Hebrëus 8:1-13
8 Parlëkanqantsik asuntuchö mas väleqqa këmi: mandakoq sacerdötim kapamantsik,+ y pëqa ciëluchö Alläpa Puëdeq gobernaq täkunampa derëcha lädunmanmi jamakushqa.+
2 Pëqa sagrädu sitiuchö+ y rasumpa kaq carpa wayichö sirweqmi, tsëtaqa Teyta Jehovämi* patsätsishqa, y manam nunatsu.
3 Llapan mandakoq sacerdötikunam qarëkunata y pishtashqa qarëkunata rupatsiyänampaq churashqa kayan; tsëmi kë mandakoq sacerdötipis ima qarëllatapis apanan karqan.+
4 Ley mandakunqannö qarëkunata rupatsiyänampaq carguyoq nunakuna kaptinmi, pë kë patsachö karqa sacerdötitsu kanman.+
5 Tsë nunakunapa sagrädu rurëninkunaqa ciëluchö kaqkunata rikätsikoqllam,+ y wäni o llantu cuentallam;+ tsënömi Moisespis carpa* wayita ruranampaq këkar, Diospa mandakuyninta chaskirqan. Y kënömi nin: “Jirkachö rikätsinqaqtanöllam llapanta rurayänëki”.+
6 Kananqa mas alli sagrädu rurëtam Jesus chaskishqa. Pëqa juk mas alli acuerduchö yanapakoqmi,+ tsëqa Ley ninqannömi mas allita änikunqanchö patsakashqa këkan.+
7 Punta acuerdu llapanchö alli kashqa kaptinqa, manam ishkë kaq acuerdu rurakanmantsu karqan.+
8 Nunakunachö mana allikunata rikarmi pëqa kënö nin: “Teyta Jehoväqa* kënömi nin: ‘Rikäyë, ichikllachönam Israelpita y Judäpita nunakunawan, yapë juk acuerduta rurashaq’.
9 Teyta Jehoväqa* këtapis ninmi: ‘Tsë acuerduqa, manam unë kastankunawan Egiptupita+ salvamur ruranqä acuerdunötsu kanqa. Pëkunaqa ruranqä acuerduta manam cumpliyarqantsu, tsëmi pëkunata dejarqä’.
10 ‘Tsë junaqkuna pasariptinqa, Israelpita nunakunawanmi kë acuerduta rurashaq. Pëkunapa peqankunamanmi o umankunamanmi mandakunqäkunata churashaq, y shonqunkunamanmi qellqashaq.+ Noqam Diosninkuna kashaq, y pëkunam sirwimaqnïkuna kayanqa” ninmi Teyta Jehovä.*+
11 Ichikpis jatumpis alli reqiyämaptinmi, nuna mayinkunata ni marka mayinkunata, ‘Teyta Jehoväta* reqiyë’ niyanqanatsu.
12 Noqaqa, mana allikunata rurayanqantam perdonashaq y jutsankunataqa* mananam mas yarpäshaqnatsu’”.+
13 “Juk mushoq acuerdu” nirqa, punta acuerdutam mana sirweqta tikratsishqa.+ Manana sirweq tikrar makwayaqqa, ichikllachönam ushakanqa.+
