Juëces 20:1-48
-
Benjaminpa kastankunawan pelyayan (1-48)
20 Tsëta musyëkurmi, Dan+ markapita Beer-Sëba markayaq kawaq israelïta ollqukuna y Galaad+ markakunachö kawaq israelïta ollqukunaqa juntakäyarqan. Llapan israelïtakunam Jehovä Diospa rikëninchö Mizpä+ markachö juntakäyarqan.*
2 Y espädankunawan+ llapan ëwaq soldädukunaqa cuatrocientus milmi kayarqan. Llapan kastakunapita dirigentikunapis tsëchömi këkäyarqan.
3 (Benjaminpa kastankunaqa musyariyarqan, llapan israelïta ollqukuna Mizpä markaman witsashqa kayanqantam).
Tsëpitanam Israel nunakunaqa kënö nir tapuyarqan: “Niyämë, ¿imanöpatan tsë warmitaqa tsëläya mana allita rurëkuyashqa?”.+
4 Tsënam levïtaqa+ kënö nirqan: “Warmïwanmi* Benjaminchö këkaq Guibeä+ markaman posadakuyänäpaq chäriyarqä.
5 Tsënam Guibeä markachö nunakuna conträ sharkuyarqan, y posadakunqäman shamuykurmi wanutsiyämëta munayarqan. Y mana yarquptïmi warmïta* violar wanutsiyarqan.+
6 Tsëmi warmïpa ayanta atska pedäzuman roquskir cada pedäzuta Israelpa llapan kastankunaman apatsirqä.+ Tsëtaqa rurarqä Israelchö espantëpaq y penqakuypaq jutsata* rurashqa kayaptinmi.
7 Kananqa llapëki Israel nunakuna imata pensayanqëkita y imata rurayänëkipaq kaqta willanakuyë”.+
8 Tsënam llapankuna kënö niyarqan: “Manam ni mëqantsikpis carpantsikman* o wayintsikman kutishuntsu.
9 Këtam rurashun: Guibeächö+ nunakunawan pikuna pelyayänampaq kaqtam sortiashun;
10 soldädukunapaq mikuyta apayänampaqmi, Israelchö llapan kastakunapita cada cienpita chunkata, milpita cienta, y diez milpita mil nunakunata akrashun. Tsënöpam soldädukunaqa, Benjaminpa kastankunapa Guibeä markanchö nunakunawan pelyayanqa Israelchö penqakuypaq jutsata* rurayanqampita”.
11 Tsënömi tsë markachö nunakunawan pelyayänampaq Israelpita llapan ollqukuna juntakäyarqan.
12 Israel kastakunam, Benjaminpa kastankunapita llapan ollqukunata kënö niyänampaq willakoqkunata mandayarqan: “¿Imanöpatan tsë warmitaqa markëkikunachö tsëläya mana allita rurëkuyashqa?
13 Kananqa, Israelchö mana alli rurë ushakänampaq,+ Guibeä+ markachö këkaq melanëpaq nunakunata wanutsiyänäpaq entregayämë”. Tsënö niyaptimpis Benjaminpa kastankunaqa manam israelïta mayinkunata cäsuyarqantsu.
14 Benjaminpa kastankunaqa Guibeä markachö juntakäyänampaq y israelïta soldädukunawan pelyayänampaqmi markankunapita ëwayarqan.
15 Tsë junaqqa, atska markakunapitam Benjaminpa kastankunaqa, espädawan pelyaq veintiseis mil soldädukunata qayatsiyarqan, y Guibeä markapita mas allin kaq setecientus soldädukunatapis qayatsiyarqanmi.
16 Tsë llapanchöqa setecientusmi mas allin kaq soldädukuna kayarqan, y llapankunam izquierda makinkunata alli manejëta yachayaq. Rumiwan warakarqa manam ichikllapapis fallayaqtsu* y alli precïsum chätsiyaq.
17 Israelïtakunaqa cuatrocientus mil espädayoq soldädukunatam juntayarqan,+ llapankunam pelyëta alli yachaq kayarqan. Benjaminpa kastankunataqa manam yupayarqantsu.
18 Tsëpitam israelïtakunaqa Betel markaman witsäyarqan Teyta Diosta kënö tapukuyänampaq:+ “¿Mëqäkunatan puntata ëwayäshaq Benjaminpa kastankunawan pelyayänäpaq?”. Jehovä Diosnam, “Judäpa kastankunam puntëkikunata ëwanqa” nirqan.
