Juëces 15:1-20
-
Filisteukuna rurayanqampita Sanson vengakun (1-20)
15 Tiempu pasariptinnam, trïgu cosëcha witsan, Sansonqa llullu cabrata aparkur warminta watukaq ëwarqan, chärirnam suegrunta nirqan: “Warmïpa punukunan cuartunmanmi yëkuyta munä”. Peru suegrunqa manam yëkunanta munarqantsu.
2 Y kënömi nirqan: “Chikinqëkitam pensarqä,+ tsëmi fiestachö yanapashoqnikitawan casëkatsirqä.+ Peru menor kaq wamrämi mas shumaq, pëwan casakuy”.
3 Tsënam Sansonqa, “kananmi sï filisteukuna musyayämanqa, kikinkunam culpayoq kayan” nirqan.
4 Tsëmi Sansonqa, trescientus atoqkunata ashïkur ishkë ishkë rakirqan, y chupapura watëkurmi aceitichö ushmashqa taksha qerutawan ratashta chupankunaman watarqan.
5 Tsëpitanam tsë qeruman y ratashman ninata prendïkur filisteukunapa tsakishqana trïgunkunaman atoqkunata qarqurqan. Tsënam manöjukunata y seguëpaq trïguta, üvas plantakunata y olïvu plantakunata nina usharqan. Tsënömi llapanman ninata prendïkurqan.
6 Tsënam filisteukunaqa, “¿pitaq këta rurashqa?” niyarqan. Wakinnam kënö contestayarqan: “Timnä markachö täkoq* nunapa mashan Sansonmi rurashqa. Këtaqa rurashqa fiestachö yanapaqnintawan warminta casëkatsishqa kaptinmi”.+ Tsëta musyëkurnam filisteukunaqa witsärir tsë warmitawan papäninta ninan prendïkuyarqan.+
7 Tsënam Sansonqa pëkunata nirqan: “Qamkuna tsënö portakuyaptikiqa, manam vengakunqäyaq dejayashqëkitsu”.+
8 Tsëmi llapanta maqar qallëkurqan. Mëtsikaqtam wanutsirqan. Tsëpitanam Etamchö këkaq jatun qaqaman urarqan y tsëchömi juk machëchö* quedakurqan.
9 Tsëpitanam filisteu soldädukunaqa Judächö markakunaman witsärir tsëchö campamentunkuna rurayarqan. Y Lehï+ sitiuchömi wakpa këpa puriyarqan.
10 Tsënam Judäpa kastankunaqa pëkunata kënö tapuyarqan: “¿Imaqtan shayämurqunki? ¿Imanirtan chikiyämanki?”. Filisteukunanam kënö contestayarqan: “Noqakunata rurayämanqantanölla Sansonta rurayänäpaqmi, asheqnin shayämurqö”.
11 Tsënö niyaptinmi Judäpa kastampita tres mil nunakuna Etamchö këkaq jatun qaqachö machëman* uräyarqan, y Sansontam niyarqan: “¿Manaku filisteukunapa poderninchö kanqantsikta musyanki?+ ¿Imanirtaq këta rurayämarqunki?”. Pënam, “noqaqa rurayämanqannöllam pëkunata rurarqö” nirqan.
12 Pëkunanam, “qamta prësurir filisteukunaman entreguëkuyänaqpaqmi uräyämurqö” niyarqan. Tsënam Sansonqa nirqan: “Qamkunaqa ama imanayämëtsu”.
13 Pëkunanam niyarqan: “Manam imanayashqëkitsu, watarkurniki pëkunaman entreguënikillatam munayä. Manam wanutsiyashqëkitsu”.
Tsëmi ishkë mushoq waskawan watarkur qaqachö këkaq machëpita apayarqan.
14 Lehï sitiuman chäratsiyaptinmi, filisteukunaqa alläpa kushikuyarqan. Tsë höram Jehovä Diosqa poderninwan yanaparqan.+ Y rikranta watarëkaq waskakunaqa ninawan rupatsishqa lïnu hïlunömi ushakaskirqan, y makinchö cadënaqa tsullureq cuentam shikwarirqan.+
15 Tsënam pëqa wanushqa ashnupa frescullaraq chakallwanta* taririrqan y tsëwanmi mil nunakunata wanutsirqan.+
16 Tsëpitanam Sansonqa nirqan:
“¡Juk ashnupa chakallwanwanmi...,* juk montonman, ishkë montonman qoturqö!
Juk ashnupa chakallwanwanmi mil nunakunata wanutsirqö”.+
17 Parlar ushaskirnam chakallwata* jitarirqan y tsë sitiutam Ramat-Lehï*+ nir jutin churarqan.
18 Tsëpitanam alläpa yakunar Jehovä Diosta kënö mañakurqan: “Qammi pelyachö gananäpaq yanapamarqunki. Y kananqa, ¿yakunëpitatsuraq wanurishaq? ¿Mana adorayäshoqnikikuna* wanutsiyämänantaku munanki?”.
19 Tsënam Teyta Diosqa Lehï sitiuchö juk uchkupita yakuta yarqatsimurqan.+ Tsë yakuta upuriptinmi Sansonpaqa kallpam yapë yurirqan.* Tsëmi Lehïchö kananyaq këkaq sitiuta, En-Hacöri* nir jutin churarqan.
20 Filisteu nunakuna puëdeq kayanqan witsanmi,+ Sansonqa veinti watapa Israelchö juez karqan.
Nötakuna
^ Kënöpis niyanmi: täraq; päraq.
^ O “raqrarëkaq qaqachö”.
^ O “raqrarëkaq qaqaman”.
^ Kënöpis niyanmi: aqlinta; kachillwanta.
^ Kënöpis niyanmi: aqlinwanmi; kachillwanwanmi.
^ Kënöpis niyanmi: aqlita; kachillwata.
^ Tsëqa, ‘chakallwapa jirkan’ ninanmi.
^ Hebreu idiömachöqa “mana señalakushqakuna” ninmi. Rikäri “Bibliachö palabrakunata entiendinapaq” neqta.
^ Hebreu idiömachöqa “espïritun kutikärirqan” ninmi.
^ Tsëqa, ‘qayakoqpa pukyun’ ninanmi.
