Hebrëus 4:1-16
4 Tsëmi jamana junaqchö jamanapaq änikuy këkaptinraqqa, cuidädu kayë, qamkunapita mëqëkipis mana lograqnö mana kayänëkipaq.+
2 Pëkunatanöllam noqantsiktapis alli noticiakunapita willamarqantsik,+ peru cäsukoq kaqkunawan markäkuyanqanchö o yärakuyanqanchö juknölla mana kayaptinmi, pëkunataqa wiyayanqan palabrakuna yanaparqantsu.
3 Peru markäkoqkunaqa o yärakoqkunaqa, patsachö nunakuna yurir qallayanqampita ruranqanta ushashqana kaptimpis,+ kikin “tsëmi cölerar nirqä: ‘Pëkunaqa manam jamanqä junaq jamayanqatsu’”+ ninqannömi, pë jamanan junaqchö jamashun.
4 Qellqarëkaqpa juk lädunchömi pëqa qanchis kaq junaqpaq kënö nirqan: “Tsë qanchis kaq junaqchömi Teyta Diosqa jamëkan”.+
5 Kënöpis ninmi: “Pëkunaqa manam jamanqä junaq jamayanqatsu”.+
6 Tsëmi wakinkuna tsëman yëkuyänan pishiptin, y mana cäsukuyanqanrëkur alli noticiakunata puntata wiyaqkuna mana yëkushqa kayaptin,+
7 atska tiempu pasariptin David qellqanqan salmuchö “kanan” nir, yapë juk junaqpaq parlan. Tsëqa kë cartachö puntata kënö ninqannömi: “Kanan parlapëkanqaqta wiyamarqa, ama chukru shonqu kayëtsu”.+
8 Jamana sitiuman Josuë+ pëkunata pushashqa kaptinqa, Teyta Diosqa manachi juk junaqpaq parlanmantsu karqan.
9 Tsëmi Teyta Diosta sirweqkunapaqqa jamana säbadu kanraq.+
10 Teyta Dios jamanan junaqchö jamaq nunaqa, Teyta Diosnöllam pëpis rurëninkunapita jamashqa.+
11 Tsëmi pëkunanö mana cäsukoq këman ni pï mana chänampaq, jamë junaqchö jamanapaq puëdinqantsikmannö kallpachakushun.+
12 Teyta Diospa palabranqa kawëkaq y+ alläpa poderyoqmi. Ishkan lädupa alli afilashqa espädapitapis mas fïlu karmi,+ nuna janapa* y ruripa imanö kanqanta rakinqanyaq, y moqukunayaq y tullupa chowpinyaq* yëkun, y shonqu imata pensanqanta y imata munanqantam musyatsikun.
13 Manam ni ima kamashqapis Teyta Dios mana rikänampaqnöqa kantsu,+ sinöqa cuentata mañamänapaq kaqpa rikëninchömi llapan imëkapis cläru y fäcil këkan.+
14 Tsëqa, ciëluman yëkushqa Teyta Diospa Tsurin Jesus+ mas puëdeq mandakoq sacerdötintsik këkaptinqa, pëman confiakunqantsikta nunakuna puntanchö musyatsikushun.+
15 Mandakoq sacerdötintsikqa manam pishipanqantsikchö mana llakipäkuyta* yachaqtsu,+ sinöqa llapanchömi noqantsiknölla pruëbaman churashqa kashqa, peru jutsannaq.*+
16 Tsëmi mana mantsakur alläpa alli kanqanta rikätsikoq Teyta Diospa gobernar jamakunanman witishun,+ tsënöpa yanapamänata wananqantsik* tiempuchö llakipämänapaq* y alläpa alli kanqanta rikätsimänapaq.
Nötakuna
^ Kënöpis niyanmi: pullanninyaq. O “urusninyaq; toqshunyaq”.
^ O “almapa”. Rikäri “Bibliachö palabrakunata entiendinapaq” neqta.
^ Kënöpis niyanmi: ankupäkuyta; kuyapäkuyta.
^ Kënöpis niyanmi: pecädunnaq.
^ Kënöpis niyanmi: necesitanqantsik.
^ Kënöpis niyanmi: ankupämänapaq; kuyapämänapaq.