19 Tsëpitanam israelïtakunaqa tempränulla shärikuskir Guibeä markachö nunakunawan pelyayarqan.
20 Israelïta soldädukunaqa Benjaminpa kastankunawan pelyayänampaqmi ëwayarqan, y Guibeä markapa frentinmanmi pelyayänampaq churanakuyarqan.
21 Tsë junaqmi, Benjaminpa kastankunaqa Guibeä markapita yarqaramur veintidos mil israelïtakunata wanutsiyarqan.
22 Tsënö kaptimpis israelïta soldädukunaqa mana mantsëpam puntata pelyayanqan sitiuman yapë churanakuyarqan.
23 Y Betel markaman witsarmi Jehovä Diospa rikëninchö tardiyanqanyaq waqayarqan. Teyta Jehovätam kënö tapuyarqan: “¿Yapëku wawqïkuna Benjaminpa kastankunawan pelyaq ëwayäshaq?”.+ Teyta Jehovänam, “ëwayë” nirqan.
24 Tsëmi israelïtakunaqa, Benjaminpa kastankunawan pelyayänampaq ishkë kaq junaqchö ëwayarqan.
25 Y Benjaminpa kastankunapis ishkë kaq junaqchömi Guibeä markapita pelyaq yarqarayämurqan, y espädawan pelyaq israelïtakunatam dieciöchu milta wanutsiyarqan.+
26 Tsëmi llapan israelïtakuna Betel markaman witsärir, tsëchö waqar Jehovä Diospa rikëninchö jamayarqan.+ Tsë junaqqa manam imatapis mikuyarqantsu, tardiyanqanyaqmi+ pishtashqa animalkunata+ y Dioswan amïgu kayanqanta rikätsikoq qarëkunata+ Teyta Jehoväpaq rupatsiyarqan.
27 Tsëta rurëkurmi, israelïtakunaqa Jehovä Diosta tapuyarqan.+ Tsë witsampaqqa Diospa Sagrädu Cäjanmi tsëchö këkarqan.
28 (Tsë witsanqa, Sagrädu Cäja këkanqanchömi, Eleazarpa tsurin Finehas+ yanapakurqan, Eleazarpa papäninqa Aaronmi karqan). Pëkunam tapukuyarqan: “¿Juk kuti masku wawqïkuna Benjaminpa kastankunawan pelyaq ëwayäman, o dejariyämanku?”+ nir. Jehovä Diosnam, “ëwayë, warëmi venciyänëkipaq yanapayashqëki” nirqan.
29 Tsëmi israelïta soldädukunaqa, illaqpita yarquyänampaq+ Guibeä markapa entërunman churanakuyarqan.
30 Kima kaq junaqchönam, Benjaminpa kastankunawan pelyayänampaq israelïtakuna yapë witsäyarqan. Puntatanöllam+ Guibeä markachö nunakunawan pelyayänampaq churanakuyarqan.
31 Benjaminpa kastankuna pelyaq yarquriyaptinmi, israelïtakunaqa qatipäyänanta munar tsë markapita qeshpir ëwakuyarqan.+ Tsëmi puntatanölla Benjaminpa kastankunaqa pelyayarqan, y jatun nänikunachömi wakinta wanutsiyarqan (juk nänim Betel markaman witsaq y jukninnam Guibeä markaman). Treintatanömi israelïtakunata nänikunachö wanutsiyarqan.+
32 Tsëmi Benjaminpa kastankunaqa niyarqan: “Puntachönöllam vencïkantsik”.+ Israelïtakunanam kënö nishqa kayarqan: “Qatipämänapaqmi qeshpishun, y tsënömi markankunapita jatun nänikunayaq karupätsishun”.
33 Tsënam Israelpa llapan soldädunkunaqa churanakuyanqan sitiupita yarquskir pelyayänampaq Baal-Tamar sitiuman churanakuyarqan. Y Guibeä markapa entërunchö këkaq israelïtakunapis yarqurmi pelyar qallëkuyarqan.
34 Tsënömi Israelpa allin kaq diez mil soldädunkunaqa Guibeä markapa frentinman churanakuyarqan, y alläpam pelyëkuyarqan. Tsënö kaptimpis Benjaminpa kastankunaqa manam cuentata qokuyarqantsu desgraciapa pasayänampaq kaqta.
