Levïticu 7:1-38
7 Culpayoq kayanqampita Teyta Diospaq apayämunqan sagrädu qarëkunawanqa, Teyta Diosnintsik kë mandakunqannömi rurayänëki:+
2 Culpayoq kayanqampita apayämunqan qarëtaqa, ushakanqanyaq rupatsina qarëkunata pishtayänan sitiuchömi Teyta Diospa rikëninchö pishtayänëki. Y tsë animalpa yawarninwanmi altarpa llapan lädunta pillchitsiyänëki.*+
3 Sacerdötim tsë animalpa chupanchö wirata+ y aqishninchö* wirata jipinan.
4 Tsënöllam ishkan riñonninta, riñonninchö wirata y ñatinninchö wiratapis jipinan.+
5 Tsëpitanam sacerdötiqa tsë llapan wirata altarchö rupatsinan. Tsëqa Teyta Jehoväpaq rupatsishqa qarëmi kanqa.+ Tsë qarëqa culpayoq kayanqampita apayämunqanmi kanqa.
6 Tsë animalpa ëtsantaqa sacerdötikunallam sagrädu sitiuchö mikuyänan.+ Tsë qarëqa alläpa sagrädum kanqa.+
7 Jutsankunapita* perdonashqa kayänampaq apayämunqan qarëwan rurayanqëkinöllam, culpayoq kayanqampita apayämunqan qarëwampis rurayänëki. Tsë animalpa ëtsanqa, wiranta rupatseq sacerdötipaqmi kanqa.+
8 Jutsata* rurayanqampita Teyta Diospaq ushakanqanyaq rupatsina qarëpaq apayämunqan animalpa qaranqa,+ tsë qarëta rupatseq sacerdötipaqmi kanqa.
9 Hornuchö rurashqa, kaswilachö ankashqa o läta jananchö ankashqa gränu qarëkunapita sobraqqa,+ tsë qarëta rupatseq sacerdötipaqmi kanqa.+
10 Peru aceitiwan pichushqa+ o tsaki harinata+ apayämuptinqa, Aaronpa tsurinkunapaqmi kanqa, y cada ünum igual chaskiyänan.
11 Pï nunapis Teyta Jehoväwan amïgu kanqanta rikätsikur+ Pëpaq qarëta apamuptinqa, Teyta Diosnintsik mandakunqannömi rurayänëki:
12 Teyta Diosnintsikta agradecikurnin tsë qarëta apayämuptinqa,+ tsë qarëtawan juntum aceitiwan pichushqa levadürannaq roscakunata, aceitiwan llushishqa levadürannaq gallëtakunata y alli aqashqa harinata aceitiwan pichurkur rurayanqan roscakunata apayämunan.
13 Tsë qarëkunatawan juntum levadürayoq roscakunata, y agradecikurnin Teyta Dioswan amïgu kayanqanta rikätsikoq qarëkunata apayämunan.
14 Y apayämunqan qarëkunapitam, cada ünupita Teyta Jehoväpaq jukta rakiyänan. Tsë rakiyanqanqa sagrädu qarëmi kanqa, y Teyta Dioswan amïgu kayanqanta rikätsikur apayanqan animalpa yawarninta pillchitseq* sacerdötipaqmi kanqa.+
15 Agradecikurnin Teyta Dioswan amïgu kayanqanta rikätsikur apayanqan qarë ëtsataqa, apayanqan junaqmi mikuyänan, y manam waränimpaq churayänantsu.+
16 Teyta Diosta änikushqa karnin+ o kikinkuna munarnin+ Teyta Diospaq apayämunqan ëtsataqa, apayämunqan junaqmi mikuyänan. Y sobranqantaqa waränin junaqpis mikuyta puëdiyanqam.
17 Peru Teyta Dioswan amïgu kayanqanta rikätsikur apayanqan ëtsa kima kaq junaqyaq sobraptinqa, ushakanqanyaqmi rupatsiyänan.+
18 Pï nunapis kima kaq junaqchö tsë sobranqan ëtsata mikuptinqa, manam Teyta Diosnintsik tsë nunapa qarëninta chaskinqatsu. Y tsë apanqan qarëqa manam imapaqpis välinqatsu. Tsë sobraq ëtsa Teyta Diospa rikënimpaq melanëpaq kaptinmi, tsë ëtsata mikoqqa castigashqa kanqa.+
19 Imapis Teyta Diospa rikëninchö mana limpiu këkar tsë ëtsata topaptinqa, manam tsë ëtsata mikuyänantsu. Teyta Diospa rikëninchö limpiu kaqkunallam, Teyta Diospa rikënimpaq limpiu ëtsataqa mikuyänan.
