Isaïas 44:1-28
44 Sirwimaqnï Jacobpa kastankunay akranqä Israel nunakuna wiyayämë.+
2 Qamkunata kamashoqniki+y yuriyanqëkipita yanapayäshoqnikinoqa Jehovämi qamkunata nï:
‘Sirwimaqnï Jacobpa kastankuna ama mantsakäyëtsu,+ni qampis akranqä Jesurun*+ ama mantsakëtsu.
3 Yaku mana kanqan tsaki patsachö* yaku kanantam permitishaq,+y tsaki sitiukunachöpis mayukuna* kanantam permitishaq.
Qampita yureqkunatam podernïwan yanapashaq,+y qampa kastëkikunatam bendicishaq.
4 Yaku kuchunchö älamu plantanö,y verdirëkaq planta rurinchönömi jeqayämunqa.+
5 Jukmi, “Teyta Jehoväpam kä”+ ninqa.
Juknam, Jacobpa kastampitam kä ninqa,y juknam, “Teyta Jehoväpam kä” nir makinchö qellqanqa,y Israel nuna kanqantam ninqa’.
6 Angelkunata mandaq Teyta Jehovä.
Awmi, Israel nunakunata Gobernaq+ y pëkunata Yapë Ranteq+ Teyta Jehovämi këta nin:
‘Noqaqa unëpitam Dios kä y imëyaqpis Diosmi kashaq.+
Noqapita jukqa manam ima Diospis kantsu.+
7 ¿Pitan noqanö kanman?+
Noqanö karqa, mä shamur nimätsun y noqanö kanqanta rikätsikutsun.+
Nunakunata akranqä witsampita ruranqannölla,ichikllachöna pasakunampaq kaqkunatay shamoq tiempuchö pasakunampaq kaqkunata willakutsun.
8 Ama mantsakäyëtsu.
Ama mantsakarnin shëkar* quedakuyëtsu.+
¿Manaku tsëkunataqa puntallapitana qamkunata willarqä?*
Qamkunaqa testïgükunam kayanki.+
¿Noqapita masqa Dios kanku?
Noqallam qaqa cuenta Diosqa kä+ y manam juk Dioskunapitaqa wiyarqötsu’”.
9 Santukunata ruraqkunaqa, llapankunapis manam ni imapaq väliyantsu,y kuyayanqan kaqkunaqa manam imapaq sirwiyantsu.+
Imatapis mana rikar y mana musyarmi tsë santukunaqa testïgu këta puëdiyantsu.+
Tsëmi ruraqninkunaqa penqakuychö ushayanqa.+
10 ¿Pitan juiciunchö këkarimapaqpis mana väleq metalpita santuta ruranman?+
11 ¡Rikäyë! ¡Tsë santukunata ruraqkunawan juntakoqkunaqa penqakuychömi ushayanqa!+
Imëka rurëta yachaqkunaqa nunallam kayan.
Llapankuna juntakäyätsun y këkäyanqanchö shëkar* quedakuyätsun.
Alläpa mantsakarmi llapankuna penqakuychö ushayanqa.
12 Herrëruqa herramientanwanmicarbon jananchö fiërruta achachätsin,y martilluwan takarmi imëkaman tikratsin.
Y tsëtaqa kallpayoq rikranwanmi ruran.+
Tsëpitanam mallaqarnin kallpannaq quedarin, y yakuta mana upurmi ëwakärin.
13 Qeruta llaqllaqqa cordelwan medirmiimanö kanampaq kaqta puka tïzawan marcan.
Formonwan* llaqllarmi munanqanman tikratsiny marcakuna herramientanwanmi marcan.
Nunatanö shumaqta rurëkurmi+ santukunata adorayänan wayinman churan.+
14 Juk nunam cedrukunata mutur trabajan, y roblita akrëkurmimontikuna rurinchö mas jatunyanqanyaqy mas fuertiyanqanyaq cuidan.+
Laureltam plantan y tsëtam tamya winatsin.
15 Tsëpitanam juk nunaqa wakin qerupita yantata ruran,tsë yantatam qoñukunampaq wëkan.*
Tsëllachömi tantata ruran.
Wakin qerupitam adoranampaq santun ruran.
Awmi, tsë qeruta llaqllarmi santuta ruran y puntanmanmi qonqurikun.+
16 Pullan qerutam ninaman wëkan.
Y tsëchömi mikunampaq ëtsata kankan,* y pacha junta mikun.
Tsënöllam ninachö qoñükur këta nin:
“Kë ninaqa shumaqtaq qoñun”.
