Osëas 9:1-17
9 “Ama kushikuyëtsu Israel nunakuna,+y ama juk nacion nunakunanö imatapis kushishqa rurayëtsu.
Qamkunaqa qellëpaqrëkur jukwan jukwan kakurmi* noqa Diosnikikunapita witikuyarqunki.+
Qamkunaqa gränukunata cosechayänan ërakunachö jukwan jukwan kakurnin chaskiyanqëki pägutam kuyayarqunki.+
2 Peru manam ni ërapis ni vïnu jaruyänëkipis mikuyta qarayäshunkitsu,y manam llullu vïnuykikunapis kanqatsu.+
3 Noqa Jehovä kamanqä patsachöqa manam kawayankinatsu,+sinöqa Egiptumanmi kutiyankiy Asiriachömi rikënïpaq mana limpiu kaqkunata mikuyanki.+
4 Manam noqa Jehoväpaq apayämunqëki qarëkunamampis vïnuta jichayankinatsu.+
Manam qarënikikunapis kushitsimannatsu.+
Qarënikikunaqa nunakuna wanupakur o wañupakur mikuyanqan tantanömi kayan.
Llapan mikoqkunam rikënïchö limpiunatsu kayanqa.
Tantëkikunaqa qamkunallapaqmi,ama noqa Jehoväpa wayïman apayämunkitsu.
5 ¿Imataraq rurayanki juntakäyanqëki junaqchö*y noqa Jehoväta alabayämänëkipaq rurayanqëki fiestachö?
6 Ushakëta mantsarmi qeshpir ëwakuyanki.+
Egiptum juntayäshunki,+ y Menfisnam pampayäshunki.+
Shinwa o ishanka jeqamurmi plätapita väleq cösasnikikunata tsapanqa,y carpa* wayikikunachömi kasha jeqamunqa.
7 Chämunqam juzgashqa kayänëki junaqkuna.+
Chämunqam castigashqa kayänëki* junaqkuna.
Tsëtaqa llapëki Israel nunakunam musyayanki.
Willakoqkunapis upanömi ushayanqa, y jutïchö parlayanqanta neqkunapis löcunömi tikrayanqa.
Mëtsika jutsata* rurashqa kayaptikim, alläpa cölerar contrëkikuna këkä”.
8 Efrainta täpëkaq willakoqqa,+ Teyta Diosnïwanmi këkarqan.+
Efrainpa llapan näninkunachömi Diospita willakoqkunaqa,+ pishquta tsareqkuna* churayanqan trampanö kayan.
Teyta Diosninkunapa wayinchöpis chikinakuyllam kan.
9 Guibeä markachö+ juk kuti pasakunqannömi, israelïtakunaqa alläpa mana alli rurëkunaman chäyashqa.
Teyta Diosqa mana allikunata rurayanqantam yarpanqa, y jutsata* rurayanqampitam castiganqa.+
10 “Tsunyaq sitiuchö üvasta tareqnömi israelïtakunata tarirqä.+
Unë kastëkikunataqa punta yarqoq hïgustanömi rikarqä.
Peru pëkunaqa Peor sitiuchö Baalmanmi ëwayarqan,+tsë penqakuypaq santutam adorayarqan.+
Tsëmi tsë melanëpaq santunö pëkunapis tikrayarqan.
11 Efrainpa puëdeq kanqanqa pishqu volar* ëwakoqnömi pasarin,manam mëqan warmipis qeshyaq tikranqatsu ni wamrayoq kanqatsu.+
12 Wamrankunata imëkanöpa qeshpitsiyaptimpis,manaraq poquyaptinmi llapan wamrankunata ichikllapa ichikllapa ushakätsishaq.+
¡Allaw pëkunata dejaskiptï!+
13 Efrainqa Tïru markanö+ alläpa shumaqmi,peru kananqa ushakätsiyänampaqmi wamrankunata jipinqa”.
14 Teyta Jehovä, pëkunawan ruranëkipaq kaqta rurëkuy:
qeshyaq këkaqkuna llullunkunata shulluyätsun y wamrankunata chichiyänampaq* ama lichinkuna katsuntsu.*
15 Tsëpitanam Teyta Dios nirqan: “Guilgalchömi+ mana allikunata rurar qallayarqëki, tsëmi qamkunata tsëchö chikir qallarqä.
Mana allita rurayanqëkipitam markäpita qarquyashqëki.+
Manam qamkunata kuyänatsu.*+
Llapan gobernadornikikunam mana cäsukoq kayan.
16 Efrainqa ushakanqam.+
Matsumpis o watsimpis* tsakinqam, y manam imatapis wayunqatsu.
Wamrankuna kaptimpis, kuyë wamrankuna wanunantam o wañunantam permitishaq”.
17 Mana wiyakushqa kayaptinmi,Teyta Diosnïqa pëkunata dejarinqa,+y juk nacionkunachömi mantsa mantsalla kawayanqa.+
Nötakuna
^ O “oqllanakurmi”.
^ O “cada wata rurayanqëki fiestachö”.
^ Kënöpis niyanmi: toldu.
^ O “sufriyänëki”.
^ Kënöpis niyanmi: pecäduta.
^ Kënöpis niyanmi: achkoqkuna.
^ Kënöpis niyanmi: pecäduta.
^ Kënöpis niyanmi: pärir; vuëlar.
^ Kënöpis niyanmi: chuchuyänampaq.
^ O “chichinkuna tsakishqa o inkukashqa kayätsun”.
^ Kënöpis niyanmi: kuyayaqnatsu.
^ Kënöpis niyanmi: Jawampis; Chapampis; Sipimpis.