20 Teyta Jehoväwan amïgu kayanqanta rikätsikur pëpaq apayämunqan qarëta, pï nunapis Teyta Diospa rikënimpaq mana limpiu këkarnin mikuptinqa, tsë nunata wanutsiyänëkim.+
21 Pï nunapis Teyta Diospa rikëninchö mana limpiu këkaq nunata,+ animalta+ o imatapis yatashqa këkar,+ Teyta Jehoväwan amïgu kayanqanta rikätsikur apayanqan qarë ëtsata mikuptinqa, tsë nunata wanutsiyänëkim’”.
22 Tsëpitanam Teyta Jehoväqa Moisesta kënö nirqan:
23 “Israelïtakunatam këta ninëki: ‘Manam törupa, mallwa carnërupa ni cabrapa wiranta mikuyänëkitsu.+
24 Wanushqa animalpa wiranta o animal mayin wanutsinqan animalpa wirantaqa, imachöpis utilicëta puëdiyankim, tsënö kaptimpis, manam mikuyänëtsu.+
25 Teyta Jehoväpaq rupatsiyänampaq apayämunqan animalpa wiranta mikoq nunataqa, wanutsiyänëkim.
26 Mëchö kawarnimpis, manam pishqukunapa ni ima animalpa yawarnintaqa mikuyänëkitsu.+
27 Yawarta mikoq nunataqa, wanutsiyänëkim’”.+
28 Tsëpitanam Teyta Jehoväqa Moisesta kënö nirqan:
29 “Israelïtakunatam këta ninëki: ‘Mëqëkipis Teyta Jehoväwan amïgu kayanqëkita rikätsikoq qarënin apëta munarqa, tsë qarëpita tocanqan kaqtam Teyta Jehoväpaq apayänëki.+
30 Teyta Jehoväpaq rupatsiyänampaqmi tsë animalpa wiranta y pëchunta apayänëki.+ Tsëpitanam Teyta Jehoväpa rikëninchö tsë qarëta puntaman y qepaman kuyutsiyänëki.*+
31 Y sacerdötim apayanqëki wirata altarchö rupatsinan,+ peru animalpa pëchunqa Aaronpaqwan tsurinkunapaqmi kanqa.+
32 Teyta Dioswan amïgu kayanqëkita rikätsikur apayanqëki animalpa derëcha kaq chankanqa, sacerdötipaq sagrädu qarëmi kanqa.+
33 Tsë chankantaqa, Teyta Dioswan amïgu kayanqëkita rikätsikur apayanqëki animalpa yawarninta pillchitseq* y wiranta Teyta Diospaq rupatseq Aaronpa tsurintam makyayänëki.+
34 Kuyutsiyanqëki animalpa pëchun, y Teyta Dioswan amïgu kayanqëkita rikätsikur apayanqëki animalpa derëcha kaq chankanqa Teyta Diospaqmi kanqa. Teyta Diosqa sacerdöti Aaronpaq y tsurinkunapaq kanampaqmi nishqa. Teyta Dios tsënö mandakunqantaqa, qamkuna y tsëpita yureq tsurikikunapis cumpliyänëkim.+
35 Tsëtaqa sacerdöti kayänampaq Teyta Jehoväpita carguta chaskiyanqan junaqmi,+ Teyta Jehoväpaq rupatsiyänampaq apayanqëki animalkunapa ëtsampita Aaronpaq y tsurinkunapaq rakiyänëki.
36 Tsëtaqa sacerdöti kayänampaq carguta chaskiyanqan junaqmi Teyta Jehovä mandakurqan.+ Tsë mandakunqantaqa qamkuna y tsëpita yureq kastëkikunapis cumpliyänëkim’”.
37 Tsëkunatam Teyta Dios mandakurqan ushakanqanyaq rupatsina qarëkunapaq,+ gränupita rurashqa qarëkunapaq,+ jutsankunapita* perdonashqa kayänan qarëkunapaq,+ culpayoq kayanqampita qarëkunapaq,+ sacerdötikuna carguta chaskiyaptin rurayanqan qarëkunapaq+ y Teyta Dioswan amïgu kayanqanta rikätsikur apayanqan qarëkunapaq.+
38 Tsëkunataqa Sinaï jirkachö këkaptinmi Teyta Jehovä Moisesta mandarqan.+ Tsëtaqa rurarqan, Teyta Jehoväpaq qarëkunata apayänampaq Sinaï tsunyaq sitiuchö këkäyaptin israelïtakunata mandanqan junaqmi.+
Nötakuna
^ Kënöpis niyanmi: chispiatsiyänëki.
^ Kënöpis niyanmi: aqashninchö.
^ Kënöpis niyanmi: Pecädunkunapita.
^ Kënöpis niyanmi: Pecäduta.
^ Kënöpis niyanmi: chispiatseq.
^ Tsënö nirqa, altar këkanqan lädumampa puntaman y qepaman kuyutsiyanqampaqmi parlëkan.
^ Kënöpis niyanmi: chispiatseq.
^ Kënöpis niyanmi: pecädunkunapita.
