Isaïas 61:1-11
61 Humildi nunakunata alli noticiakunata willanäpaqmi,+ Teyta Jehovä akramashqa.
Awmi, Llapanta Gobernaq Jehoväpa espïritunmi noqachö këkan.+
Pëqa mandamashqa, shonqunkunachö llakishqa këkaqkunata shoqanäpaq,y juk nacionman apashqakuna libri kayänampaq kaqtay carcelchönö këkaqkuna yapë atsikyaqta rikäyänampaq kaqta willakunäpaqmi.+
2 Tsënöllam Teyta Jehovä mandamashqa, nunakunata llakipänan* junaqpitay chikeqninkunata ushakätsinan junaqpita willakunäpaq,+y llapan llakishqa këkaqkunata shoqanäpaq.+
3 Pëqa mandamashqa, Sionpaq waqëkaqkunata cuidanäpaq,uchpapa rantin peqankunaman o umankunaman churakuyänampaq adornuta makyanäpaq,llakikuyanqan höra kushikuyta aceititanö makyanäpaq, y llakishqa kayänampa rantin,Teyta Diosta alabayänampaq pëkunata tëlata makyanäpaqmi.
Y nunakunaqa allita ruraq jatusaq montikuna o qerukuna,alabashqa kanampaq kikin Teyta Jehovä plantanqan plantakuna nirmi reqiyäshunki.+
4 Pëkunaqa unëna dejashqa raqäkunatam yapë altsayanqa.+
Unëpana tsunyaq këkaq markakunatam yapë rurayanqa.+
Ushakashqa markakunatapis yapëmi rurayanqa.
Awmi, mëtsika watapana tsunyaq këkaq y dejashqa këkaq, raqällana markakunatam yapë sharkatsiyanqa.+
5 “Juk nacionpita nunakuna+ shamurmi üshëkikunata mitsiyämunqa,chakrëkikunachömi trabajayämunqa y üvas plantëkikunam plantayämunqa.+
6 Qamkunataqa Teyta Jehoväta sirweq sacerdötikuna,+y Teyta Diospa sirweqninkuna nirmi reqiyäshunki.
Qamkunaqa juk nacion nunakunapa imëkankunatam utilizäyanki,+tsëkunata chaskirmi alläpa kushishqa parlayanki.
7 Penqakatsishqa kayänëkipa rantinmi ishkë kuti mas chakrëkikuna chaskiyanki,+ y allqutsashqa kayänëkipa rantinmiTeyta Diosta sirwir alläpa kushikur büllayanki.
Awmi, qamkunaqa markëkikunachömi ishkë kuti mas chakrakunata chaskiyankiy imëyaqpis kushishqam kawayanki.+
8 Tsënöqa kanqa noqa Jehovä alli kaq rurëta kuyaptïmi,+y mana alli rurëta y suwakuyta chikiptïmi.+
Noqaqa mana dejëpam päguykikunata entregayashqëki,y mana ushakaq acuerdutam qamkunawan rurashaq.+
9 Pëpa kastankunaqa nacionkunachöy markakunachömi reqishqa kayanqa.+
Y llapan rikaqkunam musyariyanqapëkunataqa noqa Jehovä bendicinqäta”.+
10 Teyta Jehovä yanapamaptinmi alläpa kushikushaq.
Awmi, Teyta Diosnïrëkurmi alläpa kushikushaq.+
Pëqa imëka röpatanömi salvacionta vistitsimashqa,+y imëka largu röpatanömi alli kaq rurëta vistitsimashqa.+
Tsëtaqa rurashqa, juk noviu peqa o uma wankukunanwan* këkaqnöo juk novia imëka adornunkunawan adornashqa këkaqnö kanäpaqmi.
11 Imanömi patsapis muruyanqankunatay huertapis muruyanqankunata jeqatsimun,tsënöllam Teyta Jehoväqa alli kaq rurë kananta,+y mëtsë nacion nunakuna pëta alabayänanta permitinqa.+
Nötakuna
^ Kënöpis niyanmi: ankupänan; kuyapänan.
^ Hebreu idiömachöqa “sacerdötipa peqa o uma wakukunantanö” ninmi.
