Juëces 12:1-15
12 Tsënam Efrainpa kastankunaqa juntakëkur, Zafon markaman* ëwaq nänipa ëwayarqan. Y kënö nirmi Jeftëta reclamayarqan: “¿Imanirtaq willayämarqunkitsu ammonïtakunawan pelyaq ëwëkarnin?+ Kananmi wayikitapis y qamtapis ninawan prendïkuyashqëki”.
2 Y Jeftënam nirqan: “Noqawan marka mayïkunam jatun guërrachö ammonïta soldädukunawan kayarqä. Y yanapayämänëkipaqmi mañakuyarqaq, peru qamkunaqa manam ammonïtakunapita salvayämänëkipaq shayämurqëkitsu.
3 Tsëmi salvayämänëkipaq mana shayämuptiki, vidäta peligruman churar ammonïta soldädukunawan pelyaq ëwarqä.+ Jehovä Diosmi pëkunata vencinäpaq yanapamashqa. Y qamkunaqa, ¿imanirtan noqawan pelyaq shayämurqunki?”.
4 Tsëpitanam Jeftëqa, Galaadpita llapan ollqukunata qayëkatsir+ Efrainpa kastankunawan pelyayarqan. Y Galaadpita ollqukunam Efrainpa kastankunata venciyarqan, pëkunapaqmi kënö nishqa kayänaq: “Efrainpa y Manasespa markankunachö këkaq Galaadpita nunakunaqa, Efrainpita qeshpir purikoqkunallam kayanki”.
5 Efrainpa kastankuna manaraq chäyaptinmi, Galaadpita ollqukunaqa Jordan mayuta* tsimpana+ sitiukunaman churanakuyarqan. Tsëmi Efrainpa kastankuna qeshpita munarnin, “pasakuyänäta dejayämë” niyaq. Tsënam Galaadpita ollqukunaqa, “¿Efrainpa kastankunaku kayanki?” nir tapuyaq. “¡Manam!” niyaptinnam,
6 “tsëqa Shibolet niyë” niyaq. Y pëkunaqa, tsë palabrata pashtatsita mana puëdirmi “Sibolet” niyaq. Tsëmi Jordan mayuta* tsimpana sitiukunachö wanuratsiyaq o wañutsiyaq. Tsë kutiqa, Efrainpa kastankunaqa cuarenta y dos milmi wanuyarqan.
7 Galaadpita Jeftëqa joqta watapam Israelchö juez karqan, tsëpita wanuriptinnam Galaadchö këkaq markanman pampayarqan.
8 Tsëpitanam Belen markapita Ibzan jutiyoq nuna Israelchö juez karqan.+
9 Pëpaqa ollqu wamrankunam treinta karqan y warmi wamrankunapis treintam karqan. Warmi wamrankunatam mana familian ollqukunatawan casatsirqan, y ollqu wamrankunata casatsinampaqmi mana familian treinta warmikunata ashirqan. Pëqa qanchis watapam Israelchö juez karqan.
10 Tsëpitanam Ibzan wanukurqan, y Belen markachömi pampayarqan.
11 Tsëpitanam Zabulonpa kastampita Elon, Israelchö juez karqan. Pëqa chunka watapam Israelchö juez karqan.
12 Tsëpitanam Zabulonpa kastampita Elon wanukurqan y Zabulonchö këkaq Ayalon sitiumanmi pampayarqan.
13 Tsëpitanam piratonïta Hilelpa tsurin Abdon, Israelchö juez karqan.
14 Pëqa cuarenta wamrayoq y treinta willkayoqmi karqan. Y llapankunapam montayänampaq ashnunkuna karqan. Pëqa puwaq watapam Israelchö juez karqan.
15 Tsëpitanam, piratonïta Hilelpa tsurin Abdon wanukurqan. Y Efrainchö këkaq Piraton sitiuchömi pampayarqan, tsëqa karqan amalequïta nunakuna unë kawayanqan jirkakunachömi.+