Juëces 10:1-18
10 Abimëlec wanunqanchönam, Teyta Diosqa Israelta salvanampaq Tolä jutiyoq nunata churarqan.+ Pëqa Puapa tsurinmi karqan, Isacar kastapita Dodöpa willkan. Y Efrainpa jirkankunachö këkaq Samir markachömi kawarqan.
2 Pëqa veintitres watapam Israelchö juez karqan. Tsëpitanam wanukurqan, y Samir markachömi pampayarqan.
3 Tsëpitanam Galaadpita Jairta juez kanampaq Teyta Dios churarqan, y pëqa veintidos watapam Israelchö juez karqan.
4 Pëqa treinta tsuriyoqmi karqan. Y cada tsurimpam juk markan y montanampaq juk ashnun karqan. Tsë treinta markakunatam Havot-Jair+ nir kananyaq reqiyan, tsë markakunaqa Galaad sitiuchömi.
5 Tsëpitanam Jair wanukurqan y Camon markachömi pampayarqan.
6 Israelïtakunaqa yapëmi Jehovä Diosta mana cäsukur mana allikunata rurar qallëkuyarqan+ y Baal santukunata,+ Astoret santukunata, Arampa* santunkunata, Sidonpa santunkunata, Moabpa santunkunata,+ ammonïtakunapa santunkunata+ y filisteukunapa santunkunatam+ adorar qallëkuyarqan. Tsënömi israelïtakunaqa Teyta Jehoväta dejaskir sirwiyarqannatsu.
7 Tsëmi Jehovä Diosqa pëkunawan cölerar, filisteu nunakuna y ammonïta nunakuna dominayänampaq* dejaskirqan.+
8 Pëkunam tsë wataqa, israelïtakunata alläpa sufritsiyarqan. Jordan lädumpa Galaadchö këkaq amorreukunapa unë markankunachö kawaq israelïtakunatam, dieciöchu watapa sufritsiyarqan.
9 Ammonïta soldädukunaqa, Judäpa, Benjaminpa y Efrainpa kastankunawan pelyayänampaqmi Jordan mayuta* tsimpayarqan. Tsëmi israelïtakunaqa alläpa sufriyarqan.
10 Tsënö sufrirmi israelïtakunaqa yanapëkunampaq Jehovä Diosta kënö rogakuyarqan:+ “Dios Yaya, contrëkim jutsallakuyarqö,* Diosnïkuna këkaptikim dejayarqoq y Baal santukunatam sirwiyarqö”.+
11 Tsënam Jehovä Diosqa israelïtakunata kënö nirqan: “¿Manaku noqa salvarqaq Egiptu nunakuna,+ amorreu nunakuna,+ ammonïta nunakuna, filisteu nunakuna,+
12 sidoniu nunakuna, amalequïta nunakuna y madianïta nunakuna sufritsiyäshuptiki? Noqaman mañakayämuptikim pëkunapita salvarqaq.
13 Peru qamkunaqa santukunata adorarmi dejayämarqunki.+ Tsëmi salvayashqëkinatsu.+
14 Akrayanqëki santukunata yanapayäshunëkipaq mañakuyë,+ pëkuna salvayäshuy sufriyanqëki hörakuna”.+
15 Israelïtakunaqa Jehovä Diostam rogakuyarqan, “jutsallakuyarqömi,* munanqëkinö imatapis rurëkayämë. Kë kutipis salvëkayämë” nir.
16 Tsënö nirmi katsiyanqan juk nacionkunapa santunkunata ushakätsiyarqan y Jehovä Diosta yapë sirwir qallëkuyarqan.+ Tsëmi pëqa israelïtakuna sufriyaqta rikarnin alläpa llakiparqan.*+
17 Tiempuwannam ammonïta nunakunaqa,+ soldädunkunata qayatsiyarqan y Galaadchömi campamentunkuna rurayarqan. Y israelïtakunapis juntakëkurmi, Mizpä markachö campamentunkuna rurayarqan.
18 Galaadpita israelïtakuna y autoridäkunam kënö ninakuyarqan: “¿Pitan dirigimäshun ammonïtakunawan pelyashqa?+ Tsë dirigimaqnintsik Galaadchö llapan nunakunapa dirigeqnin katsun”.
Nötakuna
^ O “Siriapa”.
^ Hebreu idiömachöqa “filisteukunapa y ammonïtakunapa makinman rantikurqan” ninmi.
^ Kënöpis niyanmi: riuta.
^ Kënöpis niyanmi: pecäduta rurayarqö.
^ Kënöpis niyanmi: pecädutam rurayarqö.
^ Kënöpis niyanmi: ankuparqan; kuyaparqan.
