Levïticu 3:1-17
3 Mëqëkipis Teyta Dioswan amïgu kayanqëkita rikätsikoq qarëta+ Teyta Jehoväpaq aparqa, wäkata o töruta karpis sänutam apayänëki.
2 Tsëpitanam tsë animalpa peqanman o umanman makikikunata churayänëki, y carpa* wayipa yëkunanchömi pishtayänan. Aaronpa tsurin sacerdötikunam, tsë animalpa yawarninta altarpa llapan kuchunman pillchitsiyänan.*
3 Teyta Dioswan amïgu kayanqëkita rikätsikur apayanqëki qarëtaqa, wakinllatam Teyta Jehoväpaq rupatsiyänampaq entregayänëki.+ Tsë animalpa pacha wiranta y aqishninchö* wirantam Teyta Diospaq rupatsiyänampaq entregayänëki.+
4 Tsënöllam ishkan riñonninta, riñonninchö wirata y ñatinninchö wiratapis entregayänëki.+
5 Aaronpa tsurinkunam tsë llapanta altarchö rupatsiyänan. Y tsëtaqa, rawrëkaq o lunyëkaq yanta jananchö rupëkaq qarëtawan juntum rupatsiyänan.+ Tsëqa ushakanqanyaq rupatsina qarëmi kanqa, y ninawan rupanqanqa Teyta Jehoväta alläpam gustanqa.+
6 Mëqëkipis Teyta Dioswan amïgu kayanqëkita rikätsikur Teyta Jehoväpaq üshata o cabrata aparqa, chinata o orquta* karpis sänutam apayänëki.+
7 Mallwa carnëruta aparqa, Teyta Jehoväpa rikëninmanmi apayänëki.
8 Tsëpitanam tsë animalpa peqanman o umanman makikikunata churayänëki, y carpa* wayipa yëkunanchömi pishtayänan. Y Aaronpa tsurin sacerdötikunam tsë animalpa yawarninta altarpa llapan kuchunman pillchitsiyänan.*
9 Tsëpitanam Teyta Dioswan amïgu kayanqëkita rikätsikur apayanqëki animalpa chupanchö wirata, pachanchö wirata y aqishninchö wirata Teyta Jehoväpaq rupatsiyänampaq entregayänëki.+
10 Tsënöllam ishkan riñonninta, riñonninchö wirata y ñatinninchö wiratapis entregayänëki.+
11 Tsë llapanqa Teyta Diospaqmi kanqa, y sacerdötim altarchö rupatsinan. Tsëqa Teyta Jehoväpaq rupatsishqa qarëmi kanqa.+
12 Cabrata aparqa, Teyta Jehoväpa rikëninmanmi apayänëki.
13 Tsëpitanam tsë animalpa peqanman o umanman makikikunata churayänëki, y carpa* wayipa yëkunanchömi pishtayänan. Aaronpa tsurin sacerdötikunam tsë animalpa yawarninta altarpa llapan kuchunman pillchitsiyänan.*
14 Tsë animalpa pachanchö wirata y aqishninchö* wiratam Teyta Jehoväpaq rupatsiyänampaq entregayänëki.+
15 Tsënöllam ishkan riñonninta, riñonninchö wirata y ñatinninchö wiratapis entregayänëki.
16 Tsë llapan Teyta Jehoväpaq kaptinmi+ sacerdöti altarchö rupatsinan. Tsëqa rupatsishqa qarëmi kanqa, y ninawan rupanqanqa Teyta Diosta alläpam gustanqa.
17 Teyta Diosnintsik kënö mandakunqantaqa, mëchö kawarnimpis qamkuna y tsëpita yureq tsurikikunapis cumpliyänëkim. Manam yawarta ni wirataqa imëpis mikuyänëkitsu’”.+
Nötakuna
^ Kënöpis niyanmi: toldu.
^ Kënöpis niyanmi: chispiatsiyänan.
^ Kënöpis niyanmi: aqashninchö.
^ Kënöpis niyanmi: mächuta.
^ Kënöpis niyanmi: toldu.
^ Kënöpis niyanmi: chispiatsiyänan.
^ Kënöpis niyanmi: toldu.
^ Kënöpis niyanmi: chispiatsiyänan.
^ Kënöpis niyanmi: aqashninchö.