17 Peru pullan kaq qeruwanqa llaqllarmi santuta ruran,y puntanman qonqurikurmi adoran.
‘Salvëkayämë qammi diosnï kanki’ nirmi mañakun.+
18 Pëkunaqa manam ni imata musyayantsu ni entiendiyantsu.+
Nawinkunaqa tsapashqanömi këkan y manam rikäyantsu,y shonqunkunaqa manam ni imatapis entiendintsu.
19 Manam mëqankunapis yachaqtsu ni entiendeqtsu kayanni shonqunkunallachöpis pensayantsu kënö niyänampaq:
“Pullan kaqwanqa ninatam wëkarqö,y tsëchömi tantata rurarqö y mikunäpaqmi ëtsata kankarqö.*
¿Tsënö këkartsuraq pullan kaqwanqa melanëpaq santuta rurämany qerupa tsakishqa troncunta adoräman?”.+
20 Pëqa uchpata mikoq nunanömi këkan.
Engañashqa shonqunmi mana alliman chätsin.
Manam kikinllapis salvakuyta puëdintsu, y manam kënö nintsu:
“Kë derëcha makïchö katsinqä santuqa manam ni imapaqpis välintsu”.
21 “Jacobpa kastankuna y Israelpita nunakuna, qamkunaqa sirwimaqnïkunam kayanki.
Tsëmi ama këkunata imëpis qonqayëtsu.
Noqam qamkunata kamarqö* y qamkunaqa sirwimaqnïkunam kayanki.+
Tsëmi qamkunataqa Israelpita nunakuna, imëpis qonqayashqëkitsu.+
22 Mana allikunata rurayanqëkitaqa pukutë imatapis tsapar kanqannömi illakäratsishaq.+
Y jutsata* rurayanqëkitaqa yana pukutënömi tsaparkushaq. Noqaman kutiyämuy.
Qamkunataqa yapëmi rantiyashqëki.+
23 Noqa Jehovä imëkata ruranqäpita,ciëlukuna kushikur büllayë.
Y noqa vencinqäpita, patsachö kaqkuna fuertipa büllayë.
Tsënölla jirkakunapisy montichö llapan plantakunapis kushikur büllayë.+
Noqa Jehovämi Jacobpa kastankunata yapë rantirqö,y Israelpita nunakunatam alläpa puëdeq kanqäta musyatsirqö”.+
24 Mamëkikunapa pachanllachöraq këkäyaptiki rurayäshoqniki,y yapë rantiyäshoqniki Teyta Jehovämi+ nin:
“Noqam Jehovä kä, y noqam llapanta rurarqö.
Japallämi ciëlutapis mashtarqö,+y japallämi patsatapis rurarqö.+
Tsë höraqa ¿pitan noqawan këkarqan?
25 Noqa permitiptïmi willakoq tukoqkuna niyanqampis cumplikantsu.
Y noqa permitiptïmi suerti qateqkunapis upanö portakuyan.+
Noqam yachaq nunakunatapis pantatsïy llapan musyayanqantapis mana kaqllamanmi tikratsï.+
26 Noqa permitiptïmi sirwimaqnïkuna niyanqampis cumplikan,y willakoqnïkuna willakuyanqampis niyanqannölla cumplikan.+
Noqam Jerusalen markapaq nï, ‘yapëmi tsëchö kawayanqa’.+
Y Judächö markakunapaqnam,‘yapëmi rurayanqa+ y ruminkunatapis yapëmi perqashaq’ nï.+
27 Noqam hondu yakutapis, ‘tsakiri,y qamman juntakaq mayukunatapis* tsakitsishaqmi’ nï.+
28 Y noqam Cïrupaq,+ ‘pëmi mitseqnï.
Pëmi llapan munanqäta ruranqa’ nï.+
Noqam Jerusalenpaq nï, ‘yapëmi rurayanqa’,y templupaqnam, ‘yapëmi cimientunkuna churashqa kanqa’ nï”.+
Nötakuna
^ Tsëqa “alli kaqta ruraq nuna” ninanmi. Tsënö nirqa, israelïtakunapaqmi parlëkan.
^ O “yakunëkaq nunapaq”.
^ Kënöpis niyanmi: riukuna.
^ Kënöpis niyanmi: ichirëkar.
^ Kënöpis niyanmi: willayarqaq.
^ Kënöpis niyanmi: ichirëkar.
^ O “Cincelwan”.
^ Kënöpis niyanmi: wëkun.
^ Kënöpis niyanmi: ankan.
^ Kënöpis niyanmi: ankarqö.
^ Kënöpis niyanmi: kamayarqoq.
^ Kënöpis niyanmi: pecäduta.
^ Kënöpis niyanmi: riukunatapis.
