Josuë 9:1-27
9 Jordan mayupa* inti o rupay jeqanan lädu+ jirkakunachö, Sefelächö, Jatun lamarpa*+ entëru kuchunchö y Lïbanu frentinchö kawaq gobernantinkunam, tsë llapan pasakunqankunata musyayarqan. Pëkunaqa hitïtakunapa, amorreukunapa, cananeukunapa, perizïtakunapa, heveukunapa y jebuseukunapa gobernantinkunam kayarqan.+
2 Tsë llapan gobernantikunam juntakäyarqan, Josuëwan y israelïtakunawan guërrata rurayänampaq.+
3 Gabaon+ nunakunapis Jericö+ markatawan Hai+ markata Josuë ushakätsishqa kanqantam musyariyarqan.
4 Tsëmi pëkunaqa alli pensarir, makwa costalkunaman mirkapankuna winayarqan. Tsënöllam vïnutapis remendashqa makwa porongukunaman winayarqan. Tsë llapantam ashnunkunaman cargayarqan.
5 Y makwa y remendashqa llanqikunatam churakuyarqan y ratas röpakunatam vistikuyarqan. Alistayanqan tantapis chukrushqa y pakir ushakashqam karqan.
6 Tsëpitanam Josuëta ashirnin Guilgalchö+ campamentuman ëwayarqan. Chëkurnam Josuëta y Israelchö dirigeqkunata niyarqan: “Alläpa karu markapitam shayämurqö. Qamkunawanmi juk acuerduta rurëta munalläyä”.
7 Tsënam Israelchö dirigeqkunaqa heveukunata+ niyarqan: “¿Imanir-raq qamkunawan juk acuerduta rurayäman?+ Capazchi qamkunaqa kë amänullapita kayanki”.
8 Tsënam pëkunaqa Josuëta niyarqan: “Noqakunaqa sirweqnikikunam* kayä”.
Tsënam Josuëqa, “¿pikunatan kayanki y mëpitataq shayämurqunki?” nir tapurqan.
9 Tsënam pëkunaqa kënö niyarqan: “Diosnikikuna Jehoväpa jutimpaq parlayanqanta wiyarmi, alläpa karu markapita shayämurqö.+ Mëtsëchömi parlayan alläpa puëdeq kanqanta y Egiptuchö ruranqanta.+
10 Y musyayarqömi, Hesbon markachö Sehon jutiyoq gobernantita+ y Astarot markapita Basanta mandakoq Og jutiyoq gobernantita+ imanö wanutsinqantapis. Pëkunaqa Jordan mayupa* wak tsimpanchö* kawaq amorreukunapa gobernantikunam kayarqan.
11 Tsëmi markäkunachö dirigentikuna y llapan marka mayïkuna mandayämarqan: ‘Viäjipaq mirkapëkikuna aparkur pëkuna kaqta ëwayë, y kënö niyë: “Sirweqnikikunam kayäshaq,+ juk acuerduta rurëkulläshun”’.+
12 Wayïkunapita yarqayämunqä junaqqa kë tantakunaqa qoñuykarqanmi, y kananqa rikäyanqëkinöpis chukrushqa y pakir ushashqam këkan.+
13 Kë qara porongukunapis vïnuta winayämunqä junaqqa mushoqmi karqan, y kananqa remendashqanam këkan.+ Alläpa karupita shayämushqa kayaptïmi, röpäkuna y llanqïkunapis makwayashqana”.
14 Tsënam Israelchö dirigeqkunaqa, tsë nunakunapa wakin cösasninkunata rikapar qallëkuyarqan, peru manam Jehovä Diostaqa tapuyarqantsu.+
15 Tsëpitanam Josuëqa, tsë nunakunawan juk acuerduta rurarqan alli kawakuyänampaq+ y mana wanutsiyänampaq. Tsënöllam Israelchö dirigeqkunapis tsë acuerduta cumpliyänampaq äniyarqan.+
16 Peru acuerduta rurayanqampita kima junaqllatam musyariyarqan, tsë nunakuna vecïnunkunalla kayanqanta y amänunkunallachö kawayanqanta.
17 Tsënam israelïta ollqukunaqa tsë nunakunapa markankunaman ëwayarqan, y kima junaqtam chäyarqan. Tsë nunakunaqa Gabaon,+ Kefirä, Beerot y Quiryat-Jearim+ markakunapitam kayänaq.
18 Israelchö dirigeqkuna, Israelpa Diosnin Jehoväpa jutinchö pëkunata mana wanutsiyänampaq änishqa kayaptinmi,+ israelïta ollqukunaqa tsë nunakunata wanutsiyarqantsu. Tsëmi llapan israelïtakunaqa dirigeqkunapaq rimar qallëkuyarqan.
19 Tsënam Israelchö dirigeqkunaqa llapan israelïtakunata kënö niyarqan: “Israelpa Diosnin Jehoväpa jutinchömi mana wanutsiyänäpaq pëkunata äniyarqö, tsëmi wanutsita puëdintsiktsu.
20 Äniyanqäta mana cumpliyaptïqa Teyta Diosnintsikmi noqantsikwan cölerakunqa, tsëmi kawëkaqta dejanantsik”.+
21 Dirigeqkunaqa kënöpis niyarqanmi: “Kawëkaqta dejarishun, peru pëkunaqa yantantsik ashimoq y yakuntsik ashtamoqmi kayanqa”. Tsëtam Israelchö dirigeqkunaqa decidiyarqan.
22 Tsënam Josuëqa tsë nunakunata qayëkatsir kënö nirqan: “¿Imanirtaq kë amänullapita këkarnin, ‘alläpa karu markapitam shayämurqö’ nir engañayämarqunki?+
23 Tsëmi kanampita witsëpaqa, engañayämanqëkipita maldicishqa kayanki,+ y imëyaqpis esclävum kayanki. Diosnïpa wayimpaqmi yantata ashiyämunki y yakuta ashtayämunki”.
24 Tsënam pëkunaqa Josuëta kënö niyarqan: “Tsëtaqa rurayarqä wanutsiyämänëkita mantsarmi.+ Sirweqnin Moisesta Jehovä Diosniki mandanqantam willayämarqan. Pëtash mandanaq kë markakunata entregayäshunëkipaq y llapan nunakunata wanutsiyänëkipaq.+
25 Kananqa makikichömi këkäyä, munanqëkinö imatapis rurëkayämë”.
26 Josuëqa niyanqannömi rurarqan. Tsëmi israelïtakunaqa wanutsiyarqannatsu.
27 Tsë junaqmi Josuëqa, Jehovä Diospa altarnimpaq y llapan israelïtakunapaq yantata ashiyänampaq y yakuta ashtayänampaq churarqan.+ Teyta Diospa* altarnin mëchöpis kanqanmanmi+ yantata y yakuta apayaq. Tsëtam kananyaqpis rurëkäyan.+
Nötakuna
^ Kënöpis niyanmi: riupa.
^ O “Mediterraneu lamarpa”.
^ O “esclävullëkikunam”.
^ O “inti o rupay yarqamunan läduchö”.
^ Kënöpis niyanmi: riupa.
^ O “Jehoväpa”.
