Juëces 4:1-24
4 Ehud wanuskiptinnam, israelïtakunaqa Teyta Jehoväta mana cäsukur yapë mana allikunata rurar qallëkuyarqan.+
2 Tsëmi Jehovä Diosqa Canaanpa gobernantin+ Jabinpa makinchö israelïtakunata dejarqan, tsë gobernantiqa Hazor markachömi mandakurqan. Soldädunkunapa mandaqninqa Sïsaram karqan, pëqa Haröset-Ha-Goyim*+ sitiuchömi täkoq.*
3 Jabinpaqa guërrapaq novecientus carrëtankunam kapurqan, tsë carrëtakunapa ruëdankunachömi jatusaq höcikuna* kaq.+ Pëqa veinti watapanam israelïtakunata alläpa sufritsirqan.+ Tsëmi israelïtakunaqa Jehovä Diosman rogakuyarqan yanapëkunampaq.+
4 Tsë witsankunaqa Teyta Diospa willakoqnin Dëboram+ Israelchö juzguëkarqan,* pëqa Lapidotpa warminmi karqan.
5 Dëboraqa, Ramäwan+ Betel+ markakuna tinkoq sitiuchömi palmëra chakinchö imëpis jamakoq, tsëqa karqan Efrainpa jirkankunachömi. Pë kaqtam israelïtakunaqa problëmankunata arreglaq ëwayaq.
6 Pëmi Neftalïpa+ kastankuna chaskiyanqan Quedes markapita Abinoampa tsurin Baracta+ qayëkatsir nirqan: “Israelpa Diosnin Jehovämi kënö mandashunki: ‘Ëwë, Neftalïpa kastankunapita y Zabulonpa kastankunapita diez mil soldädukunata pusharkur Tabor jirkaman witsë.
7 Y noqam, Jabinpa soldädunkunapa mandaqnin Sïsarata, guërrapaq carrëtankunatawan soldädunkunata Cison pampaman+ apamushaq, y makikimanmi churamushaq’”.+
8 Tsënö niptinmi Baracqa, “noqawan ëwaptikiqa, ëwashaqmi; mana ëwaptikiqa, manam ëwashaqtsu” nirqan.
9 Dëboranam nirqan: “Awmi, ëwashunmi. Peru kë guërrachöqa manam qamtatsu alabayäshunki. Jehovä Diosqa Sïsarata juk warmi wanutsinantam permitinqa”.+ Tsënam Dëboraqa Baracwan Quedes markata ëwarqan.+
10 Baracnam Zabulonpa kastankunata y Neftalïpa+ kastankunata Quedesman qayatsirqan, y diez mil soldädukunam Baracwan ëwayarqan. Dëborapis pëwanmi ëwarqan.
11 Quenïta kasta Moisespa suegrun+ Hobabpa familiampitam, quenïta+ kasta Hëberqa rakikashqa karqan. Y Zaananimchö këkaq jatun monti o jatun qeru lädunchömi carpan* rurarqan, tsëqa Quedes lädumampam karqan.
12 Tabor jirkaman Abinoampa tsurin Barac witsashqa kanqantam Sïsarata willayarqan.+
13 Tsënam Sïsaraqa fiërrupita höciyoq* novecientus carrëtankunata alistarqan y Haröset-Ha-Goyim* sitiupita shamoq llapan soldädunkunata qayatsirqan Cison pampaman ëwayänampaq.+
14 Y Dëboranam Baracta nirqan: “Jinan höra urë, kanan junaqmi Sïsarata wanutsinëkipaq Jehovä Dios yanapashunki. ¿Manaku puntëkita Jehovä ëwëkan?”. Tsënö niptinmi Baracqa Tabor jirkapita diez mil soldädunkunawan urarqan.
15 Barac pelyar qallëkuptinmi, Jehovä Diosqa Sïsarata, guërrapaq carrëta manejaqkunata y llapan soldädunkunata pantatsir qallëkurqan y llapankunatam espädawan ushakätsirqan.+ Tsënam Sïsaraqa carrëtampita bajarir chakipa qeshpir ëwakurqan.
16 Baracqa, tsë soldädukunata y guërrapaq carrëtakunatam Haröset-Ha-Goyim* sitiuyaq qatiparqan. Sïsarapa llapan soldädunkunatam espädawan wanutsiyarqan y manam jukllëllapis kawëkarqa quedarqantsu.+
17 Tsënam Sïsaraqa, quenïta kasta Hëberpa+ warmin Jaelpa+ carpanman* qeshpir ëwarqan. Tsëmanqa ëwarqan Hazorchö gobernaq Jabinwan+ Hëberpa familian mana chikinakuyaptinmi.
18 Tsënam Jaelqa carpampita* yarquskir Sïsarata taripaq ëwarqan y nirqan: “Teytallë, ama mantsakuytsu, carpäman yëkuri”. Tsënam carpanman Sïsara yëkuriptin Jaelqa frazädawan qatarkurqan.
19 Tsënam Sïsaraqa Jaelta nirqan: “Yakullä qarëkallämë, alläpam yakunëkullä”. Tsënam Jaelqa qara porongupita lichita qararqan,+ tsëpitanam frazädawan yapë qatarkurqan.
20 Sïsaranam nirqan: “Carpapa* punkunllachö rikachakur quedakuy, pillapis ‘¿këman juk nuna chämushqaku?’ nir tapushuptikiqa, ‘manam’ ninki”.
21 Tsënam Sïsaraqa punukaskirqan. Tsëyaqnam Hëberpa warmin Jaelqa carpapa* estäcanta y taksha combata aptarkur* yachëllapa witïkur peqampa o umampa estäcata clavëkurqan. Y estäca patsayaq yëkuskiptinmi Sïsaraqa wanurirqan.+
22 Sïsarata ashir Barac chäriptinnam, Jaelqa carpampita* yarqurir, “shamuy, ashikanqëki nunatam rikätsishqëki” nirqan. Tsënam Baracqa carpaman yëkuskir Sïsarata wanushqata rikëkurqan, juk estäcam peqanchö o umanchö clavarëkänaq.
23 Tsë junaqmi, Canaanpa gobernantin Jabinta venciyänampaq israelïtakunata Teyta Dios yanaparqan.+
24 Y israelïtakunaqa Canaanpa gobernantin+ Jabinwanmi pelyar sïguiyarqan, hasta ushakätsiyanqanyaq.+
Nötakuna
^ O “nacionkunapa Harösetnin”.
^ Kënöpis niyanmi: täraq; päraq.
^ Hebreu idiömachöqa “fiërrupita carrëtakuna” ninmi.
^ Tsënö nirqa, Dios imanö juzganqantam musyatsikuykarqan.
^ Kënöpis niyanmi: toldun.
^ Hebreu idiömachöqa “fiërrupita carrëtakunayoq” ninmi.
^ O “nacionkunapa Harösetninyaq”.
^ O “nacionkunapa Harösetninyaq”.
^ Kënöpis niyanmi: toldunman.
^ Kënöpis niyanmi: toldumpita.
^ Kënöpis niyanmi: Toldupa.
^ Kënöpis niyanmi: toldupa.
^ Kënöpis niyanmi: tsarirkur.
^ Kënöpis niyanmi: toldumpita.
