Juëces 13:1-25
13 Israelïtakunaqa yapëmi Jehovä Diosta mana cäsur mana allikunata rurayarqan.+ Tsëmi Jehoväqa cuarenta watapa filisteu nunakuna+ sufritsiyänampaq dejaskirqan.
2 Tsë witsankunam, Danpa+ kastampita Zorä+ markachö täkoq* Manöah+ jutiyoq nuna kawarqan. Warmin qolloq kaptinmi wamran karqantsu.+
3 Juk kutim, Teyta Jehoväpa angelnin tsë warmita yuripur kënö nirqan: “Qolloq këkarpis qeshyaqmi tikranki y juk ollqu wamrayoqmi kanki.+
4 Ama vïnuta ni imatapis machatsikoqtaqa upunkitsu,+ ni mana limpiutanö Teyta Dios rikanqankunatapis ama mikunkitsu.+
5 Rasumpam qeshyaq tikranki y ollqu wamrayoqmi kanki. Ama imëpis aqtsanta rutupunkitsu.+ Pëtaqa yurikunqan* junaqpitam Teyta Dios akranqa pëllatana sirwinampaq.* Y filisteu nunakunapitam israelïtakunata salvanqa”.+
6 Tsënam warmiqa ëwar qowanta o runanta* kënö nir willarqan: “Diospa sirweqninmi watukamaqnï shamushqa. Teyta Diospa angelninnö kaptinmi alläpa espantakurqö. Manam mëpita shamunqanta tapurqötsu y manam pëpis jutinta willamashqatsu.+
7 Y kënömi nimashqa: ‘Qeshyaqmi tikranki y ollqu wamrayoqmi kanki. Wamrataqa Teyta Diosmi akranqa yurinqan junaqpita* wanukunqanyaq pëllata sirwinampaq.* Tsëmi vïnuta ni imatapis machatsikoqtaqa upunëkitsu, ni mana limpiutanö Teyta Dios rikanqankunatapis manam mikunëkitsu’”.
8 Manöahnam Jehovä Diosta kënö rogakurqan: “Teytallä Jehovä, tsëllaraq mandamunqëki sirwishoqniki yapë shamuykullätsun, y yurinampaq kaq wamrata imanö cuidayänäpaq kaqta yachëkatsiyämätsun”.
9 Teyta Diosqa Manöah ninqantam wiyarqan. Tsëmi Teyta Diospa angelninqa, chakrachö këkaptin Manöahpa warminman yapë charqan. Manöahqa manam tsëchötsu këkarqan.
10 Tsënam warmiqa cörrillapa Manöah kaqta ëwarnin, “pasaq junaqchö yuripumaq nunam yapë chämushqa”+ nirqan.
11 Manöahnam jinan höra tsë nuna këkanqanman warminwan ëwarqan, y kënömi tapurqan: “¿Qamku warmïwan parlarqëki?”. Pënam, “awmi, noqam karqö” nirqan.
12 Tsënam Manöahqa nirqan: “¡Ninqëki cumplikätsun! Peru niyämë, ¿imanötan tsë wamrata cuidayäshaq? Y ¿jatunyarkurqa imataraq ruranqa?”.+
13 Tsënam Teyta Jehoväpa angelninqa Manöahta nirqan: “Warmikiqa llapan ninqätam ruranan.+
14 Ama üvas planta wayunqantaqa mikutsuntsu, ni vïnuta ni imatapis machatsikoqtaqa uputsuntsu.+ Y mana limpiutanö Dios rikanqankunataqa ama mikutsuntsu.+ Llapan ninqätam ruranan”.
15 Tsënam Manöahqa Teyta Jehoväpa angelninta, “ama ëwakuyraqtsu, llullu cabrata qampaq cocinarayämushaq”+ nirqan.
16 Teyta Jehoväpa angelninnam Manöahta nirqan: “Quedakurqa manam ruramunqëkita mikushaqtsu. Munarqa Jehovä Diospaq juk qarëta ruparatsi”. Tsënö niptimpis Manöahqa manam Teyta Jehoväpa angelnin kanqanta musyarqantsu.
17 Tsënam Manöahqa Teyta Jehoväpa angelninta nirqan: “¿Imatan jutiki?+ Ninqëki cumplikäriptin qampita allita parlayänäpaqmi musyëta munayä”.
18 Teyta Jehoväpa angelninnam nirqan: “¿Imanirtan jutïpaq tapumanki? Jutïqa alläpa shumaqmi”.
19 Manöahnam llullu cabratawan gränupita rurashqa qarëta jatun rumi jananman churëkur Jehovä Diospaq rupatsirqan. Tsënam Manöahwan warmin rikarëkäyaptin, Teyta Diosqa mana creipaqta rurarqan.
20 Altarchö nina wapapëkaptinmi, Manöahwan warminqa Teyta Jehoväpa angelninta tsë nina rurinchö witsaqta rikäyarqan. Tsëmi patsamampis urkunkuna chanqanyaq qonqurikuyarqan.
21 Tsëran Manöahqa cuentata qokurqan Teyta Jehoväpa angelnin kashqa kanqanta.+ Jehoväpa angelninqa manam Manöahta ni warminta yapë yuripurqannatsu.
22 Tsënam Manöahqa warminta nirqan: “Teyta Diostam rikëkurquntsik. ¡Kananqa wanushunchi!”.+
23 Warminnam nirqan: “Jehovä Dios wanutsimënintsikta munarqa, manachi rupatsinqantsik ëtsata ni gränupita rurashqa qarëta chaskimashwantsu karqan.+ Ni manachi kë llapankunata rikätsimashwantsu karqan, ni llapan nimanqantsikkunata nimashwantsu karqan”.
24 Tiempuwannam tsë warmipa ollqu wamran yurirqan, y Sanson+ nirmi jutin churarqan. Y jatunyanqanmannömi tsë wamrata Teyta Jehovä bendicirqan.
25 Tsëpita mas tiempu pasariptinnam, Zorä markawan Estaol+ marka tinkoq Mahanë-Dan+ sitiuchö këkaptin Teyta Jehoväqa poderninwan yanapar qallëkurqan.+
Nötakuna
^ Kënöpis niyanmi: täraq; päraq.
^ Hebreu idiömachöqa “pachachö kanqan” ninmi.
^ O “nazareu kanampaq”. Rikäri “Bibliachö palabrakunata entiendinapaq” neqta.
^ Kënöpis niyanmi: ollqunta.
^ Hebreu idiömachöqa “pachachö kanqampita” ninmi.
^ O “nazareu kanampaq”. Rikäri “Bibliachö palabrakunata entiendinapaq” neqta.
