempullapa kushikuyta akranampa rantinmi, Teyta Diospa sirweqninkunawan mana alli tratashqa këta akrarqan.
26 Tsëtaqa rurarqan, Akrashqanö mana allipa tratashqa këta, Egiptuchö imëkapitapis mas väleqpaq churarmi. Pëqa pägutanö chaskinampaq kaq premiutam imëpis rikararqan.
27 Mana rikakoq kaqta imëpis rikëkaq cuenta karmi,+ markäkur o yärakur Egiptuchö gobernaqta mana mantsar+ Egiptupita ëwakurqan.+
28 Markäkurmi o yärakurmi, Pascua Fiestata celebrayänampaq y punkunkunaman yawarta llushiyänampaq mandakuyta cäsukurqan, tsënöpa mayor tsurinkunata Teyta Diospa angelnin mana wanutsinampaq.+
29 Markäkurmi o yärakurmi, Puka lamarpa tsaki patsapanö tsimpayarqan.+ Tsëtam Egipciukunapis rurëta munayarqan, peru lamarchömi ushakäyarqan.+
30 Markäkur o yärakur nunakuna qanchis junaq entërumpa tumayaptinmi, Jericö markapa murällan juchur* ushakarqan.+
31 Markäkurmi o yärakurmi, qellëpaqrëkur jukwan jukwan kakoq* Rahab warmi, musyapakoq ëwaqkunata shumaq chaskishqa karnin, mana cäsukoqkunawan ushakarqantsu.+
32 ¿Ima mastaraq nïman? Tiempuchi faltanman Gedeonpaq,+ Baracpaq,+ Sansonpaq,+ Jeftëpaq+ y Davidpaq,+ tsënölla Samuelpaq+ y Diospa wakin willakoqninkunapaq parlaptïqa.
33 Markäkurmi o yärakurmi, gobernaqkunata venciyarqan,+ alli rurëta patsätsiyarqan, änikuykunata+ chaskiyarqan, leonkunapa shiminta tsapäyarqan,+
34 ninapis ruparqantsu,+ espädawan wanutsiyänampita o wañutsiyänampita salvakuyarqan,+ kallpannaq këkar kallpayoq tikrayarqan,+ guërrachö puëdeq tikrayarqan+ y chikeqnin soldädukunata qatikachäyarqan.+
35 Kayarqanmi familiankuna kawarimoqta chaskeq warmikuna,+ peru wakinkunataqa imëkata rurarmi sufritsiyarqan. Pëkunaqa mas alli kaq kawarimuyta lograyänampaqmi, libri kayänanrëkur creikuyanqanta negayarqantsu.
36 Awmi, wakintaqa insultayarqanmi, y astarmi ushayarqan, y tsëpitapis masqa cadenatsiyarqanmi,+ y carcelatsiyarqanmi.+
37 Wakintanam rumiwan tsampiyarqan o saqmayarqan,+ pruëbaman churayarqan, ishkëman trozayarqan y espädawan wanutsiyarqan.+ Wakinnam üshapa y cabrapa qaratsanwan vistishqa,+ faltapakur, imëkata sufrir+ y mana alli tratashqa wakpa këpa puriyarqan,+
38 y kë munduchö nunakunaqa manam pëkunata katsiyänampaqnötsu kayarqan. Tsunyaq sitiukunachö y jirkakunapam puriyarqan, machëkunachö+ y patsa rurin uchkukunachömi kawayarqan.
39 Tsënö kaptimpis, markäkoq o yärakoq kayanqanrëkur rikëninchö alli kayanqanta Teyta Dios musyatsishqa kaptimpis, manam änikuynin cumplikanqanta rikäyarqantsu,
40 puntallapitanam Teyta Diosqa noqantsikpaq mas allita rikashqa karqan,+ tsënöpa noqantsikpita mas puntata* pëkuna alliyätsishqa mana kayänampaq.
Nötakuna
^ O “cläru rikätsikoq pruëba”.
^ O “unë awiluntsikkunata”.
^ Kënöpis niyanmi: toldu.
^ O “patsätseq arquitectu”.
^ Kënöpis niyanmi: pecädu.
^ Kënöpis niyanmi: laqmar.
^ O “oqllanakoq”.
^ Griëgu idiömachöqa “aparti” ninmi.
