Lücas 15:1-32
15 Tsënam impuestuta cobraqkuna y jutsa* ruraqkunaqa, yachatsikunqanta wiyayänampaq Jesuspa lädunman juntakäyarqan.+
2 Fariseukuna y Ley qellqaqkunaqa, pëpaq mana allita parlarmi kënö niyaq: “Kë nunaqa jutsa* ruraqkunata kushishqa chaskirmi pëkunawan juntu mikun”.
3 Tsënam pëqa kë igualatsikuyta pëkunata nirqan:
4 “¿Pï nunatan cien üshankunapita juk oqrakaptinqa, noventa y nuëvi kaqta pampachö dejëkur oqrakashqa kaqta tariyanqanyaq asheq ëwantsu?+
5 Tarïkurqa alläpa kushishqam hombrurkur apakun.
6 Y wayinman chëkurqa, amïgunkunata y vecïnunkunata qayëkurmi kënö nin: ‘Noqawan kushikuyë, oqrakashqa üshätam tarirqö’.+
7 Noqam qamkunata nï,* tsënöllam ciëluchöqa arrepentikuyta mana wanaq* noventa y nuëvi alli ruraq nunakunapaq kushikuyanqampitapis masqa, juk jutsa* ruraq arrepentikuptin kushikuyanqa.+
8 ¿O mëqan warmitan chunka dracma* qellënimpita jukta oqrëkurqa, chiwchita tsarirkatsir wayinta pitsar tarinqanyaq ashintsu?
9 Tarïkurqa, yanasankunata y vecïnankunata qayëkurmi kënö nin: ‘Noqawan kushikuyë, oqranqä dracma* qellënïtam tarirqö’.
10 Noqam qamkunata nï,* tsënöllam juk jutsata* ruraq arrepentikuptinqa, Teyta Diospa angelninkunapis alläpa kushikuyan”.+
11 Tsëpitanam kënö nirqan: “Juk nunapam ishkë tsurinkuna karqan.
12 Mas jövin kaqmi papäninta kënö nirqan: ‘Pä, tocamanqan herenciata entreguëkamë’. Tsënam pëqa imëka kapunqanta ishkanta rakïkurqan.
13 Juk ishkë junaq pasariptinnam, mas jövin kaq tsurinqa llapan kapunqanta aparkur karu nacionta ëwakurqan. Tsëchömi lluta kawakur llapan kapunqanta usharqan.
14 Llapan kapunqanta usharinqanchönam, tsë nacionchö alläpa mallaqë kaptin imampis mikunampaq karqantsu.
15 Tsëmi tsë nacionchö juk nunaman ëwëkur trabajadornin kanampaq nirqan, y pëqa pampakunachö kuchinkunata cuidanampaqmi mandarqan.+
16 Y kuchikuna mikuyanqan algarröbuta mikuyta munëkaptimpis, manam ni pï imanllapis qarëkurqantsu.
17 Mana allita ruranqanta cuentata qokurmi kënö nirqan: ‘¡Papänïpa ëka trabajadorninkunaraq* mëtsika mikuyyoq këkäyan, peru noqaqa këchö mallaqëpitapis wanurïnam o wañuykänam!
18 Papänïpa wayinta kutirmi kënö nishaq: “Papä, ciëluchö këkaq Teyta Diospa y qampa contrëkim jutsata* rurarqö.
19 Ama tsurikitanöqa chaskimënatsu, sinöqa qampaq trabajaqkunatanöllana”’.
20 Tsënö nirmi papänimpa wayinta kutikurqan, y papäninqa karullataraq ëwëkaqta rikëkurmi alläpa llakipar* cörripa ëwarqan, y waqurkur o makallarkurmi kuyëpa mutsar chaskirqan.
21 Tsënam tsurinqa kënö nirqan: ‘Papä, ciëluchö këkaq Teyta Diospa y qampa contrëkim jutsata* rurarqö.+ Ama tsurikitanöqa chaskimënatsu’.
22 Peru papäninqa sirweqninkunatam kënö mandarqan: ‘¡Kanan höra mas alli kaq largu röpata apamur tsëwan vistitsiyë, makinman sortijata churatsiyë y llanqita llanqitsiyë!
23 Y mas wira* kaq mallwa töruta apamur mikunapaq pishtayë, tsurï kutimunqampita fiestata rurashun.
24 Kë tsurïqa wanushqanöna këkanqampitam kawarimushqa,+ y oqrakashqa këkanqampitam kutimushqa’. Tsënam llapan kushikur qallëkuyarqan.
25 Mayor tsurinqa chakrachömi këkarqan. Kutir wayiman chëkarnam, müsicata y tushur këkäyaqta wiyarqan.
26 Tsëmi juk sirwipakoqta qayëkur ima pasëkanqanta tapurqan.
27 Pënam nirqan: ‘Wawqikim chämushqa. Sänu y kawëkar kutimushqa kaptinmi papänikiqa mas wira* kaq mallwa töruta pishtatsishqa’.
28 Tsënö niptinnam mayor kaq tsurinqa alläpa cölerar yëkuytapis munarqantsu. Tsënam papäninqa yarqamur yëkunampaq rogarqan.
29 Peru pëqa kënömi papäninta contestarqan: ‘Rikë, noqaqa mëtsika watanam esclävunö qampaq trabajamurqö, y llapan mandamanqëkitam rurarqö. Tsënö kaptimpis noqataqa manam ni juk kutillapis amïgükunawan kushishqa mikurinäpaq llullu cabrallatapis qaramarqunkitsu.
30 Peru qellëpaqrëkur jukwan jukwan kakoq* warmikunawan imëkëkita ushareq tsurikipaqqa, chäramuptinllam mas wiran* kaq mallwa töruta pishtatsirqunki’.
31 Tsënam pëqa nirqan: ‘Hïju, qamqa manam imëpis dejamarqunkitsu, y llapan kapamanqanmi qampa.
32 Peru wawqiki kutimushqa kaptinmi fiestata rurar kushikunantsik. Wawqikiqa wanushqanöna këkanqampitam kawarimushqa, y oqrakashqa këkanqampitam kutimushqa’”.
Nötakuna
^ Kënöpis niyanmi: pecädu.
^ Kënöpis niyanmi: pecädu.
^ Kënöpis niyanmi: niyaq.
^ Kënöpis niyanmi: necesitaq.
^ Kënöpis niyanmi: pecädu.
^ Kënöpis niyanmi: niyaq.
^ Kënöpis niyanmi: pecäduta.
^ O “pagüpaq trabajaqninkunaraq”.
^ Kënöpis niyanmi: pecäduta.
^ Kënöpis niyanmi: ankupar; kuyapar.
^ Kënöpis niyanmi: pecäduta.
^ Kënöpis niyanmi: wera.
^ Kënöpis niyanmi: wera.
^ Kënöpis niyanmi: oqllanakoq.
^ Kënöpis niyanmi: weran.
