Josuë 4:1-24
-
Rumikunata señaltanö churayan (1-24)
4 Llapan israelïtakuna Jordan mayuta* tsimpariyaptinllam, Jehovä Diosqa Josuëta kënö nirqan:
2 “Döci ollqukunata akrë, cada kastapita jukta,+
3 y mandë Jordan mayu* chowpinchö* sacerdötikuna shäräyanqan* sitiupita döci rumikunata ashiyänampaq+ y kanan paqas quedakuyänëki sitiuman apëkur churayänampaq”.+
4 Tsënam Josuëqa, döci akrashqa ollqukunata, cada kastapita jukta qayarqan.
5 Tsëpitanam Josuëqa kënö mandarqan: “Jordan mayupa* chowpinman* ëwayë y Jehovä Diospa Sagrädu Cäjampa puntampita, israelïtakuna ëka kasta kayanqanta cuentaman churëkur, cada ünu hombrurkur juk rumita apayämuy.
6 Tsë rumikunaqa qamkunapaqmi juk señal kanqa. Warë warätin wamrëkikuna, ‘¿imanirtan kë rumikunaqa këchö perqarëkäyan?’+ nir tapuyäshuptikiqa,
7 kënömi niyänëki: ‘Kë perqarëkaq rumikunaqa, Diosnintsik ruranqanta llapan israelïtakuna imëpis yarpäyänampaqmi.+ Jehoväpa Sagrädu Cäjanta sacerdötikuna Jordan mayuta* tsimpatsiyaptinmi, Jordan mayuqa tsapakar qochakärirqan’”.+
8 Tsënam tsë akrashqa ollqukunaqa Josuë ninqannölla rurayarqan. Josuëta Jehovä Dios mandanqannöllam Jordan mayu* chowpinta* ëwayarqan y döci rumikunata ashiyarqan, cada rumim Israelchö juk kastata rikätsikurqan. Tsëpitanam tsë paqas quedakuyänan sitiuman apëkur churayarqan.
9 Josuëqa, Sagrädu Cäjata apaq sacerdötikuna shäräyanqan* sitiumanmi,+ Jordan mayupa* chowpinman,* döci rumikunata perqarqan. Y tsë rumikunaqa kananyaqmi tsëchö këkäyan.
10 Sagrädu Cäjata apaq sacerdötikunaqa, Josuëta Jehovä Dios mandanqannöllam Jordan mayupa* chowpinchö* shëkar* quedayarqan, israelïtakuna llapanta rurar ushayanqanyaq. Tsënölla rurayänampaqmi Moisespis Josuëta mandashqa karqan. Tsëyaqmi israelïtakunaqa Jordan mayuta tsimpayarqan.
11 Israelïtakuna tsimpariyaptinnam, Jehoväpa Sagrädu Cäjanta apaq sacerdötikunapis llapankuna rikarëkäyaptin mayuta* tsimpayarqan.+
12 Rubenpa kastankuna, Gadpa kastankuna y Manasespa pullan kastankunapis, Moises mandanqannöllam+ wakin israelïtakunapa puntankunata guërrapaq+ listullana Jordan mayuta* tsimpayarqan.
13 Jericö markapa tsunyaq pampankunamanmi, Jehoväpa Sagrädu Cäjampa puntanta guërrapaq listullana cuarenta milnö soldädukuna tsimpayarqan.
14 Tsë junaqmi Teyata Jehoväqa llapan israelïtakunata cläru rikätsirqan Josuëta yanapëkanqanta.+ Y israelïtakunaqa, Moisesta respetayanqannöllam Josuëtapis wanukunqanyaq respetayarqan.+
15 Tsëpitanam Jehovä Diosqa Josuëta nirqan:
16 “Sagrädu Cäjata apaq sacerdötikunata+ ni, Jordan mayupita* yarqayämunampaq”.
17 Tsënam Josuëqa sacerdötikunata, “Jordan mayupita* yarqayämuy” nirqan.
18 Y Jehoväpa Sagrädu Cäjanta apaq+ sacerdötikuna Jordan mayupita* yarqur tsaki patsaman chäriyaptinllam, Jordan mayuqa mashtakar-raq yapë ëwar qallëkurqan.+
19 Israelïtakunaqa diez de Abib* junaqmi Jordanpita witsäyarqan. Jericöpa amänun* Guilgal+ markachömi campamentunkuna armayarqan.
20 Jordan mayupita* apayanqan döci rumikunataqa, Guilgal+ markachömi Josuëqa perqarqan.
21 Tsëpitanam israelïtakunata kënö nirqan: “Warë warätin wamrëkikuna, ‘¿imanirtan kë rumikunaqa këchö perqarëkäyan?’ nir tapuyäshuptikiqa,+
22 kënömi wamrëkikunata niyänëki: ‘Israelïtakunam Jordan mayuta* tsaki patsapa tsimpayämurqan.+
23 Jehovä Diosnintsikmi israelïtakuna tsimpayanqanyaq Jordan mayuta* qochakätsirqan. Tsënöllam Teyta Jehoväqa Puka lamartapis rakirqan* noqakuna pasayanqäyaq.+
24 Tsëtaqa Teyta Jehovä rurarqan, alläpa poderösu kanqanta entëru Patsachö nunakuna musyayänampaq+ y qamkunapis Jehovä Diosnintsikta imëpis respetayänëkipaqmi’”.
Nötakuna
^ Kënöpis niyanmi: riuta.
^ Kënöpis niyanmi: riu.
^ Kënöpis niyanmi: pullanninchö.
^ Kënöpis niyanmi: ichiräyanqan.
^ Kënöpis niyanmi: riupa.
^ Kënöpis niyanmi: pullanninman.
^ Kënöpis niyanmi: riuta.
^ Kënöpis niyanmi: riu.
^ Kënöpis niyanmi: pullanninta.
^ Kënöpis niyanmi: ichiräyanqan.
^ Kënöpis niyanmi: riupa.
^ Kënöpis niyanmi: pullanninman.
^ Kënöpis niyanmi: riupa.
^ Kënöpis niyanmi: pullanninchö.
^ Kënöpis niyanmi: ichirëkar.
^ Kënöpis niyanmi: riuta.
^ Kënöpis niyanmi: riuta.
^ Kënöpis niyanmi: riupita.
^ Kënöpis niyanmi: riupita.
^ Kënöpis niyanmi: riupita.
^ O “inti o rupay yarqamunan lädun”.
^ Abib killaqa, hebreu calendariuchöqa watapa qallanan killam karqan, y marzu killachö qallarmi abril killachöraq ushaq. Rikäri “Bibliachö palabrakunata entiendinapaq” neqchö “Abib” neqta y “Masllata musyanapaq” neqchö B15 kaqta.
^ Kënöpis niyanmi: riupita.
^ Kënöpis niyanmi: riuta.
^ Kënöpis niyanmi: riuta.
^ Hebreu idiömachöqa “yakutapis tsakiratsirqan” ninmi.