35 Jehovä Diosmi Israelpa puntanchö Benjaminpa+ kastankunata vencirqan. Tsë junaqmi israelïtakunaqa, Benjaminpa kastankunata veinticincu mil cienta wanutsiyarqan. Tsë wanoqkunaqa o wañoqkunaqa espädawan pelyaq soldädukunam kayarqan.+
36 Israelïta soldädukunata qeshpir ëwakuyaqta rikëkurmi, Benjaminpa kastankunaqa venciyänampaq kaqta pensayarqan.+ Peru israelïtakunaqa Guibeä markapa entëru lädunchö këkaq soldädukunaman confiakurninmi ëwakoq tukuyarqan.+
37 Y Guibeä markapa entërunchö këkaq soldädukunaqa illaqpita yarquskirmi markaman yëkuyarqan. Entëru lädupa yëkurmi tsë markachö llapankunata espädankunawan wanuratsiyarqan.
38 Israelïta soldädukunaqa parlashqa kayarqan, markapa entëru lädunchö këkaq soldädukuna tsë markaman yëkurirlla juk señaltanö ninata qoyätsiyänampaqmi o qoshnitsiyänampaqmi.
39 Guërrapita israelïtakuna qeshpir ëwakuyaptinmi, Benjaminpa kastankunaqa qatipëkur pelyayarqan y treintatanö israelïta soldädukunata wanutsiyarqan.+ Tsëmi pëkunaqa, “pasaqchö vencinqantsiknöllam kanampis vencïkantsik” niyarqan.+
40 Tsënö nikäyaptinmi Guibeä markachöqa yanäkur-raq nina qoyar o qoshnir qallëkurqan. Tsëqa señalmi karqan. Benjaminpa kastankuna qepaman rikäyänampaqqa, entëru markam qoyëkarqan o qoshnïkarqan.
41 Tsë höram israelïta soldädukunaqa tumëkur pelyar qallëkuyarqan, y Benjaminpa kastankunaqa desgraciachöna këkäyanqanta cuentata qokurmi alläpa mantsakäyarqan.
42 Tsëmi tsunyaq sitiupa qeshpir qallëkuyarqan, peru israelïtakunaqa taripëkurmi wanutsiyarqan. Y tsë kinrë markakunapita yarqamoqkunapis wanutsirmi qallëkuyarqan.
43 Benjaminpa kastankunataqa entërumpam tumapuriyarqan, y mana dejëpam qatipayarqan. Tsënöpam Guibeä markapa frentinchö* venciyarqan.
44 Benjaminpa kastankunapitaqa dieciöchu mil soldädukunam wanuyarqan. Llapanmi puëdeq soldädukuna kayarqan.+
45 Benjaminpa kastankunaqa tumaskirmi tsunyaq sitiuman qeshpir ëwakuyarqan, Rimon jirka+ qaqakunaman. Y israelïtakunaqa jatun nänikunachömi pëkunata cincu milta wanutsiyarqan. Tsënöllam Guidom sitiuyaq qati qatïkur dos milta wanutsiyarqan.
46 Tsë junaqqa Benjaminpa, espädayoq kastankunaqa veinticincu milmi wanuyarqan o wañuyarqan.+ Llapampis puëdeq soldädukunam kayarqan.
47 Y seiscientus nunakunam Rimon jirka qaqakunaman qeshpir ëwakuyarqan, y chusku killapam tsë jirka qaqakunachö kayarqan.
48 Israelïta soldädukunaqa, kutïkurmi tsë markachö nunakunata y animalkunata llapanta wanutsiyarqan, Benjamin kastapita llapan quedaqkunatam ushakätsiyarqan. Y llapan chäyanqan markakunamanmi ninata prendïkuyarqan.
Nötakuna
^ Hebreu idiömachöqa “juk nunanölla” ninmi.
^ Hebreu idiömachöqa “Concubïnäwanmi” ninmi. Rikäri “Bibliachö palabrakunata entiendinapaq” neqta.
^ Hebreu idiömachöqa “concubïnäta” ninmi. Rikäri “Bibliachö palabrakunata entiendinapaq” neqta.
^ Kënöpis niyanmi: pecäduta.
^ Kënöpis niyanmi: tolduntsikman.
^ Kënöpis niyanmi: pecäduta.
^ Hebreu idiömachöqa “juk llanu aqtsa medïdallapapis fallayaqtsu” ninmi.
^ Tsëqa karqan, inti o rupay yarqamunan lädumampam.
