Juëces 8:1-35
8 Tsënam Efrainpa kastankunaqa Gedeonta kënö tapuyarqan: “¿Imanirtaq këta rurayämarqunki? ¿Imanirtaq madianïta soldädukunawan pelyaq ëwëkar willayämarqunkitsu?”.+ Tsënö nirmi qayapäyarqan.+
2 Tsënam Gedeonqa nirqan: “Qamkunam noqapita masta rurayarqunki. ¿Manaku Efrainpa+ kastankuna pallayanqan üvas sobrakunaqa, Abï-Ëzer+ cosechanqampitapis mas alli?
3 Teyta Diosqa madianïta soldädukunapa dirigeqninkuna Orebtawan Zeebta wanutsiyänëkipaqmi yanapayäshurqunki.+ Qamkunam noqapita masta rurayarqunki”. Tsënö niptinmi pëkunaqa imapis niyarqannatsu.
4 Tsëpitanam Gedeonqa trescientus soldädunkunawan Jordan mayuman* chärir tsimparqan. Pishipashqa* këkarpis, chikeqninkunata qatipëkäyarqanllaran.
5 Sucot markaman chëkurnam, tsëchö nunakunata nirqan: “Rogakuyashqëki, soldädükunata tantankuna qarëkulläyë. Pishipashqam* këkäyä y madianïtakunapa gobernaqninkuna Zëbahtawan Zalmunäta qatiparmi ëwëkäyä”.
6 Tsëmi Sucot markachö dirigeqkunaqa, “¿Zëbahtawan Zalmunätaqa prësumurqunkinaku soldäduykikunata tantata qarayänäpaq?” niyarqan.
7 Tsënam Gedeonqa nirqan: “Tsënö niyämanqëkipitam, Jehovä Dios yanapamaptin Zëbahtawan Zalmunäta prësurirqa, jirkapita kashakunata apëkamur qarëkikunapis rachinqanyaq astayashqëki”.+
8 Tsëpitanam Penuel markaman witsarqan, y tsëchö nunakunatapis tantatam mañakurqan, y pëkunaqa Sucot markachö nunakunanöllam contestayarqan.
9 Tsëmi Penuelchö nunakunata nirqan: “Pëkunata vencirir kutiramurmi, kë törrita ushakätsishaq”.+
10 Zëbahwan Zalmunäqa quinci milnö soldädunkunawanmi Carcor sitiuchö këkäyarqan. Inti o rupay yarqamunan lädupita ëwaq soldädukunaqa+ tsëllanam kayarqan. Y espädawan pelyaq cientu veinti mil soldädukunaqa wanushqanam kayarqan.
11 Gedeonqa, carpakunallachö* kawaq nunakuna puriyänan nänipam witsarqan, Nöbah sitiupa y Jogbehä+ markapa inti o rupay yarqamunan lädumpa, y cuentata mana qokuyanqanyaqmi chikeqninkunapa campamentunman chëkur atacarqan.
12 Tsënam madianïtakunapa ishkan gobernaqninkuna Zëbahwan Zalmunäqa qeshpir ëwakuyarqan. Y Gedeonqa qatipëkurmi prësurqan, tsëmi chikeqnin soldädukunaqa alläpa mantsakar imanö këtapis puëdiyarqantsu.
13 Tsëpitanam Joaspa tsurin Gedeonqa pelyanqampita kutirqan Hëresman witsaq nänipa.
14 Nänipa ëwarëkarnam Sucot sitiupita juk jövinta prësurir tapuparqan. Tsënam tsë jövinqa Sucotchö dirigeqkunapa y autoridäkunapa jutinkunata qellqëkur entregarqan, llapanqa setenta y siëtim kayarqan.
15 Tsënam Gedeonqa Sucot sitiuchö këkaqkunaman ëwar nirqan: “Këchömi Zëbahwan Zalmunä këkäyan, pëkunarëkurmi noqapita burlakur, ‘¿imanirtaq pishipashqa* soldäduykikunata tantan qarayäman? ¿Zëbahtawan Zalmunäta prësurqunkinaku?’ niyämarqëki”.+
16 Tsëpitanam tsë markachö dirigentikunata prësurqan y jirka kashakunawanmi Sucotpita+ nunakunata qarankunapis rachinqanyaq astarqan.
17 Y Penuel+ markachö törritam ushakätsirqan y tsë markachö llapan ollqukunatam wanutsirqan.
18 Zëbahwan Zalmunätam, “Tabor jirkachö wanutsiyanqëki nunakunaqa, ¿pinötan kayarqan?” nir tapurqan. Pëkunanam niyarqan: “Qamnömi kayarqan. Llapampis gobernantipa tsurinkunanömi kayarqan”.
19 Pënam nirqan: “Wawqïkunam kayarqan, mamänïpa wamrankuna. Kawëkaq Jehovä Diospa jutinchömi nï, pëkunata wanutsiyanqëkipitam qamkunata kanan wanutsiyashqëki”.
