Nümerus 23:1-30
23 Tsëpitanam Balaamqa Balacta nirqan: “Qanchis törukunata y qanchis carnërukunata rupatsinapaq qanchis altarkunata perqë”.+
2 Balacqa Balaam ninqannöllam altarkunata rurarqan. Tsëchömi Balacwan Balaamqa, tsë animalkunata rupatsiyarqan.+
3 Tsëpitanam Balaamqa Balacta nirqan: “Noqaqa washatam ëwä. Qamqa kë ushakanqanyaq rupatsinqëki qarënikikuna këkanqanllachö quedakuy. Kutiramurnam Teyta Jehovä nimanqanta willashqëki”. Tsënö nirmi Balaamqa mana imapis kaq jirkaman ëwarqan.
4 Teyta Dios parlapaptinmi,+ Balaamqa nirqan: “Qanchis altarkunachömi törukunata y carnërukunata rupatsiyarqö”.
5 Teyta Jehovänam Balaamta+ nirqan: “Balac kaqman kuti y ninqäta willë”.
6 Kutiskirnam, Balacta y Moabchö dirigeqkunata altar lädunchö tarirqan.
7 Tsënam Balaamqa Teyta Dios ninqanta kënö willarqan:+
“Inti o rupay yarqamunan läduchö këkaq Aram markapitam,+Moabpa mandaqnin Balacqa kënö nirnin qayatsimarqan:
‘Shamuy y noqapa rantï Jacobpa kastankunata maldicïkuy.
Israelïtakuna ushakäyänampaq parlëkullë’.+
8 ¿Imanöparaq Teyta Dios yanapëkanqan sirweqninkunata maldicïman?
¿Y imanöparaq Teyta Jehovä cuidëkanqan nunakuna ushakänampaq nïman?+
9 Qaqa janampita y jirkapitam pëkunataqa rikä.
Pëkunaqa wakinkunapita karuchömi täkuyan,*+y manam wakin nunakunanötsu kayan.+
10 ¿Piraq Jacobpa kastankunata yupëta puëdinman?+
¿Piraq wakin israelïtakunallatapis yupëta puëdinman?
Allita ruraq nunakunanömi noqapis wanuyta munä,y pëkunanömi ushakëta munä”.
11 Balacnam Balaamta nirqan: “Qamtaqa qayatsimurqoq chikimaqnïkunata maldicinëkipaqmi, peru qamqa Teyta Dios bendicinampaqmi yanapëkanki”.+
12 Balaamnam nirqan: “Noqaqa Teyta Jehovä llapan nimanqanllatam parlëkä”.+
13 Tsënam Balacqa nirqan: “Juk sitiuta ëwashun, tsëpitaqa wakinllatam rikanki y manam llapankunatatsu. Tsë sitiupita pëkunata maldicïkuy”.+
14 Tsëmi Pisgä sitiu jananchö+ Zofim jirkaman pusharqan, tsëchömi törukunata y carnërukunata rupatsiyänampaq qanchis altarkunata Balac rurarqan.+
15 Balaamnam nirqan: “Ëwä Teyta Dioswan parlamushaq. Kutimunqäyaq kë rupëkätsinqëki qarënikikuna këkanqanchö quedakuy”.
16 Teyta Jehovänam Balaamta nirqan:+ “Balac kaqman kuti y ninqäta willë”.
17 Kutiskirnam, Balacta y Moabchö dirigeqkunata altar lädunchö tarirqan. Chäriptinnam Balacqa, “¿ima nintan Jehovä?” nir tapurqan.
18 Tsënam Balaamqa Teyta Dios ninqanta kënö willarqan:+
“Ziporpa tsurin Balac wiyamë.
19 Teyta Diosqa manam nunatsu ulikunampaq o llullakunampaq,+y manam nunapa tsurintsu jukta jukta parlanampaq.*+
Teyta Diosqa llapan ninqantam ruran,y llapan änikunqantam cumplin.+
20 Teyta Dios pëkunata yanapëkaptinqa,+¡Imanir-raq pëkunata maldicïman!+
21 Teyta Diosqa manam dejanqatsu Jacobpa kastankunata brujerïata rurayänanta,y manam israelïtakunata ima mana allipis pasananta permitinqatsu.
Jehovä Diosninkunam pëkunata yanapëkan,+y pëkunaqa gobernaqnin kanqantam niyan.
22 Pëkunataqa Teyta Diosmi Egiptupita pushamushqa.+
Y Teyta Dios yanapaptinmi, mëtsika markakunata ushakätsiyashqa.+
23 Tsëmi Jacobpa kastan israelïtakunata imapis pasëkunampaq parlayanqanqa cumplikantsu,+y manam brüjukuna mana allita rurayanqampis imanantsu.+
Jacobpa kastan israelïtakunapaqmi kënö niyan:
‘¡Pëkunata Teyta Dios yanapëkanqanta rikäyë!’.
24 Israelïtakunaqa leonnömi llapan chikeqninkunata ushakätsiyanqa.+
Leonnömi chikeqninkunapa ëtsanta manaraq mikur,y yawarninta manaraq upurqa jamayanqatsu”.
25 Tsënam Balacqa Balaamta nirqan: “Mana maldicirqa ama bendicipistsu”.
26 Balaamnam nirqan: “Noqaqa Teyta Jehovä nimanqanllatam willëkaq”.+
27 Tsënam Balacqa Balaamta nirqan: “Aku, juk sitiuta ëwashun. Tsë sitiupita pëkunata maldicïkunëkipaq, capaz kë kutiqa maldicïkunëkipaq Dios yanapashunki”.+
28 Tsëpitanam Balacqa Peor jutiyoq jirkaman Balaamta pusharqan. Tsëpitaqa Jesimon tsunyaq sitium rikakaq.+
29 Chëkurnam Balaamqa Balacta nirqan: “Qanchis törukunata y qanchis carnërukunata rupatsinapaq qanchis altarkunata perqë”.+
30 Balacqa Balaam ninqannöllam rurarqan. Y kikin ruranqan altarkunachömi, Balacqa tsë animalkunata rupatsirqan.
