Romänus 12:1-21
12 Tsëmi wawqikuna y panikuna, Teyta Dios llakipäkoq* kanqanrëkur, qamkunata rogayaq, kawëkaq, limpiu y Diosta kushitseq qarëtanö+ cuerpuykikunata entregayänëkipaq.+ Tsënömi llapan pensënikikunawan Teyta Diosta sirwiyanki.+
2 Y amana kë munduchö nunakunanöqa kayëtsu; tsëpa rantinqa, imanö pensayanqëkita cambiar jukläyana kayë,+ tsënöpa Teyta Diospa rikënimpaq ima alli kanqanta, ima kushitsinqanta y ima alläpa alli* kanqanta cläru musyayänëkipaq.+
3 Teyta Dios noqawan alläpa alli kashqa kaptinmi cada ünuta niyaq,* conviëninqampita mastaqa qamkunapita mana pensayänëkipaq,+ sinöqa, pëman markäkuyänëkipaq o yärakuyänëkipaq Teyta Dios yanapayäshunqëkimannö alli juiciuwan qamkunapita pensayë.+
4 Imanömi cuerpuchöpis imëkantsik kapamantsik,+ peru llapantsu tsëllata ruran,
5 tsënöllam noqantsikpis mëtsikaq karpis, Cristuwan juknölla karnin juk cuerpulla kantsik, peru cada ünuqa juknintsik juknintsikmi wananakuntsik.*+
6 Tsëmi Teyta Dios noqantsikwan alläpa alli kaptin cada ünu imëkata rurëta yachantsik.+ Teyta Dios puntallapitana musyatsikunqanta willakuyta yacharqa, markäkunapaq o yärakunapaq yanapamanqantsikmannö tsëkunapita willakushun;
7 wakinkunata sirwita* yacharqa, llapan puëdinqantsikta rurar wakinkunata sirwishun; yachatsikuyta yachaqqa, yachatsikutsun;+
8 wakinkunata consejëta yachaqqa,* wakinkunata consejar* katsun;+ qarakoq këta yachaqqa, llapan shonqunwan qarakutsun;+ congregacionchö kaqkunata dirigita yachaqqa, empëñu empëñu dirigitsun;+ llakipäkoq* këta yachaqqa, kushishqa llakipäkutsun.+
9 Ama janan shonqullaqa kuyakoq kayëtsu.+ Mana alli kaqta melanäyë,+ y alli kaqta rurayänëkipaq kallpachakuyë.
10 Familiachönö llapan shonquykikunawan kuyanakuyë. Jukkunata respetëchö punta puntachö kayë.+
11 Ama qelaqa kayëtsu,* sinöqa trabajador kayë.*+ Santu espïritu yanapayäshuptiki imatapis gänas gänaslla rurayë.+ Teyta Jehoväta* esclävunö sirwiyë.+
12 Shuyarëkäyanqëkiman yarpar kushikuyë. Sufrimientukunapa pasar alli tsarakuyë.+ Teyta Diosman imëpis mañakuyë.+
13 Wanayanqanmannö* wawqikunata y panikikunata* imëkëkikunata rakipäyë.+ Imëpis alli nuna kayë.+
14 Imëkata rurar sufritsiyäshoqnikikunata bendiciyë,+ awmi, bendiciyë y ama maldiciyëtsu.+
15 Kushikoqkunawan kushikuyë, y waqaqkunawan waqayë.
16 Qamkuna rikäkuyanqëkinölla wakintapis rikäyë; ama imëka allikunata ashiyëtsu,* sinöqa llapan rurayanqëkichö humildi kayë.+ Ama rikënikikunapaq yachaq tukuyëtsu.+
17 Mana allita rurayäshoqnikikunataqa ama mana allipa kutitsiyëtsu.+ Nunakunapaq* ima alli kanqanta cuentaman churayë.
18 Puëdirqa, y qamkunapita kaptinqa, llapan nunakunawan yamë kawakuyë.+
19 Kuyë wawqikuna y panikuna, ama vengakuyëtsu, sinöqa mana allita rurayanqanwan Teyta Dios cölerakunanta dejayë.+ Kënömi qellqarëkan: “‘Dispuninqä tiempuchömi, rurëninkunamannö castigashaq’ ninmi Teyta Jehovä”.*+
20 Tsëpa rantinqa, “chikishoqniki mallaqaptinqa mikuynin qarëkuy, y yakunaptinqa imanllapis upunampaq qarëkuy; tsënö rurarqa, peqanman o umanman shanshëkaq o shankëkaq carbonta qotureqnömi rurëkanki”.*+
21 Ama mana alli vencishunëkita dejëtsu, sinöqa mana alli kaqta alli kaqwan vencir sïgui.+
Nötakuna
^ Kënöpis niyanmi: ankupäkoq; kuyapäkoq.
^ O “perfectu”.
^ Kënöpis niyanmi: nï.
^ Kënöpis niyanmi: necesitänakuntsik.
^ O “yanapëta”.
^ O “kallpayoq kayänampaq yanapëta yacharqa”.
^ O “kallpayoq kayänampaq yanapar”.
^ Kënöpis niyanmi: ankupäkoq; kuyäpakoq.
^ O “Ama rurënikikunachö qela kayëtsu”.
^ O “imatapis empëñu empëñu rurayë”.
^ Kënöpis niyanmi: Necesitäyanqanmannö.
^ Griëgu idiömachöqa “limpiu nunakunata” ninmi.
^ O “imëka allikunaman pensar kayëtsu”.
^ O “Nunakunapa rikënimpaq”.
^ Tsënö nirqa, mana munëkaptimpis chukru shonqunta alliyätsipaqmi parlëkan.
