Jeremïas 15:1-21
15 Tsënam Teyta Jehoväqa kënö nimarqan: “Moiseswan Samuel puntäman shamur pëkunapaq rogakayämaptimpis,+ manam pëkunata yanapämantsu.* Pëkunataqa manam rikëtapis munänatsu. Mëtapis ëwakuyätsun.
2 ‘¿Imatan pasayämanqa?’ nir tapuyäshuptikiqa, kënömi ninëki: ‘Teyta Jehovämi këta nin:
“Wakinnikikunam qeshyakunawan wanuyanki o wañuyanki,wakinnikitanam espädawan wanutsiyäshunki,+wakinnikikunaqa mallaqëpitam wanuyanki,y wakinnikikunanam juk nacionman apashqa kayanki”’.+
3 Teyta Jehoväqa kënöpis ninmi: ‘Kë chuskun mana allikunatam qamkunaman chätsimushaq:+ espädawanmi wanutsiyäshunki, allqukunam ayëkikunata qarachäyanqa, quedaqkunatanam ëtsa mikoq jatusaq pishqukuna y ëtsa mikoq animalkuna mikur ushayäshunki.+
4 Qamkunata tsënö pasayäshunqëkita rikarmi, mëtsë nacionpita nunakunapis alläpa mantsakäyanqa.+ Tsë llapantaqa pasayanki, Judächö gobernaq Ezequïaspa tsurin Manases, Jerusalenchö mana allikunata ruranqampitam.+
5 Jerusalenpita nunakuna, ¿piraq llakipäyäshunki?*
¿Piraq qamkunata yanapayäshunki?
¿Piraq imanö këkäyanqëkita tapuyäshoqniki shamunqa?’.
6 ‘Qamkunaqa dejayämarqunkim’+ ninmi Teyta Jehovä.
‘Kutin kutinmi tumakuskir ëwakuyarqunki.+
Tsëmi qamkunataqa llakipäyashqëkinatsu,*+tsëpa rantinqa podernïwanmi llapëkita ushakätsiyashqëki.
7 Päjata vientu apakunampaq gränuta jitayanqannömi qamkunata jitayashqëki,y mëtsëman apashqa kayänëkitam permitishaq.
Tsurikikunatam ushakätsishaq,+ y imanö kawayanqëkita mana dejayanqëkipitam,sirwimaqkuna kayaptikipis ushakätsiyashqëki.+
8 Viuda quedaqkunapis, lamar kuchunchö arënapitapis masmi kayanqa.
Pullan junaqmi ushakätsikoqta mandamushaq qamkunata, mama kaqkunata y jövinllaraq ollqukunata ushakätsiyäshunëkipaq.
Illaqpitam imanö këtapis puëdiyankitsu, y alläpam mantsakäyanki.
9 Qanchis wamrayoq warmim desmayëkan, y manam jamaninta jitëta puëdintsu.
Junaqllaraq këkaptinmi, pëpaqqa paqasnöna kanqa,tsëmi llakishqa y penqakushqa ushanqa.
Wallkallana kawëkar quedaqkunatapis,chikeqninkuna espädawan ushakätsiyänantam permitishaq’ nïmi noqa Jehovä”.+
10 Mamallä, ¿imapaqraq wachamarqëki?
Entëru nacionchö nunakunam noqawan pelyayan y discutiyan.
Manam pitapis prestarqötsu y manam prestayämänampaq mañakurqötsu.
Tsënö kaptimpis, pïmëmi maldiciyäman.+
11 Teyta Jehovämi kënö nimarqan:
“Llakikuypa y mana allikunapa pasanqëki tiempuqa noqam yanapashqëki,y chikishoqnikikunatam qampa favorniki parlapäshaq.
12 ¿Pillaqa pakita puëdinmantsuraqnorti lädupita apayämunqan fiërruta o cobrita?
13 Markëkikunachö imëka mana allikunata rurayanqëkipitam, mana imatapis chaskirlla,llapan kapuyäshunqëkita y väleq cösasnikikunata chikeqnikikuna apakuyänanta permitishaq.+
14 Mana reqiyanqëki markakunaman apayäshunëkipaqmichikiyäshoqnikikunapa makinman entregayashqëki.+
Cöleräqa qamkunapa contrëkimninanöraq rawranqa o lunyanqa”.+
15 Teyta Jehovä, qamqa musyankim llapan pasëkanqäta.
Ama qonqëkamëtsu ni dejaramëtsu.
Noqata rurayämanqampita chikimaqkunata castiguëkullë,+y ama pacienciawan shuyaranqëkiyaq wanunäta o wañunäta permitïkullëtsu.
Yarpëkullë kë llapanta qamrëkur ruranqäta.+
16 Angelkunata mandaq Teyta Jehovä, noqataqa qampa jutikipam reqiyäman.
Qam nimanqëkitaqa mikuytanömi mikukurkurqö,+tsë nimanqëkikunam shonqüta alläpa kushitsishqa.
17 Kushikuyllata asheqkunawanqa manam jamakütsu, y manam pëkunawanqa kushikur kätsu.+
Pëkuna rurayanqanta rikarmi noqapis alläpa cölerashqa këkä,y qampa autoridänikichö karmi japallä sientikü.+
18 ¿Imanirtan alläpa nanatsiküy herïdäpaqpis jampi kantsu?
Manam herïdaqa alliyantsu.
¿Mana confiakuypaq tsakishqa pözunöku noqapaq tikranki?
19 Tsëmi Teyta Jehovä këta nin: “Noqaman kutiyämuptikiqaalliyäyänëkipaqmi yanapayashqëki,y rikënïchömi allina kayanki.
Väleq kaqkunata mana väleq kaqkunapita rakirqa,jutïchö willakoqkunam kayanki.
Pëkunam qamman shayämunqa,peru qamqa manam pëkunaman ëwankitsu”.
20 “Sirwimaqkunapa puntanchö cobripita murällanö kanëkitam permitishaq.+
Yanapanaqpaq y salvanaqpaqmi qamwan këkäshaq.
Tsëmi qampa contrëki pelyarpisvenciyäshunkitsu”+ nïmi noqa Jehovä.
21 “Mana alli nunakunapitay wakinkunata sufritseq nunakunapitam salvashqëki”.
Nötakuna
^ O “pëkunawan këkäshaqnatsu”.
^ Kënöpis niyanmi: ankupäyäshunki; kuyapäyäshunki.
^ Kënöpis niyanmi: ankupäyashqëkinatsu; kuyapäyashqëkinatsu. O “qamkunapaq decidinqäta cambiashaqnatsu”.