20 Tsënam mayor kaq tsurin Jeterta, “¡juklla wanuratsi!” nirqan. Peru pëqa jövinllaraq karmi mantsarqan, tsëmi espädanta sutarqantsu.
21 Tsënam Zëbahwan Zalmunäqa niyarqan: “Rasumpa ollqu karqa mä kikiki wanutsiyämë”. Tsënam Gedeonqa Zëbahtawan Zalmunäta+ wanuratsirqan, y camëllunkunapa kunkankunachö këkaq llullu killa niraq aläjankunatam apakurqan.
22 Tsëpitanam israelïtakunaqa Gedeonta niyarqan: “Qammi madianïta nunakunapita salvayämarqunki.+ Qam gobernayämë, y wamrëkiwan willkëkipis gobernayämätsun”.
23 Tsënam Gedeonqa nirqan: “Manam noqaqa gobernayashqëkitsu, ni manam tsurïpis gobernayäshunkitsu. Teyta Jehovämi gobernayäshunkiqa”.+
24 Tsëpitanam Gedeonqa nirqan: “Jukta rogakuyashqëki: chikiyäshoqniki soldädukunata wanuratsir apayämunqëki cösaskunapita, senqaman churana adornukunata cada ünu entregayämë”. (Venciyanqan soldädukunaqa ismaelïtakunam kayarqan,+ tsëmi pëkunaqa senqaman churana adornukunata utilizäyaq).
25 Tsënam, “awmi, entregayashqëkim” niyarqan. Y juk jakuta mashtëkurmi senqaman churayänan adornukunata cada nuna jukta jitarqan.
26 Senqaman churana adornukunata mañakunqanqa örupitam karqan, llapanqa diecinuëvi kïlusmi lasarqan.* Y manam llullu killa niraq aläjakunata, wallqakunata, madianïtakunapa gobernantinkuna utilizäyanqan granäti millwapita röpakunata, ni camëllukunapa wallqankunataqa yupayarqantsu.+
27 Gedeonqa tsë örupitam juk sagrädu mandilta*+ rurarqan y tsëtam Ofrä+ markanman churarqan rikäyänampaq. Tsënam israelïtakunaqa Diosta dejaskir* tsë mandilta+ adorar qallëkuyarqan, tsë mandilmi Gedeonpaq y familiampaq trampa cuenta karqan.+
28 Israelïtakunaqa tsënömi madianïta nunakunata venciyarqan. Madianïtakunaqa+ manam israelïtakunapa contran yapëqa sharkuyarqannatsu.* Gedeon kawanqan witsanqa, cuarenta watapam tsë sitiukunachö yamë kawakuyarqan.+
29 Joaspa tsurin Jerubaalqa*+ wayintam kutikurqan y tsëchömi quedakurqan.
30 Atska warmiyoq kashqa kaptinmi, Gedeonpaqa setenta tsurinkuna karqan.
31 Y Siquem markachö sirweqnin* warmichöpis juk tsurin karqanmi, pëtam Abimëlec+ nir jutin churarqan.
32 Gedeonqa mëtsika watakunapam kawarqan y tsëpitanam wanukurqan o wañukurqan. Y abi-ezrïta+ nunakunapa Ofrä niyanqan sitiunchömi papänin Joas pamparanqanman pampayarqan.
33 Gedeon wanuriptinqa, israelïtakunaqa yapëmi, jukwan jukwan kakoq* cuenta, Baal santukunata adorayarqan*+ y Baal-Berit santutam diosninkuna+ kanampaq akrayarqan.
34 Llapan chikeqninkunapita salvëkaptimpis,+ israelïtakunaqa Jehovä Diosninkunatam qonqëkuyarqan.+
35 Y pëkunapaq Jerubaal niyanqan Gedeon imëkata rurashqa kaptimpis, israelïtakunaqa manam pëpa familianta rasumpa* kuyayarqantsu.+
Nötakuna
^ Kënöpis niyanmi: riuman.
^ Kënöpis niyanmi: Utishqa; Shaykushqa.
^ Kënöpis niyanmi: Utishqam; Shaykushqam.
^ Kënöpis niyanmi: toldukunallachö.
^ Kënöpis niyanmi: utishqa; shaykushqa.
^ Hebreu idiömachöqa “1.700 siclum lasarqan” ninmi. 1 sicluqa 11,4 grämusmi lasaq. Rikäri “Masllata musyanapaq” neqchö B14 kaqta.
^ Hebreu idiömachöqa “efod” ninmi. Rikäri “Bibliachö palabrakunata entiendinapaq” neqta.
^ O “qowanta o runanta jukwan engañaq warminö traicionar”.
^ Hebreu idiömachöqa “manam peqankunata pallariyarqannatsu” ninmi.
^ Tsënöqa Gedeontam niyaq. Rikäri Juëces 6:32 textuta.
^ Hebreu idiömachöqa “concubïna” ninmi. Rikäri “Bibliachö palabrakunata entiendinapaq” neqta.
^ O “oqllanakoq”.
^ O “qowanta o runanta jukwan engañaq warminö Diosta traicionayarqan”.
^ O “alläpaqa”.
